Oté

« Wi pé amene in bèf pou boire d’lo, mé wi pé pa boire son plass »

In kozman pou la route

Justin / 10 zwin 2021

JPEG - 43.6 ko

Médame, Méssyé, la sosyété koze èk mwin sé koze èk in kouyon, mé sé o pyé d’lo mir k’i oi lo masson. Mézami si mi di azot kozman-la, sé k’dan mon vi mwin la fine antande ali souvan défoi. Mi rapèl in vyé mète lékol-in bon mètr par l’fète pou mwin mé pa pou lé zot-téi di : Si in bèf i vé pa boire, sé pa ou, lo mètr, ké va fé boire ali. M’a dir azot, fransh vérité, mi yème pa kozman-la. Pou kossa ? Pars lédikassyon sa i komanss pa kan wi pass lo pa d’porte lékol sa mé sa i komans avan, é sa i poursuiv apré. Pou kossa lo bèf i boir pa ? Pars li lé pa bien, li lé pa an konfyanss, li la pa gingn lo soin konmkifo. Mon vyé mètr lékol zordi fine pass l’ote koté, si marmaye i apran pa, la pa pars ou la mète dovan li in gran bol konéssans épi ou la di ali boir ! Mi rodira pa toute sak mwin la di po lo bèf, mé mi pans sa lé vré pou 90 %. Lo rèste nou la fine di é rodi é sa i toush galman la démokrassi : lé démokratik d’apré zot amontr in marmaye dann in lang la pa la syène, konmsi li lété né ladan, li l’avé bingn la-dan, li lété nouri la-dan ? Sa la pa démokratik in n’afèr konmsa ! Alé ! mi kite azot rofléshi la dsi é ni artrouv pli d’van. Sipétadyé.