Oté

« In pèp san kiltir sé in onm san parol »

In kozman pou la route

Témoignages.re / 10 mé 2021

JPEG - 43.6 ko

Médame zé Méssyé, la sosyété koze èk mwin sé koze èk in kouyon, mé sé o pyé d’lo mir k’i oi lo vré masson. Mézami kozman-la sa in proverb l’alzéri mé opliss mi lir ali, opliss mi panss, d’apré mon poinnvizé, li tienbo pa d’boute. Pou koué ? Pars li parl in pèp san kiltir é sanm pou mwin in pèp lé oblizé aoir in kiltir si li sé in pèp. Lé vré fitintan, déssèrtin téi di nou rényoné sèl kultur ni pé avoir sé la kultur band franssé pars néna poin in kiltir rényoné. Solon déssèrtin nout lang sré in patoi, nout mizik in folklore, noute téate in zé d’sénète, noute danss in sinp tortiyaz, noute rolizyon in sipèrstisyon... Mon band zami zot i konpran in kozman konmsa i oi pa lé shoz par lo bon boute. Bon ! Mé alon di sa lé vré mé si ni mète inn avèk l’ote, lo soidizan patoi, lo soidizan folklore, lo soidizan zé d’sénète, lo prétandi sipèrstisyon, épi lo tournaz lo kor. . arzoute avèk sa noute fasson oir lamour, la mor, la vi, ébin si sa sé pa in kiltir éskiz amwin lé ga, sa i arsanm bien. Astèr wi yème ali, wi yème pa li, wi aprésyé ali, wi aprésyé pa li, nou na poin arien a fère. Sé nout kiltir, anou pèp rényoné é sé sa k’ i fé ké nou sé in pèpe konm in n’ote. Alé ! mi kite azot rofléshi la dsi é ni artrouv pli d’van. Sipétadyé.