Oté

Konm avan ? Kissa la di lo monde d’avan la pa pou rotourné ? La lang la poin lo zo pou vréman, voui !

Justin / 4 zwin 2021

JPEG - 43.6 ko

Mézami zot i koné konm d’ote mwin téi rèv pou noute péi, in mond prop, bien roganizé, dann in péi bidonvil nora fini disparète épi lo moune san z’ète rish laté fine rèye la mizère. Mwin téi rèv de sa ! Mi rève ankor de sa ! Mé antansion lo rève sé pa la réalité, é la réalité sé sak i antande tou lé zour dann radio demoune apré rakonté… Mi diré in monde té fine prèss sorte dann la mizère mé zordi l’apré rotonbe an plin d’dan.

Dapré zot lé possib in n’afèr konmsa ? Mi antan déza in réponss é réponss-la i bote pa mwin ditou. Mi antande demoun apré di : « Lo kovid la pass par la é sé pou sa noute monde l’apré rokil an aryère. » Mé mi trouv sa la pa vré san pou san. Pou koué ? Zot i koné kozman-la, sak i di konmsa : « Karapate i monte touzour dsi tété bèf mèg, pa dsi bèf gra ». La mizère, mézami, i koné son zèrb-li koné dsi kissa li sava monte an promyé é li monte an promyé dsi lo moune an sityassion d’frazilité..

Pétète zot i pans pa konm mwin, pétète zot i di, issi lé konm La franss é sé pou sa ké nou lé sinploman dann in pass difissil. Pétète zot i panss inn foi sar fine bate lo maladi atèr, La Rényon va arvni konm avan....Konm avan ? Mé kissa la di, in zour, lo monde d’apré sar pa konm lo monde d’avan ? Konm avan ? Avèk son kortèz zinégalité, déssèrtin bon poin, mé déssèrtin mové poin galman ? Avèk in lozisyèl a shanjé, dann in sosyété post-kolonyal ?

Konm avan ! Lé ga, la lang la poin lo zo pou vréman !