Lotosifizanss alimantère : in sinple vérité, in lévidanss, dann lintéré noute toute Rényoné

Mé zami zot va éskize amwin si zot néna linppréssyon mi rabash in pé, mé konm mwin la di souvan dé foi i fo répété, répète ankor, pou k’in sinpe vérité i fini par pass dann lopinyon piblik pou sak li lé, in vérité… zot i koné kékshoze konmsa i pé arsanm fassil pou fèr mé dann la réalité défoi lé bien konpliké.

Pou kossa mi di sa ? Pars dann mon vi mwin la si tèlman antande la mantri néokolonyal ké mi koné bien i fo pa tarde pou aporte lo démanti mèm si nou néna pti moiyin mé i fo fé kant mèm noute méyèr possib an kozan avèk lintélizans noute bande konpatriyote. Konm lo kolibri kan li sèye étinde in fé dan la foré, konm la grate-i di ossi fangok – èl na moinss kapassité ké lo traktère, mé sa i anpèsh pa li aranz in pti partère é bien konm k’i fo.

Pou kossa ankor ? Pars ni koné la vérité i marsh ti dousman mé li fini par ariv o bite ta ka lo mansonz ni koné bien son pate lé kourte é pa zordi pa domin le moune onète i fini par débissk ali. Mi antann déza in pé apré di : « Justin i koze an parabol ! Justin sé in parbolère »-alor in sinp vérité, kékshoz ké lé possib démontré kalkilé, étidyé sré tro diffisil pou kroire ?

Zordi mi dénonss sak i sèye fé kroire anou lotosifizanss alimantère lé pa possib pou nou La Rényon alé oir èl lé vréman possib. Possib pou lo bande baze noute manzé. Kissoi séréal, kissoi rassine, kissoi léguime, kissoi lo frui, kissoi lo frui-léguime, kissoi ankor dolé épi la vyande. kissoi brède… Ni pé démontre par A+B ni pé fé toussa issi an kantité épi an kalité.

Dopi lontan noute parti kominiss rényoné la marke dann son program in rovandikassion d’fon : lotosifizans alimantèr pou La Rényon é ni koné bien sa lé possib é dann lintéré noute toute, Rényoné : in lidé sinpe, in sinpe vérité, in vérité dann lintéré noute toute rényoné.

Ni koné noute péi, ni koné noute pèp, ni koné galman son kapassité, son kouraz, é son lintélizans é sé pou sa ni koné galman li lé assé majeur pou konprande oussa i lé noute lintéré vré. Ni koné li lé assé majeur pou trape nout lotosifizanss alimantère provik nou néna la libèrté épi la résponsabilité pou amenn o bite in prozé konmsa.