Nout dévlopman : Kossa i pé sov anou si la pa la formasion ?

29 novanm 2007, sanm Justin

Nana péi, é péi : sak lé gran épi sak lé pti, sak nana in bon pé rishès natirèl épi sak la poin in bon pé, sak nana in bon pé dmoun épi sak nana in pti pé. Kan ou rogard dsi la kart, wi oi bien lé konm sa ! Antansion, si i rogard pa bien konm k’i fo lé riskab pa oir déssèrtin. An kontrèr nana d’ot lé si tèlman gran i diré zot la kart zot zèl pou pran tout lo plas lavé pou pran.

Anou, dann tousala : nou lé pti, sa lé sir, nou la poin lor, lo fèr, larzan, pétrol... sa lé sir galman. Issi demoun lé foulé, la poin doutans. Alors, kossa nou va fé, kèl kalité dévlopman nou la bézoin épi kissa va fé sa, avèk kissa nou va fé sa ? Lé vré, nou nana kant mèm in pé la rishès - nou nora lokazion pou antrokozé ! - mé, nou nana sirtou in bon pé dmoun déssi nout ti galé.

Sé so moun-la va dévlop lo péi si lékol i fé konm i fo, si i amontr azot pou antroprann, fé travay la tète pou trouv zafèr la pankor trouvé, sansa aranz ankor in pé sak la fine trouvé, épi débisk bann zènmi kan nana pou débiské... lo rès sé in nafèr d’transpirasion. Mé lo soubasman nout dévlopman, sé la formasion : Kossa i pé sov anou si la pa sa ?

Justin

Signaler un contenu

Inn modékri, inn ti lavi, inn komantèr ?

Bann modékri andann forom

29 novanm 2007, 07:56

Ou fé ri Justin.
Ou parle la formation et après, coça y devien le bann marmaille l’a gaingne tire in diplome ? Li lé obligé allé travaille dans la fré ! A coze ? Parce que le z’homme polititique la Rénion c’est domoun y cose et y fé po zot famill’ en promié.
Ma donn à ou 2 l’exemple :
- mon promié garçon la travay jisqu’à licence, plis in spécialisation football pou f’ l’entréner. Solmen, qui ça y pren pou form ti créole ? Zoreil !
Résultat : li té obligé passe concours la police pou allé travail dans la fré Paris.
Deuxième l’exemple :
- mon déxième garçon la fé in BTS Génie Civil. Li la doman in travail si la route des Tamarins l’hèr que té ça commencé.
La Région l’a embauche c’est pas combien cadres zoreil, et au bout di compte, exactement in an après, jour pour jour, le responsable, in décertain m. Cadet si mi trompe pas, la répon à li la pi la place. Pourtan gouvernmen té y pouss la rou pou la proférence régionale !
Li la fé comme son frère, li la passe concours la police pou allé mange la neige.
Alorsse Justin, ma di a ou in bon afèr, arrête coze rien que pou fé le vent.
Mi conné çaq mi dit y fera pas plésir journal Témoignages et nora que pé d’chance paraître, mais zot que va lire, fé in pé zot l’xamen d’concience.
- 4 désanm 2007, 16:25, sanm cire
  
  Par cont’ justin moun , la post avant moinla , néna rézon .
  Moin , moin la prépare in license en informatique dann la fré apré mon license , mi dit qu’en rentran la reynion , sat moin la apprenn’ va serve pou ( san etre prétencié non-pli ) in l’entreprize la reynion .Au bout di compte apré plis de 3 ans a fér 2,3 travail au noir ( dann mon tete moin té dit qué lé mieux que rien ) é ben moin la retourne dann la fré .
  Mé quan meme mi désepere pa , in jour ma revni mé sete foi , ma cree mon propre travail ( en espérant va laisse a moin in pti place pou acoquillé ).