Lo sa ni koné ! Gramoun Vèrgès la fine dir anou toussala. Astèr sé lo koman k’i fo trouvé

Mézami, m’a dir azot koméla pèryode zéléksyon lo pyé d’promèss i sharj a blok, lo pyé d’projé ossi i sharj a kass la bransh mé la plipar d’tan kan wi aspère antann in kékshoz réalist, kékshoz dirab ou lé kite pou out biskui. I diré ou lé angajé dann in konkour d’majinassyon. Alor, dann noute fondkèr ni yèmré a dir : lé ga, in zéléksyon la pa in konkour d’mazinasyon pars a bien rogardé toute sak néna pou fé é pou dé zané é dé zané, lé déza marké dann toute program parti kominiss rényoné. Paul Vergès épi son bande kamarade la fine di kossa i fo fé, astèr dékarkasse azot pou trouv lo koman k’i fo fé.

Kossa avèk koman, sa dë késtyon diféran é kan ou lé a l’ère di koman, ou lé fine déssote l’èr pou lo kossa. Lo kossa ni koné kossa li lé, sé lo koman k’i fo trouvé : sé la ké ni atann azot, sé la ké ni vé oir si vréman zot néna kékshoz dan la tète sansa non… é fransh vérité souvan dé foi ni apèrsoi in pé néna konm k’i diré konm zoizo bélyé la taye dan la tète. Néna défoi i antande in pé apré di sé La franss i anvoye larzan é sé La franss k’i anvoye anou bande produi konsommassyon é pou dir vré néna in pé la fé in lékwassyon sinplissimo : bien réparti larzan la franss pou in bon répartission la konsommasyon.

Na poin arien lé durab ladan ! La poin arien lé solide ladan ! Lé konm in kaz bati dann sab é pa dann la rosh mère. La vérité lé dann in lékonomi d’prodiksyon avèk lotonomi alimantèr, lotonomi énèrzétik, lo dévlopman lindistri, épi toute bande lakonpagnman k’i sava ansanm. La baz ni koné astèr é ni koné bien afors afors noute parti la dévlope son pédagozi dann l’opinyon. Konfonde pa la baz avèk lakonpagnman, konfonde pa la baz avèk son sirpliss : tourism biznèss é tousalatousalasa i pé pa ranplass in lékonomi d’produksyon é sé kant mèm sa nou néna bozoin. Alor alon koz de sa ! Alon oir la fasson ni pé fé avanss sa ! Lo rèst sé donn manzé la lang. Antouléka sé sak mi konpran ladan.