Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

« Lo klou k’i dépass i gingn kou d’marto. »

In kozman pou la route

vandrodi 10 séptanm 2021


Provèrb zaponé.


Médame zé Méssyé, la sossyété koze èk mwin sé koze èk in kouyon, mé sé o pyé d’lo mir k’i oi lo vré masson.

Mézami, mon bande dalon, kossa provèrb-la i rapèl azot. Pou win sa i rapèl l’armé kan lo sèrzan téi di, li vé oir in sèl tète. L’èr-la mi poze amwn in késtyon : in sossyété i domand’ré toulmoune d’ète parèye, sa la pa in sosyété i fé bon viv dodan. Mé si lé otorizé d’ète pa parèye, in pé i pé di sa in sossyété i manke la koézion.

Pou mwin domande toulmoune d’ète parèye, sa sé kékshoze la pa possib, mé lé mèm danzéré, pars si lo klou k’i dépass i gingn kou d’marto, lo moune ké lé pa parèye, kossa i fé avèk li ? Ni parl zafèr sèryé-la, ni parl la ropréssion ni parl la libèrté sansa lo manke libèrté. Dann déssèrtin péi bande homo i sibi la répression, dann d’ote i mète a mor bande zanfan lo zyé lé rouz an néssan-pars i di zot néna lo mové zyé. In tan, kan in marmaye té andikapé, téi anfèrm ali dan la kaze é sirtou ké demoune i oi pa li.

Ziska oussa i pé alé konmsa ? Liniformité ! Toulmoune i doizète parèye, mi vé oir in sèl tète. I paré néna in lézande téi di sa lo li d’ Prokuste : sak lé tro kourte pou lo li i ral déssi pou ralonze ali, sak lé tro long i fo koupe lé boute k’i dépass, parèye pou l’moune tro larz é pou l’moune tro minss.

Mézami, mi kite azot rofléshi la dsi é ni artrouv pli d’van. Sipétadyé.


Inn modékri, inn ti lavi, inn komantèr ?

signaler contenu


Facebook Twitter Linkedin Google plus