Oté

Malbaré mézami, nou lé vréman malbaré !

Justin / 16 zwiyé 2021

JPEG - 43.6 ko

Mézami, dopi l’tan mwin lété lékol, mi pé dir azot - promi, ziré, krashé – ké mwin téi kroi dan la syanss san pour san. Pou kossa ? Pars dopi lontan mwin téi panss son métode di syantifik téi pé pèrmète ali trouv la vérité épi di la vérité. Pou mwin in dékouvèrte syantifik inn foi li té fine pass dann in rovu syantifik, inn foi ké li té fine done déssèrtin rézilta, pou mwin, li lété la vérité é mwin téi done ali in brové d’vérité.

Biensir kan mwin té i antande déssèrtin lékstré apré di ninporte de koi, san prèv, san fé sifizaman léspèryanss, san rézone konm k’i fo, anpliss san pran bien lo tan pou bien assir lo rézilta lété vré pou vréman, mi pé dire azot sa té énèrv amwin in pé, bokou, bonpé... Donk si zot i vé, pou mwin l’avé sak la syanss i amontr épi i démontr é sak ni pé apèl bande kont-vérité. In shéma tro sinple ? Assiréman, mé k’téi anpèsh amwin kroire ninporte kossa épi baze dsi kéksoz rézonab.

Mé oila, dopi in bon koupe de tan ou lé a d’mandé si sak mwin la mark an-o la lé ankor vré toulbon. Laba, dan la franss gouvèrnman la réini in konsèye syantifik pou ède ali pran son désizyon, mé sak mi romark é toute demoune i pé romarké komité-la, donk gouvèrnman-la, i shanj l’avi konm i shanj shomize. Sak lé vré zordi, somènn proshène lé pi vré, é ankor moin vré la somenn d’apré. Donk komité syantifik-la i fé l’èr li lé trépé syantifik.

Konpran amwin bien, mi roprosh pa pa konprande in n’afèr. I pé mèm di nou l’apré rodé mé nou lé pa sir dsi lo rézilta. Mé fère konmsi wi konpran lé shoz alé oir wi konpran pa, na poin arien i agass amwin konmsa pars mwin néna konm in drol linpréssyon : konm in rankontre rant lé zékstrème… Pli o-la, mwin té i anparl bande moun k’i rakonte ninporte kossa san konète arien mé san z’ète syantifik é sak mèm si zot lé syantifik i konpran pa arien galman. In drol rankontr an vérité.

Malbaré mézami, nou lé malbaré.