Oté

In sinp jest pou fé la losson bande zinstanss lo foot

Justin / 19 zwin 2021

Lo monde dann l’éspor lé pa pli mové é lé pa moin mové ké lo monde an zénéral. Ni pé panssé li lé pa pli rassist é li lé pa moin rassist ké lo monde an zénéral. Mé i ariv li sèrv révélatèr pou in problème i égzist é li mète lo doi dsi in tare néna dann limanité.

JPEG - 43.6 ko

Sépa si zot la romarké souvan dé foi dann la koupe fotbal lérope, bande zantrénèr, sansa bande zouar, i fé zot konférans do prèss dovan dë boutèye in boisson lé bien koni dann lo monde antyé, sansa dovan dé shopine la byère bien koni galman. Pèrsone i bouj pa é mwin té a d’mandé si in zour noré in sportif noré bouj in pé dovan in n’afèr konmsa.

Ziska néna dé-troi zour sé Ronaldo, lo gran fotbalèr toulmoune i koné, té i fé son konférans do press. L’èr-la mwin la vi ali, mète lo dé boutèye la boisson nout toute i koné par koté, épi trape dann son sak in boutèye dolo. Li la di sinploman : « Mi profère dolo ! » épi son konféranss la kontinyé. Mé konéssan in pé kissa i lé bononm-la, mwin lé sir son panssé téi sar pli loin k’sa. Pou kossa mi di sa ?

Pars in zour, bande Israël téi vienn bonbarde la Paléstine é in zouar fotball israélien la domande Ronaldo pou fé in léshanj mayo apré in match. Li la rofizé é mi panss li la di kékshoze konm : « Pa zordi ! » Sansa in n’afèr konmsa... Alor pou la boisson amérikène mi souète in zour li dévoil in pé son panssé é zour-la sar intéréssan antande ali. Mi di pa pliss pou zordi, mé zot ossi zot i doi an avoir z’ote opinyon.

Sa i amontr anou dann lo monde léspor pa toute la tète lé vide, sansa lé pa sansib par rapor bande drame i éspass dan lo monde. Ronaldo sé in gran foutbalèr, mé in gran bonom an même tan.

NB Mwin la vi galman in gran sportif i apèl Pogba mète de koté in shopine la byère épi pran son boutèye dolo. Mi kroi, lère-la li téi panss toute bande viktime lalkol i fé dann in pé toute sosyété. Mé ni pé anparl in n’ote zour.