Oté

« Bon shien i shass de rass »

In kozman pou la route

Justin / 15 zwin 2021

JPEG - 43.6 ko

Médame zé Méssyé, la sosyété koze èk mwin sé koze èk in kouyon, mé sé o pyé d’lo mir k’i oi lo masson. Mézami néna in késtyon limanité i poze ali dopi in bon boute tan : sé kèl sé la par rante la natire épi la kiltir dann sak i fé ké nou sé d’moune – anfin bande z’om modèrn konm i di sa.

Tazantan ni trouv la natir lé inportan é mèm pliské, tazantan sé la kiltir k’i konte bonpé pou nou. Fransh vérité shakinn néna son par bien antandi : i di pa kalbass amère i suiv la rassine ? Mé i di pa ossi pou grandi in zanfan la bézoin toute in villaz ; alor kèl par pou la natir, kèl par pou la kiltir ?

Mi koné pa oziss mé mwin lé sir shakinn néna son par é san la par d’inn, la par d’lote i konte pa bonpé. Donk mon késtyon : in bon shien d’rass i shass bien, sansa i fo dress ali pou la shass ? Mé i di ossi avèk in koshon i fé pa in shoval de kours. Alor avèk in shien normal I pé fé in bon shien d’shass,

Alé ! Mi kite azot rofléshi la dsi é ni rotrouv pli d’van. Sipétadyé.