Oté

« Azir san rofléshir, sé tire san vizé »

In kozman pou la route

Justin / 14 mé 2021

JPEG - 43.6 ko

Médame, zé Méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami, mi panss mi yème bien kozman-la, mèm si mi aplik pa toultan son konsèye konm k’I fo pars a bien kalkilé azir na dé foi sa lé fassil mé azir kan ? Kèl manyèr ? Ala lo pli difisil. Dann toute shoz I fo fé travaye la tète é la pa toultan ké tout demoun i aplik konsèye-la a la lète. Mé antansyon, lapa toultan néna lo tan pou rofléshi ; in légzanp : in ropriz ballon dann foutbal. Néna in fraksyon d’sogonde pou réazi é si lo kou la porté bravo ! Sé lo bi di syèkl. Mé si la loupé ? Si la loupé, la loupé balon lé ron pou toulmoun. Mé dizon, dann lansanm kozman mwin la mark an-o la, li lé plito valab dann katrovin pour san dé ka, é sa lé vréman éstra. Alé ! Mi kite azot rofléshi la dsi é ni artrouv pli d’van. Sipétadyé.