Granmatin, nana in kamarad i sonn amoin dann téléfone épi i di : « Koman i lé mon fra ? ». Li koz in pé otour é alantour avan’di amoin pou kossa li la désid gaspiye son téléfone, li di amoin : ou prétan gouvèrnman i kado pi dmoun arien ou koméla. Si olèrk asiz dsi rosh piké pou shof solèy ou té i lir in pé zournal, ou nora vi la pa vré ! "Boukliyé fiskal" ? I di pa ou arien sa ?

Èk sa, bann vaza nana larzan par balo, so kou issi, nana pou gingn par konténèr akoz sak nana in bon pé lo voul, gouvèrnman va diminyé zot zinpo. Té i pran azot 60% sak zot té i gingn, astèr va pran arienk 50%. Anplis, konm va kont anndan lo koméraz CRDS (sa pou ranbours bann dèt la sékirité sosyal) épi CSG (sa pou pèy la rotrèt), lo 50% lé riskab pass 39%. In bonpé i pèy ar pi linpo dsi la fortine (ISF) épi sa mèm i pèy RMI ansanm.

Oté lo frèr ! Mé koman va pèy mon pti rémi ? La mon kanar lé noir-la, li di amoin, an soufrans ! Sak ou di, la pa vré ditou : Pèr Noèl la pa fatigué li, soman li ogard bann gro, li ogard pi nou. Li bouz ankor, l’modi, soman pou bann rish.

Justin