Nana dé-troi zour, lété la fèt nasyonal madagascar : bann malgash La Rénion la fé la fèt. Paul Vergès, pou son par, la parti Madagascar : Gouvèrnman banna la invit ali la-ba pou romèt ali in dékorasyon. Sa pou romèrsyé La Rénion pou tout sak ni fé pou èd so péi-la, kan li néna in difikilté sérié. Aprésa, lo prézidan Madagascar la resoi ali konm i fé pou in l’invité d’honèr.

Lé ga ! Kèl shomin nou la fine fé ! Koméla, ni sèy fé in manyèr pou travay avèk bann péi lé koté nou : ni vé tout i profit so travay nou va fé ansanm. Nou vé tourn lo do la kolonyalizasion pou mèt anlèr lo ko-dévlopman.

Moin lé kontan sa i ariv kan Paul Vergès, lé prézidan la Rézion, akoz li mèm, konm tout bann kominis épi tout demoune bone volonté, la touzour été solidèr avèk Madagascar. Lamitié rant bann pèp sa in nafèr lé inportan sa ! Épi, oubli pa, na lo san banna i koul dann nout vène. Sa i kont sa !

Soman, ni komans zis travay ansanm dann réspé inn pou l’ot. Nou la anbèk dann shémin l’antant, i fo ni kontinyé dann shémin-la.

Justin