Na dé sèrtin moun i di : « Akoz mèt kréol lékol ? Sa i ansèrv pa arien. Nï koné sa dëpï kaziman dann vant nout momon ». Ben alor, akoz i amontr l’anglé bann ti-zanglé ? Shinoi bann ti-shinoi ? Kréol bann ti-séshéloi ?

Na in loi pou bann lang, sof pou kréol La Rénion. Moin Justin, mi pë pa èt dakor avèk sa. Mi kass mon tèt, mi gingn pa konprann koman lo moun (dé sèrtin !) i nienbou panss in n’afèr konmsa.
Na in pë i di, na dmoun i vë sïprime fransé dann lékol : Kissa sa ? Moin, pou mon par, mi koné pa s’moun-la.
Kontrèr, i fo bien amontr kréol pou bien amontr fransé. Dann la loi La Franss, i rokoné lo kréol konm lang réjional, lo fransé sé la lang nasional. Sa mèm nï vë, dann lékol konm dan la vi.

Fransé, sa lé bon pou nou ! Kréol, sa lé bon pou nou ! D’ot lang ankor : l’anglé, lë shinoi, lë tamoul, l’arab sa lé bon pou nou. Inn i anpèsh pa l’ot. Alon rouvèr nout léspri plito k’fèrmé.

Justin