Matante Zélida la ékrir Justin :
Mon shèr nové, mon spès salté,
Ou va dir mi èm gaté... kossa mi antann dir ? Sa la pa la grèl in n’afèr konmsa ! I prétan dir, madanm avèk méssyé linèsko la trouv moiyin d’mète maloya konm Patrimoine mondyal. Moin lé pa dakor, pars, pou mon par, mi èm lo séga, son mizik, son parol, son kadans byin kadansé. La poin pou manké, la poin pou trok lo pa. Maloya, sa in koméraz bann rouj de fon ankor sa ! Mi pé dir aou, kan linésko i donn kèkshoz in klasman konmsa, sa i vé dir lo z’afèr lé an danzé, lé an voi disparisyon. L’èr-la, nout séga lé kranèr vèy pa ! Pran sa pou toi !

Justin la fé pou répons :
Mon vyé matante k’i koz touzour la boush rouvèr... Mi konpran pa pou kossa vi vé fé batay séga avèk maloya. Dann in pyès larzan, nana in koté pil, nana in koté fas. Lontan té i di in koté tète é in koté flèr. Ou i pé pa garde inn épi zète l’ote ! Inn avèk l’ote i marsh ansanm. Alor, kan séga lé anlèr, maloya lé kontan, maloya lé fyèr. Kan so kou issi, maloya lé anlèr, séga lé kontan, séga lé fyèr. Epi, m’a dir aou in n’afèr : ni inn, ni l’ote lé an danzé, tou l’tan k’bann zouar va konète zoué, bann parolyé va konète fé zoli parol… é toultan k’inn konm l’ote, pou byin ténir doboute, va plonz z’ot rasine dann tréfon nout listoir. Ni inn, ni l’ote lé riskab afayir !

Lésplikasyon in-dé pti mo

Afayir : rante an féblès

Sa la pa la grèl : sa la pa la shyas

In koté tète é in koté flèr : bann fran CFA té konm sa. Olèrk di "pil" sinon "fas", demoun té i di "tète" sansa "flèr" pou kass lo kan dann fotbal

In zouar : in mizisyin

In parolyé : sé li k’i fé bann parol