Oté

Tienbo, larg pa, mézami mé kamarade pou trape nout lotonomi alimantère

Justin / 26 mé 2021

JPEG - 43.6 ko

Mézami, mi koné pa si zot lé konm mwin, mé si mi yème bande lartik néna dann nout zoinal Témoignages – sa lé vré de toutan-mi yème galman lo komantère déssèrtin léktèr i fé. Mwin lé dakor, pa dakor, in pé dakor, in pé pa dakor mé toutfasson, i aprann dé shoz kan in léktère i rofléshi i pran lo tan pou di kossa li panss é koman li oi lé shoze.

Donk in léktèr Témoignages i apiye dsi lo rézilta bann plantèr Madégascar i gingn an plantan lo ri ibride La chine-par la 12 tone léktar – pou domandé pou kossa issi La Rényon, bande plantère kann i mète pa a plante dori sirtou ké lo plantassyon d’ri lé sibvanssyoné dann l’érop. Li di galman plante dori sé partisipe lotonomi alimantère é pou li, sa i sava pa konte plantasyon kann é sirman i pé gonf lo pla bande plantèr.

Zot i koné mwin lé pou inn épi pou l’ote plantassyon an même tan. Pou kossa ? Pars dori sé ankor lo prinsipal baze nout lalimantasyon épi kann – in plante néna o moins sink-san zitilité konm nout zoinal la fine ékri in bonpé foi – pou dossik é pa solman. Mi di pa é noute léktèr i di pa non pli, pran inn, zète l’ote mé pran lé dë avèk sa ni pé fé avanss noute lotonomi alimantère. Solon nout léktèr l’éta i vé pa sa, pars li la père ni vé pass dopi lotonomi alimantère pou réklame lotonomi politik.

Mwin lé dakor avèk li : néna in shomin é shomin-la lé pa galizé ditou é li domande anou romonte nout mansh. La vi lé konmsa pou nou é la pa pou sa ni doi rézigné. Noute léktèr i di, l’éta i profère donn anou larzan pou ashté manjé, plito ké lèss anou produi noute manjé. Si sa lé vré é mi panss lé vré, sa i ésplike pou kossa noute lékonomi d’prodiksyon i apovri ané pou ané. La pa pou sa i fo kourbe la tète, mé an kontrère rodrèss lo rin. Tienbo larg pa mézami mé kamarade.

NB-https://www.temoignages.re/politique/co-developpement/riz-hybride-chinois-rendements-eleves-a-madagascar, 101338#forum311619 : lo poin d’vizé Maillot Luçay