Lakey lo sit > Chroniques > in kozman pou la rout
"Kan zot la rogard lo mansh la ash, déssèrtin pyé d’boi la di : sa nout frèr
In kozman pou la rout
vandrodi 4 désanm 2020, sanm
Méssyé, Médam, la Sosyété, néna in bonpé provèrb dann in bonpé lang épi dann in bonpé péi i di zafèr konmsa. Mé konm zot i konpran ,dan la vi, néna vré frèr épi fo-frèr. Par natir li lé mèm kotéké ou dan la sosyété. lo kou lo fo-frèr lé pa atandi é sé pou sa la plipar d’tan lo kou i fé pli mal kan i vien par li... Sa i rapèl amwin in n’afèr : in zour in ziz péi l’arivé konm mazistra. Mi rapèl in moun la zistiss l’avé zok ali é pa arienk in foi alor li la panss : astèr sé bann moun konm mwin va ziz amwin , mi pans li omoinss li va konprann amwin in pé myé. Mèm in pé la mète ali an gard, é la di ali, fyé pa dsi landroi lo ziz i sort, li zoué pa son rol pou ou. Sé sa k’i kont : zot lé pa mèm koté dan la sosyété Li la baz dsi son poinn vizé, lo ziz l’avé son konfyans... Kan lo bra la zistiss la passé la zizé é lo kou té dir, li la gingn pou son kont. Alor mi panss li la rovi son pozissyon, mé tro tar. La zitiss lété pa pou li. Alé ! Mi kite azot rofléshi la dsi é ni artrouv pli d’van. Sipétadyé.