Lo la plui i sort pa la mèr pou mont la montagn. Sa lé bien vré ! Lé pli fasil naj dann sans lo kouran n’lo plito k’dann sans kontrèr. Pli difisil i vé pa dir lé pa posib ! Nou pë koz sü léspor solman i vo mié nou koz pa sü in nafèr nou koné pa. Moin té pa shanpion dï mond, sré t’i pou shaboul galé.
So pti kozman sé sü in nafèr nï koné bien akoz nï viv avèk sa, ni viv an parmi toultan, dépi nou lé éné ziska nou va fèrm nout zié. Tazantan, malérèzman,nou pran lo kouran, tazantan nou sava dann sans kontrèr. Ala nout késtion : koman i fé pou èt pou la zistis, dann in mond nana linzistis partou ousa ou sava ? In liv i sifi pa pou di : solman in liv ? dabor inn, mi vien pa bou ékri épï si i fo ékri in liv, sa i vé dir lo problèm lé tro konpliké pou trouv in solision sinp, klèr, i ginye pa di lé fo.

Si nou koz sï lo rap lété marké dan nout zournal, i fo nou di kèl koté i lé la zistis, kèl koté i lé linzistis. Koté lo rapèr lavé asé fé kal alï toultan par la polis ? Akoz son figir i plé pé pa toulmoun. Koté la polis lé fatigé rant dann in trin fou, konm Axel Gauvin i ékri dann in roman ? I di azot aplik in bann loi, tazantan, souvan dé foi, lé kontrofé vik lé pa fé pou défann bann ti-kolon*, solman pou fé ginye a zot, zot rès azot trankil,avèk doulèr sansa san doulèr.
"La loi est l’expression de la volonté générale"*:sak i kroi pèr noèl i lèv lo doi ? moin non, alor tazantan ! Kèl koté ankor i lé linzistis ? koté tout ti-kolon. Lé bien vré ! solman lo rapèr** avèk son bann dalon, la polis avèk son bann kolèg, bann pti lantropriz, pti partikilié, bann mou na poin boulo, bann madam, bann jenn, bann zanfan, bann plantèrkonsomatèr étsétéra-étsétéra, la ké lo ra : la pa tousala lo bann ti-kolon nout sosiété ? La pa toulmoun i san z’atou la pa dann zot min ? Mi oi, moin la pou anbrouye zot tèt ! la mienn osi lé anbrouyé ! M’arèt tèr-la solman si zot lé konm moin, moin lé sïr sa i tourn dann zot tèt toultan, toultan, toultan mem.

Justin

* Nou va arkoz la dsï. Si zot i vé bien. ** « Il se croyait libre sur un fil d’acier quand tout l’équilibre tient du balancier ». Paroles d’Aragon ; musique de Jean Ferrat.