Témoignages - Journal fondé le 5 mai 1944
par le Dr Raymond Vergès

Accueil > Politique

An parlan la kiltir rényonèz.

An parlan d’ Paul Vergès épi d’Simon Lagarrigue,

lundi 21 novembre 2022, par Justin


Mézami dann week-end mwin l’avé la shanss assist dë zomaj, inn dann la komine Sindni, in n’ote dann la komine Sin-Pyèr. Sin-Dni lété in lévokassion la vi Paul Vergès dsu la plass i porte son nom koméla dann santre-vil .Dimansh pou lanivèrsèr Simon Lagarrigue dann in lokal la Ravine dé kabri Sin-Pyèr.


In om politik épi in maloyèr, dë pèrsone bien diféran l’inn par rapor a l’ote sof ké lé dé lété militan dann parti kominis rényoné, sof ké inn é l’ote la fé la prizon pou défande zot zidé.Astèr si ni vé rode in vré fil rouj rante inn épi l’ote, mi panss sé dann domène la kiltir k’i fo alé rode so fil la.

Mi rapèl in zour Paul Vèrgès té apré ésplike anou léfé téi fé kan li té antande maloya dann la kanpagn laba sintandré... In son sirman mwin l’avé pankor antande dann tan-la é mèm si mwin l’avé antande ali lété pa sir mwin noré sézi linportanss lo son-la l’avé dann noute égzistanss konm pèp rényoné.

Mi panss pa si Simon l’avé tro poz ali késtyon dsu maloya,kan li téi antande sa dopi étan pti-,dopi étan bébé. Mi koné pa si Simon, étan pti l’avé konssyans linportanss kékshoz natirèl pou li konm maloya lété si inportan ké sa pou la formassion noute pèp rényoné.

Paul Vergès lété in prékursèr a popré dann toute issi la Rényon é biensir galman dann domènn la kiltir rényonèz é mi panss sèryèzman dann son konba li téi fé la par rante sak lé inportan épi sak lé moinss é mwin lé siréssèrtin lo maloya téi tien in grande plass dann la konstruksyon lo pèp rényoné épi son konsyanss li lété in pèp.

Sirésèrtin mé zami néna in kantité zéléman dann noute kiltir, son bande konpozante konm i di sa si zot i vé, mé koman toussala i goupiye lé z’inn avèk lé zot ? mi koné pa tro bien oziss, mé sak lé sir sé ké zot i goupiye bien lé z’inn avèk lé zot konm in siman noute pèp rényoné.

Fil rouj la kiltir. A bon ékoutèr, alu.


Un message, un commentaire ?

signaler contenu

Plan


Facebook Twitter Linkedin Google plus