Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Ni fé d’sik lizinn gran-bwa, akoz pa pran do sik la minm ?

samdi 30 avril 2016, sanm Justin

La proféranss rézyional ? Mi san mwin, kan i prononss lo mo konm si la lang désertin i pouak. Mwin osi, mwin na lo kèr an dé pou sa, mandoné mwin lé an balans minm, mé an réfléksyon d’mwin minm mi di konm nout sitiasyion d’shomaz lé pli pir kayèr, donkalor pou nou, nout ka pérsonèl, fo fé in léksepsyon. Dopi lo tan nou la sibi la proférans lot koté, koman-koman fo trouv in solisyion.

Néna i di, pou nyabou sobat èk lo shomaz, la proféranss rézyional i pé èt in ti-guiguin solisyon anparmi, pou dot la proférans rézyonal lé or-zé vik not léstari d’zordi i défann, i donn pa nou lo drwa, sépousa pou zoué la d’si fo fé in réform, fo siprim in morso d’si lartik 73 nout konstitisyon, konm sala apré va nyabou mèt an plass in léstati va donn a nou lo mwayin d’mwayéné kiswa pou lékol, kiswa pou la kiltir, pou lénérzi, zinpo épisa ni ariv pou travay.

An atandan konm nout priorité a nou sé travay pou domoun é konm an kalité diplom nou na pwin pou èt zalou, dapré sèk mi antan, na pwin in sèl séktèr i fé pèr nout bann marmay. Zistoman pou lèr i rod in diréktèr lopital, mi di a ou néna. I prétan dir, i rèt zis pou lo prézidan sign lo dékré. Konm li la di lotrozour, si néna minm konpétans odrémié pran la minm, donkalor, inkièt pi. In vié dalon la di a mwin “Ni fé d’sik lizinn gran-bwa, akoz pa pran do sik la minm“ ?


Inn modékri, inn ti lavi, inn komantèr ?

signaler contenu


Facebook Twitter Linkedin Google plus