Oté

In karé dann in ron ? Non la sré plito in ron dann in karé

Justin / 14 zwin 2021

Mézami, dann la lang franssé, néna in kozman i di : « I fo arondi lé zangl ». Néna ossi in n’ote I di konmsa : « Mète dolo dann son vin ». Mi konpran sa konm in léspréssion pou di i fo pa shoke le moune, i fo pa fé père lé z’inn é lé z’ote. Sa lé vré souvan dé foi dann in kanpagn éléktoral.

JPEG - 43.6 ko

Légzanp mi pé done azot sé sète la route an mèr. Mi antan toute la bande apré di, koman koman i fo fini so route-la, pars la bézoin pou lo transpor, pars demoun lé fatigué avèk lanboutéyaz i fini pi. Mwin ossi, pé s’fère mi diré lo même zafèr mé néna in ka pèrsone i oze pa majiné, é poitan sé in ka possib é lé mèm pa in katapar. Kissa k’i koné si lo déstin la route-la sé pa d’fini an katédral kassé ? Si sé sa koué k’nipé ? Pa granshoz sanm pou mwin.

In pé i souf dann mon zorèye pou di arète mète la boush kabri ladan ? Zot i koné sa i vé dir assé porte la shiass.

La pa késtyonn d’sa mé m’a dir azot, fransh vérité, kan mi pass dsi la route litoral é ké d’an ba, mi rogarde ali-anfin, lo boute lé fine fé !- mi di dann mon kèr : « Aou la route an mèr ! sépa zordi, sé pa domin, mé mwin lé a d’mandé si la mèr i sava pa anval aou ». Mi rogarde lo bande poto épi mi di dann mon kèr : « sa lé solide sa ? Sa i sava anpare in sirkilassyon loto, kamion, lo trin ? Sa va rézisté kan la mèr va bate dsi li an paké épi an roulo ? » Mwin lé pa dovinèr mé mi dmande amwin kan mèm tousala.

Kossa in shoz ? Dovine dovinaye : Dsi l’pon di nor in bal lété doné.

Anfin mwin la antande in pé kandida, apré di i fo mète in lékip lékspèr la dsi pou égzamine ali dsou toute son koutir, mèm pou oir koman i fini ali, si i fini. La plipar i panss Didier Robert la foute La Rényon épi zot mèm dann inn ponp é lé bien vré. Inn ponpe téknik, inn ponp monétère, in ponp ziridik, anfin inn ponp dann tou lé sanss possib.

Mi san bien, rante lé lign, déssèrtin i poze azot késtyon, mé i évite poz sa dovan la popilassyon pars zot la père i mète lotèr dsi zot. Poitan si lo déstin la NRL sé d’fini an katédral kassé, ni vé, ni vé pa, mé li va fini an katédral kassé é kossa nora sèrvi d’arondi lé zangl. Kossa nora sèrvi bate in ron dann in karé. A riyin ditou, konm dabitide. Alé ! ki vivra véra !