Oté

« Si wi vé, domande ! Si wi domande pa, wi gingn ar pa » 

In kozman pou la route

Justin / 24 zwin 2021

JPEG - 43.6 ko

Médame, Méssyé, La sosyété, koze èk mwin sé koze èk in kouyon mé sé o pyé d’lo mir k’i oi lo masson.

Mézami kozman mi di zordi la pa pou d’moun apré domande siouplé a longuèr f’tan. Mèm pa pou sak tazantan i fé in domande. Mé lé pou déssèrtin moune tro fyèr pou abèss azot a domandé. Mi koné mèm demoun i domande pa arien, é aprésa zot voi é zot zyé lé ranpli avèk roprosh, konm in fizi braké dsi l’moun… Zanfan i plère pa i gingn pa tété ! Sa in kozman lé drol sa, pars wi pé avoir fain san kriyé é san pléré, néna an touléka in bonpé manyèr pou fé ko nprann ou la fain.

Mi souvien in moune-in momon sa – téi di, an parlan d’in zanfan, zordi in gran méssyé déza. El téi di : « Mwin la pa bézoin li plère pou konète li la fain. » Tanmyé pou son zanfan, mi oi li a bien grandi, mé la pa toute lé konmsa. Si ni arvien dsi nout kozman an komansman, ni pé di antansyon, défoi ou néna in droi, sansa ou néna in mérite, alor i fo pa ou la onte fé oir ou lé la, ou la onte amont route kapab.

Alé ! Mi kite azot rofléshi la dsi é ni rotrouv pli d’van. Sipétadyé.