« Fé patin sanm in moun » - in kozman pou la rout

Mi koné pa si zot la fine romarké mé nou rényoné nou na in soif k’ i pass pa. Sé la soif konm di bann fransé « la konsidérasyion ». Nou la touzour bézoin demoun i pran anou pou kelk’in. In pé i di sé pars nou-mèm nou la poin la konfyans dan nou. Donkalor ni pans souvan dé foi demoun i pran pa kont avèk nou, i rokoné pa nout mérit. Boudikont ni roprosh lé z’ot fé patin avèk nou, sansa fé shifonn pyé : i ansèrv de nou épi z’ apré i zète. Vré, pa vré ? Mi pans ké sé solon. Kosa zot i anpans zot ? Arien ditou ? Fé travay z’ot koko ! Fé bouy z’ot matyèr griz ! Zot va oir ké rant-rant, ni pé z’ète, tazantan dakor rantre nou.