Oté

« Sak lé bien shofé, i panss pèrsone i soufère pa la fré. »

In kozman pou la route

Justin / 16 zwin 2021

JPEG - 43.6 ko

Médame zé méssyé, la sossyété, koze èk mwin sé koze èk in kouyon mé sé o pyé d’lo mir k’i oi lo masson.

Mézami, mi rapèl in zistoir mèss Noel, an franss laba, dann péi la fré. In madame bien rish i sava la mèss é la fré i tate ali. Alor, èl i di son kontromètre, apré la mèss i fo alé amenn do boi pou bande moune pov. Aprésa, kontan avèk èl-mèm, èl ipriyère bondyé, vèye pa koman. Aprésa, son koshé i ramenn aèl dann son shato. Shato-la lé bien shofé é o boute in pti pé d’tan, èl i san pi la fré. L’èrla, èl i di son kontromètr. « Boudikonte, pa bézoin amène do boi pou bande pov, pars i diré lo tan a fine bien réshofé.. ».

Mi panss zot ossi kan zot lété lékol zot la antande zistoir-la, é konm mwin étan pti zot la sirman modi madam-la dann zot kèr. Mé sa i éspass dann liv, alé oir dann la vi réèl i spass mèm zafèr : sak lo vante lé plin i panss lé zot la pa fain, sak la kaze lé klimatizé i majine i fé bien bon la nuite pou toulmoune. Pou sak lé an bone santé demoune lé pa malde pou vréman. Sak na poin travaye lé parèss. Mé pétète zot lé pa konmsa zot é mi bate la min pou zot mé pou lé zot mi souèteré zot i fé travaye in pé zot koko.

Alé ! Mi kite azot rofléshi la dsi é ni artrouv pli d’van. Sipétadyé.