Oté

« Travaye pou manzé kui ! »

In kozman pou la route

Justin / 4 zwin 2021

JPEG - 43.6 ko

Koze èk mwin sé koze èk in kouyon mé sé o pyé d’lo mir k’i oi lo masson. Mézami, zot i koné néna ankor in paké d’moun issi La Rényon lé dann sityassion-la. Néna sak, soidizan i done kou d’min, mé li lé la, matin o soir, soir o matin, kissoi dan la pli, kissoi dann solèye, kissoi pou fé korvé la kaze demoun é toute sak i s’ansui. Déssèrtin i panss sa l’avé dann tan lontan é koméla néna pi, poitan d’apré sak mi oi néna ankor bonpé d’moun i viv konmsa zordi. Pars zot i oi La Rényon i fé l’èr d’ète modèrn mé bann zabitide yèr i viv an dsou bande manyèr zordi. Romark bien sa i amene anou dann tan nout listoir... Bande zésklav té i travaye pa san péyé ? Bande zangazé alor ? Avèk manzé in koté, épi in some larzan l’ote koté, é ankor sa lété marké dann kontra é langaziss téi réspèk pa lo kontra dopi A ziska Z. Mi vé pa dir lé ankor konmsa pou in majorité d ’moune zordi, mé lansien monde épi lo nouvo, i kotoiye ankor, i mlélanze ankor inn-a-l’ote si tèlman inn léla, kan l’ote i ariv. Alé ! Mi kite azot rofléshi la dsi é ni artrouv pli d’van. Sipétadyé.