Chroniques

« Bèf la pa soif, li boir pa. » :in kozman pou la rout.

Témoignages.re / 12 janvier 2019

Demoun lontan l’avé bèf téi koné z’ot traka kan bèf i vé pa boir ni manzé.Mi souvien in moun l’avé tout sort truk pou fé boir épi pou fé manz son bèf :désèrtènn foi i téi mouye la paye av èk lo d’sèl.Dabitid i marsh mé dé foi i marsh pa.

In zour lo boug lété si tèlman agasé ké li la fout in kou d’poin dann kote son bèf é lo zanimo la tonm atèr –fini pou lo bèf, na arienk la boushri i vé ali ankor é bon marshé siouplé…

Sans prop sa ! Mé sans figiré alor ?Na in ka kan marmaye lékol i vé pa aprann é tout sak lo mètr i fé i sèrv pa arien .Sé pou sa bann zamontrèr i di souvan dé foi, sak i fo fèr sé donn marmaye l’anvi aprann é si néna l’anvi li aprann.

San l’anvi, batu d’avans. Avèk l’anvi léspoir i rovien. Alé ! Mi kite azot rofléshi la dsi é ni artrouv pli d’van. Sipétadyé !