Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Po d’shanm pou pla kouvèr, makaroni pou la bouji, vési pou lanterne

mèrkrodi 5 zwin 2019, sanm Justin

Zot i koné isi La Rényon néna in gran polémik dsi lo poinnvizé la santé bann bèf épi bann vash. Konm tout polémik néna dë kan mé antansyon lo dê kan i rokoné bann zanimo néna maladi kisoi Leucose kisoi Chlamidiose-lo promyé lé la dopi insèrtin tan, lo dézyèm i sort arivé. Afèr néna polémik alor ?
Pars lo promyé kan i di konmsa si bèf lé malad akoz i pé di demoun : zot i pé boir lo lé, épi manz la vyann san traka par l’fète k’i paré lo bann mové mikrob i artrouv pa ni dann la vyann, ni dann lo lé .L’ot kan i di : si lé vré ké bann bèf é bann vash i pé an avoir bann maladi moin la mark an-o la, lo lé avèk la vyann la pa kontaminé donk lé sin, donk anvoye ali koko, boir dolé la, épi manz la vyann.

Dann in zournal parlé lo prézantatèr i di konm rantré an matyèr : ni sava dir azot si i pé manz la vyann bèf La Rényon san traka é boir d’l lo lé kèr klèr. Moin té i atann li té i sar fé in sintèz dsi la késtyon, mé li la pa fé sof in ropriz sak lo ladministrayon i di é moin la fine mark an-o la. Dann in n’ot télé la fé vnir in madamm shèftène bann sèrvi s vétérinèr pou kozé.
Donk ala lo madam i pran la parol é fason èl I koz moin la konpri toutsuit fam-la néna in gran fish do pèye-la pa konm sète mon pti rotrète, mé in fish do pèye i pèz son poi an l’ero. Ala lo fam i di bonpé zafèr : an parmi sak moin la mark an-o la épi èl i azout sé bann zélvèr k’i doi port atansyon la santé zot bann zanimo. Si zot i fé tout sak i fo, si zot i done lo médikaman adékwat néna poinn rézon k’zanimo lé malad é dann in ka konmsa késtyonn vyann é késtyonn lé, fé roulé Férèr ! anvoye alo vitman !

Mé zami, privilèz dé l’az, moin la fine antann ladministrasyon manti é romanti dsi in pé tout kalité késtyon épi sirman dsi lo késtyonn lé, lo késtyonn vyann épi ds i in pé tout maladi dopi la Brucellose l’ané 1976 ziska bann dèrnyé maladi… Moin l’avé in famiy i manz pa dé grinn sèl avèk lo l’administrasyon é mon papa téi di : avan k’i koz ou i koné i sava manti, kan k’i koz ou i koné l’apré manti é kan la fine kozé ou i di la fine manti.
Li téi di souvan : l’èrla i rode fé pran anou po d’shanm pou pla kouvèr, makaroni pou la bouzi… sansa ankor in vési pou dé lantèrne. Mi pans mi partaz la filozofi d’famiy.


Inn modékri, inn ti lavi, inn komantèr ?

signaler contenu


Facebook Twitter Linkedin Google plus