Oté

Nelson Mandela, gran dirizan, mé in moune maliss kant mèm

In zistoir pou rakonte dsi galé

Justin / 12 zwin 2021

Mwin la lir kékpar in zistoir dsi Nelson Mandela… Zot i koné Mandela ? Bien sir, bande léktèr nout zoinal i koné ali bien. In shèf dann la lite kont lo réjime l’aparteid, la fé 27 zané dann in prizon épizapré la pran la tète l’Afrik di sid konm Prézidan. Zot i koné Bononm-la, anpliss son gran kapassité pou amenn la lite épi fé son travaye konm prézidan lété in moun maliss.

JPEG - 39.3 ko

I paré k’in zour kan li té fine ariv prézidan li té apré manj in boushé dann in réstoran avèk plizyèr kamarade. Dann réstoran-la l’avé in boug li ossi apré pran son ropa mé li lété toussèl. Mandela la di in kamarad ali, alé invite lo boug pou vni dsi lo mèm tab ké zot. Lo kamarad la parti fé lo linvitasyon épi lo moune la vni, in pé kontrékèr mé koman koman li la vni… malalèz vèye pa. Li la fini son ropa épi li la éskiz ali pars li té blizé alé. Lo bande kamarade la lèss ali alé.

Apréssa, touzour dann lo ropa in moune la domande lo prézidan pou kossa lo linvité lété éstréssé konmsa, pou koué li lété konm in moune la pèr. Mandela la réponde :
« Zot i koné bononm-la lété mon zolyé – lo gardien si zot i vé - kan mwin lété dann bagn é pandan in koupe de tan tou lé matin téi tortire amwin é kan lété fini téi ramenn amwin dann mon sélil, domi-mor, é mwin l’avé soif, soif mèm. L’èrla mwin téi sipliye lo gardien - lo boug lété dsi la tab avèk nou – done amwin in pé dolo pou boir é lo boug téi piss dann mon lékuèl épi téi di amwin : Boir ! »
« Astèr, konm mwin lé prézidan pétète li l’avé pèr la ropréssion, pétète li l’avé pèr mwin téi fé lo mèm zafèr avèk li… »

Zistoir-la, si lé vré i amontr lo gran dirizan afrikin lété in moun maliss, konm mwin la di, mé anpliss li téi konète pardonné é pou mwin sa i grandi ali ankor pliss.

NB Kan la guère lété fini, Mandela épi De Klerk la désside pou fé la pé, prati in métode l’avé pa fé nil par avan. Toute sak l’avé fé dé krime lété pa kondané mé invité pou fé antand ali an konféssion dovan in gran jury. I paré sé sa la anpèsh in kantité krime dann lo péi.-sa téi apèl « lo pardon épi la rékonssiliation »