Li apèl Ezidine ! Li lé né la-ba dann péï komor. Li la vni La Rénion konm étidian. Akoz ? Pars dann son péï, lé difisil fé bon zétid, épi lé dir avoir in lavnir korèk, épi kan ou lé zènn, ou i vé voiyazé. La Rénion, sa i atir aou konm la limyèr i ral bann papiyon. Alor, li la vni issi konm déssèrtin i di pou poursuiv son zétid, mé sé plito lo zétid la poursuiv ali...

Li la fé foto, li la fabrik bann zobzé avèk nik koko, épi li la trouv in moun na la nasionalité... Zot la fé in zanfan ansanm. La pa promyèr foi sa i ariv, sar pa la dèrnyèr foi... Li la déside domann in pèrmi pou travay, pou gingn son vi épi sète son pti famy. D’apré lo bann règléman La Frans, li lavé lo droi.
Soman, in kou d’shias, i mank in pyès dann son dossyé : sèrtifika nasionalité son zanfan, alor banna i désid mète ali déor, ranvoy ali dann son péï.
Akoz ? Pars in minis La Frans la di : « Tansion, la tandans la pa bon ! Ni trap arpa nout kota ! »
I badine pa avèk lo shif ! I badine pa avèk la tandans !

NB : Rozman pou Ezidine, dèrnyé minite, tribinal la donn ali rézon.

Justin