Lakey lo sit > Chroniques > Oté

« Lo mond i pé shanjé si li vé, mé lo shat lé pa paré pou ponn »

In kozman pou la rout

samdi 29 févrié 2020, sanm Justin

Mésyé, Médam, La Sosyété, koz èk moin sé koz èk in kouyon, mé sé o pyé d’lo mir k’i oi lo mason. Mé zami sa in kozman demoun l’afrik sa é pou dir la vérité moin lé étoné lir in n’afèr konmsa. Biensir mi konpran bien kan i di zafèr konmsa sé pou fé ri la boush, mé arienk pou sa solon zot ? Zot i koné la syans i fé progré sansa noré dé foi dé shoz étonant. Manipilasyon zénétik, sa i égzis sa é si domin in bann savan fou téi désid manipil in shate é transform ali dann in nouvo bébète kapab ponn épi kouv son zèf pou fé d’ti. A oui ! Mi antan déza in pé apré di : in n’afèr konmsa lé pa posib é la moral bann syantifik i anpèsh azot fé dé shoz konmsa. Mé zami, in bèzman avèk l’om sé ké li kroi li pé ranplas Bondyé é li osi rofé la kréasyon. Moin pèrsonèl mi yèmré l’om i fé par la syans sak lé bon pou l’om. Mé oila, moin la pa Frankenstein mé d’ot i pé z’ète in monstr konmsa. Pétète zot va di amoin sa sar posib kan kok nora lo dan.A bon ! kisa i di azot domin i fé pa in kalité kok nora lo dan. Si sa i ariv, zot i pé jir amoin zot va manj zot shapo ? Si sé sa, prépar touzour la boush pou sa ! Alé ! Ni artrouv pli d’van.sipétadyé.


Inn modékri, inn ti lavi, inn komantèr ?

lé modèré-dovan

Forom kozman lé modéré-dovan : lé néséser inn komander la finn konfirm ali pour out kontribusyon i aparé an liyn.

Kisa ou lé ? (réponn lé pa obligatwar)
Votre message

(Pou kré bann paragraf, lès sinpman trwakat liyn vid.)


Facebook Twitter Linkedin Google plus