Témoignages

NAPWIN PERSONN PO PLER PO OU !

Pol — 2020-12-31T04:15:11Z

Démilvin i pli balo. Ouf ! Békali, bon débara , té pliské tan. A antann lo sharèt kozman li gingn tou lé zour, lé sir na pwin personn isi po argrèt a li. Domaz li napwin zorèy . Domaz galman na pwin in lwa po obliz a li, arminn ék li dann son balo , tout' son zordir, arkomansé par son kovid.

Antouka, nou la viv in vré lané la mok. In lané shagrin, la solitid po bon pé, la pèr , la kolèr minm osi, in lané dézéspérans. Napwin in katégori d'moun, la pa gingn galo lo kou . Arzout éksa, lo kortèz dézagréman li la fouti partou. Li la mèt an désidsou, nout sosyété, nout léstil viv kréol, ék son lintèrdiksyion parsi é son léstop parla. Idi minm, li la rann inpé maboul.

Li la yinbou ziska mét in sanboulaz pa posib dann kalandryé politik Lo Parti ! Kittabwèt, va ! Pli for Debré ék lo préfé Perreau Pradier, dann zané 60 !

Té pa in tronpaz , démilvin la pa fé dann la rigolozi. Sélman, personn noré maziné, parékzanp, k'li noré ral ék li, tann d' kamarad , zarboutan Lo Parti , konm Simon Lagarrigue, Bruny Payet Lulu Biendinger, Brigitte Croisier, Marylène Berne, mé dot' ankor osi. Promyé fwa mi wa in zafèr konmsa. Sitélman ,mwin néna in gro pansé po tousa kamarad la désot la vi. Mi ésay mazine koman i dwa èt, la o ,si tousala la arzwin Paul vréman.

Antouka, shap a ou démilvin . Napwin personn isi po plèr po ou. Riskab minm , pétèt ou la rann pli for ankor, in bonpé kantité domoun.

Pol

Mi arzwin Justin : la glwar, la limyèr i fé flansh la mémwar

Pol — 2020-08-21T21:50:00Z

Dann Témoignages zédi, Justin i ékri « La mémoir i sava, kan la gloir i ariv ». Sa in kozman lé zoli, lé bèl. Foutor, va ! Malérèzman, mézami, li lé tro souvan vré do vré , dann not sosyété . Po byin armont son propo, Justin i arkont dann son kozman, lo ka in moun la nyabou pass Mèr dann son komine, é koman li la trouv manir invant in zistwar, in pasé la mizèr , po li éfas lo réalité vré.

Lo moun la lé for, mé sa sétin ka parmi tandot. Néna bonpé komsa. Mwin mi koné minm, néna la guingn dirék lazéymèr ! Zot i koné pi ousa zot i sort, ni kisa la fé a zot. La pa ryink in fwa, mwin la fine war sa. Mwin lé pa tousél dayèr.

Zistéman, an parlandsa, lokazyon i fé pans amwin lédito Témoignages, lo 20 mwa dérnyé, té i arzwin inpé kozman Justin. In lédito té i poz in réfléksyon « Où sont les communistes ? ». Sa té in bon késtyonman : Lévré, ousa i lé zordi lo takon gran kominis, lo Parti ék son bann militant la formé ? Kél bor i lé lo bann zéli zordi, la grandi, la komans zot karyèr dann PCR ?

Mwin mi trouv inpé d'répons dann kozman Justin. Bonpé la perd volontèrman la mémwar, kan la rant dann la limyèr, la trouv in swadizan la glwar épisa la perd shomin.

Pol

Lé pli fasil sanz kouran in flèv kin mantalité

Pol — 2020-05-11T03:52:26Z

In vyé provèrb fransé i di « A quelque chose, malheur est bon ». Si mi tronp pa mwin, sa i vé dir an gro : Dann in malèr, in lévènman pénib dan la vi, néna touzour kéksoz lé bon, lé pozitif po tiré dédan. Sétin pé po sa minm dayèr, mwin la artrouv amwin anparmi lo moun té ki kraw, dir konm fèr, ké lo kosmar nou viv ék lo pandémi kovid-19 noré anserv anou d'leson , noré tir inpé mwazi dann nout servèl, norété in lokazyon po réflési po dovré, armèt sakinn dénou an koz, war la vi in not manir . Mi arzout pa plis, zot i konpran kosa mi antan parla.

Sépa in mantri, mwin lavé vréman léspwar. Mé oki ! Zordi mwé lé blizé arkonèt , mon léspwar la fonn konm dobèr dann pwalon d'si dofé. Lo kovid 19 la gingné, li la yinbou fé ésploz not sosyété, ék not konplisité, not kouyonis. Lé domaz , konm in bann grinn, nou la tonm dan l'pano, dan lo pyèz. Olèrk asèy zwé groupé dann lintéré lo pèp, bonpé la profèr lo samayaz, rod larlik, rod lo pou dan la tèt la mori, ziska abriti lo moun. Sakinn i vé armont séli k'néna plis dann lo kalbass, séli lo pli gran zéspèr, lo pli gran éspésyalis. Li koné tout'. Té falé fési, té falé fésa, fopa fé konmsi, mé fofé konmsa, walali walala. Odyab linité, odyab lo rasanmman nout tout ansanm . Nou artouvv anou an zékli. Nou pé ét fyèr.

Pandanstan, plis 26 mil personn la désot la vi, nout pèp lé an soufrans, nout péi lé aznou, lé an langouti. Viv lo dékonfinasyon, viv la Rényon, viv la Frans. Mé la pa bézwin awar in malèt bagaz syanspo, ou dé basho plis 15 po konprann lo pokwa ék lo koman lo batay, lo samayaz pintad. Antouka sépa in katédral gran kosèr va fé disparèt lo kovid 19 , é va fé avans nout péi.
Dann tousa, mézami, mwinm nora konpri omwin in soz, po drové : Lé pli fasil sanz kouran in flèv kin mantalité. Kittabwèt va !

Pol

Mwa d'Mé lé la, demilvin i filosh !

Pol — 2020-04-30T06:41:55Z

Mi koné pa si toulmoun i réaliz : lo mwa d'Mé lé déza la, wé oté ! San aryin konprann. Dayèr, dan lé o, la fré i komans byin koké. Lo moun i ral déza kouvert', in pé la sort' boné, san konté lo maxk korona. Sa i vé dir osi, lané démilvin lé parti, li filosh konm sépa kwé, pli vit' zéklèr talèr. Lévré osi, ék tout' lo bann zafèr ki éspas, ki tonm d'si nout tèt, konm lo modi kovid ék lo konfinasyon, napi in vré nosyon lo tan. Lo tan i shap, i foulkan sank nou apérswa.

Dirk néna ankor détraw zour d'sa, la Rényon té an kanpagn promyé raoun zéléksyon lo mèr, lo déziém la réspir korona. Walala astèr, mwa d'Mé i aminn son figir. Foutor va ! A kondisyon napwin in lagravman, dan détraw sominn, koup kann i sar lévé, épi zot va war mézami, nou nora minm pwin lo tan bat' lo zyé, lo noél, zour d'lan i sora fine débarké. Epi tanto apré, ankor zéléksyion. Mé obout' tousa, nout' tout' nora souk in lané déplis, rotromandi in lané po viv, an mwin, in raptisi d'in nan. Fo pa bli sa. Mé kwé nou pé fé ? Lé konmsa.

Po anrovnir mwa d'Mé, lo promyé sé lo fèt travay. Mé mondyé, kél fèt travay sétané, ék in pép i koné pa kosa domin i sora fé, néna kapkap, lé an konfinasyon, é in péi dann lagoni ? Mé zistéman, sé pétèt la, in bon rézon po nou awar in limazinasyon ankor pli for po bann travayèr tout' bor, é par komansé po sak i artrouv azot dann lokisité forsé ou pa. Antouka, bon kouraz azot.

Solidarité, nout' tout' ansanm avèk. Sésa lésansyél. Innti parantèz : Démerd po lo migué-kloshèt zorey. Na war sa lané proshinn. Mi swèt donk pa bon fèt personn, mé mi di azot, asèy kanminm pass in bon zourné promyé Mé. Epi sirtou rèt la kaz.

Pol

Balon va roulé, va roulé … va roul dann filé !

Pol — 2020-01-04T07:34:39Z

In fwa, lépa koutimans, alon koz inkou fotbal. Sé, zordi minm, samdi prémidi, lékip Sinpir i krwaz bobok ék Nior, in lékip déor laba, péi la fré, po 32 e d'final koup dé Frans. In shoz lésir omwin, balon va roulé, va roulé, va roul' dann filé. Mé dann kél koté filé ? Sa sétin not zistwar. I fodra aspèr lo kou d'siflèt final po war.

Parlfèt, si Sinpir la pass in kal lo bann goyav dé Frans, i sora promyé fwa, kin lékip péi i grinp an 16 e d'final. Mé, désertin i di ki fopa nou rèv tro, akoz askipré lo bann goyav lé kosto, é néna bonpé lo grin. Mé konmdi an fotbal, balon lé ron !

Antouka, samdi prémidi, konm in paké an parmi nou, mi sora dovan télé po gèt koman lo zafèr i tourn, minm si néna kék zané mi sarpi léstad po war matsh fotbal. Bin wé, asak lépok, son fantézi. Dann tan avan, mwin té rat'pa sa po aryin. Dayèr, dovinn kél lékip té mon proféré ? Bin, té Sinpir minm ! Si télman mi koné pa dann kél gradin léstad la Rényon, mwin la pa poz mon fès, po gét Sinpièrwaz zwé balon. Mé dann tan la, fotbal péi, té kékshoz.

Dayèr, mwin lé nostalzik lo tan la , Sinpiérwaz zané 60 èk : Anani, Bobat, Piconat, Sparton, Patel, Tilmar… Mé pa sélman sa. Néna zané 70 osi. Mi wa ankor, konmsi lété yir, koufran Noél Babazy, lo kroshé gosh Michel Volnay, té ki fé tranm filé, ék zot bann dalon, Ah-Fat, Bonnefond, Picardo, Chane-Teng, Doro ék dot ankor. Sa, té lo bon tan fotbal !

In shoz ankor. Sinpir ki ginye ou ki perd, mwin nora in pansé po Julien Ramin, inn nout' kamarad , in gran misyé la désot la vi, lo 17 oktob 2O18 . Mi koné li té lo promyé gran siportèr Sinpiérwaz, mé li té osi lo Présidan lékip, pandan kék zané. Alé Sinpir !

Pol

Bonerez zot tout' !

Pol — 2019-12-30T07:19:33Z

Mi aprann pa zot aryin, lé pa in sirpriz. Noél la fini, démil-disnèf i pli goni, li la fine poz son démisyion, li rann son lésharp. Merkrodi tanto, zour d'lan, son siksésèr, démil-vin, i ropran lo manèt, po in lané d'mandatir. Na pwin d'votaz po sa. Lé komsa... Ladsi, napwin aryin a rodir, sa sé pa in zéleksyion lo mèr ék kandida par balo.

Tousala lé byin bel, mé kosa i atann a nou ? Pou lèr, personn i koné pa tro. Mé mwin na kom lo santiman, lané la, i sora pa d'la rigolozi. Lé plis ké riskab ké nou va gout' ankor bouton.

Po sa minm minm, mi krwa ki fodré anou in bon zilé, in bon bouklyé, mi vé dir par la, in bon santé, bonpé kouraz ék lénérzi a gogo, po nou ginye afront' a li. Antouka, mézami, sé tout' sak mi souèt a zot po domin.

Epi, kom nou néna ankor lo drwa d'révé, bin alon aséy rév in pé. Sa i fé pa d'mal. Alé, bonéréz, zot tout'.

Pol

Kominis, i tras shomin, lézot i bèk anndan apré !

Pol — 2019-05-18T03:42:07Z

Eksépté inndé sérvo moulalé i vé ariyn konprann, lé arkoni k'lo PCR i fé parti Listwar la Rényon, pou son konba, ék Paul Vergès é son lantouraz. Dann lo prop listwar PCR li minm, néna in shoz an parmi dot, i rosort é ki fo arkonét, sék kominis té pionyé pou ouvèr shomin la Rényon, dann bonpé domèn , pou lémansipasyon nout pép.

Kant an Mé 1959, trézan apré la lwa départmantalizasyon, Paul Vérgès ék lézot dirizan kominis, i wa la Rényon i avans pa konm i fo, ék zot i désid fonn lo PCR, zot i armont la, in sértin kouraz, mé osi, in matirité politik lapa ariyn. Lo PCR i vé dir alor, kominis la Rényon, i vé pi siouplé, napwin bézwin lézot i désid pou li, é pou nout pép, laba Paris. Rotromandi, lo Rényoné lé pa pli kouyon kin not, li lé kapab désid kosa lé bon pou son Péi. Li la pa bézwin baton gran-papa Golwa. So désizyon, sé lo débi din paz Listwar la Rényon dann son globalité.

Pou biyn armont sak mi di, alon prann in légzan sélman, in légzanp prési, konm lo ka, bann parti politik Rényoné. Pandan dézané akonté lo kréasyon PCR, zadvérsèr kominis, Michel Debré ék son klik, Virapoullé apré ék lézot, lakiz lo PCR ék Paul Vergès dét ozord Moscou, sou prétéx, la Parti té pi in fédérasyon PCF. Ziska lanplasman lo stand zournal Témoignages dann la Fét l'Humanité, La Courneuve, té in swadizan prév pou zot, pou tonm d'si l'do PCR, pou aséy kas son rin. Mi arzout pa plis, noré tro pou di.

Epi kosa nou la vi : Wilfrid Bertile, sosyalis, i désid fé son prop parti, i apél lo PSIR, mwa doktob 1972. JC Fruteau i fé lé siynn osi, lo MSR an 1974 . Apré, sé Pierre Lagourgue, i kré son mouvman, UNIR an 1976 , épisa lo FRA, an 1986 ék TAK. Ziska J-Paul Virapoullé i désid li osi, fonn astèr son nafèr, i apél lo CAR. Mé, lété konm Ki di, in kourandèr, avan li mèt an plas la Relève, an 1998. Fopa nou bli galman, an 1981, Camille Sudre i mont Freedom, mé osi Axel Kichenin ék son mouvman progrésis i wa lo zour an 1982. Mi pé kontinyé konmsa ankor lontan. .. Fodir, akonté 1981, mé sirtou dopi 10-15 zan, lo kantité i ésploz..

Zordi, tout parti ou mouvman politik, isi, lé otonom. Anpliskésa, konm mi viyin di, la miltipli konm tipin. Astèr, dann sak kwin d'rout, nou trouv in mouvman politik rényoné. Si télman, i koné pi lo kont. Lévré inpé i vo sak i vo, i presh zis pou son p'ti shapél kominal. Mé sa i vé dir, sak i vé dir. Lo PCR la vi klèr promyé. Li la tras shomin, lézot la bék anndan aprè. Konm dabidid.
Apré lo pirataz zidé PCR, sa osi mwin té vé di, lokasyon swasantana La Parti.

Pol

Swasantan d'la parti kan napi, na ankor

Pol — 2019-05-10T03:44:59Z

Lo 18 Mé tanto, La Parti va fèt son swansantyèm anivérsèr. Lé pa aryin ! Néna in shanson Tino, tout l'moun i koné i di « La vi i komans a 60 tan ». Si nou swiv so kozman, sa i voudré dir, bann i lèv, i dor, i pri bondyé pou PCR i disparèt, ébin mon kamarad, zot néna ankor inndé névén pou fé.

In parantéz, apropo lo PCR. Pou bann zinn i koné pa, mi di éksépré : « La Parti », akoz, sa sé nout listwar. Dann tan avan, nout zéné, nout bann vyé kamarad, té i di pa, « Le Parti ou Lo Parti », zot té i di : La Parti. Dayèr, ziska zordi, néna ankor inndé zansyin, i kontini anploy so minm zésprésyon. Mérsi, azot.

Antouka, lo PCR, la komans byin an Mé 1959. Dézané é dézané d'konba ankré zordi dann listwar la Rényon : konba kont la frod, la vyolans, pou la liberté désprésyon, pou in vré démokrasi, pou lo réspé nout lidantité, nout rényionité, nout maloya, nout lang kréol, pou lémansipasyon nout pép… Pou légalité sosyal, lo dévlopman nout péi, lo drwa désid nouminm sak lé bon pou nout pép… Etc. Mé tousa, té pa san konsékans. Bonpé militan la péy lo pri for, bonpé dirizan osi, Paul Vergès an parmi, la zol baro 59 pou bonpé, la mor pou dot. Malgré sa, La Parti la pa largé, lo pép la tyinbo dobout ansanm. Lo sél bit, nout zadvérsèr, té antér lo PCR.

Dayèr, mi koné pi konbyin d'fwa, mwin la lir ou mwin latandi, dopi dann tan Dobré ziska na pwin lontan, kozman i di, PCR la fini, PCR lé mor, sé la fin lo PCR, kominis napi, etc, patati, patata. Rotromandi, la Parti la fine awar drwa in takon ék in paké d'zanterman ! Lo problèm sék, la fine antér a li pli d'sinkant fwa, mé malgré sa, li bouz ankor. Lo pli komik, sék anparmi lo bann la sélèb lo finéray nout Parti, bonpé la dispraèt politikman, épi dot la disparèt pou dovré parkoté lot bor.

Non, La Parti, lé pa mor. Pou prèv, Julie Pontalba, in zinn madam PCR, lé kandidat zéléksyon éropéinn 26 Mé , an 6e plas d'si la lis PCF .-La pa tout, parkoté Sint-Mari, kominis i lév an poudiak. Konm ki diré : Kan zot i kraw napi, na ankor !

Pol

Julie Pontalba, interdi télé !

Pol — 2019-04-29T04:15:56Z

Konm bonpé mon kamarad, mwin té samdi Sal Kandin, pou akout Julie Pontalba, nout kandida kominis zéropéinn, d'si la lis PCF ék Ian Brossat. Mwin lapa argrété, mézami, mwin la sort la, ablok.

An parmi bann zintervénan, inn la di, néna kékshoz lé antrin éspasé, mi kraw k'li la pwin tor, kan nou wa tousa soutyin i arriv inn déryèr lot. Binsir, i fo sirtou pa, nou kontant éksa, épi nou pran sa pou larzan kontan. Sirtou pa. Néna ankor travay pou fé, si nou vé armont kosa ni shof. Mé pou an rovnird'si lo métinng li minm, néna o mwin dé shoz la toush a mwin, mé osi tout l'moun téla, mi krwa.

Lo pwin politik inportan, lélé byinsir, lintèrvansyon Ian Brossar, par vizyokonférans. In moush té vol pa, oté, pou akout a li kozé. In kozman la mark nout tout. La marké osi, kan pou fini, li la di, li lé présé atrouv nout kamarad koté li, laba d'si lo ban lasanblé Strabourg. I fé sho dann kèr. Mé sa, i dépann osi, bonpé d'nou.

Lot pwin for, ranpli d'zémosyon, té lo difisyon o débi minm, in morso lo fim ou dokimantér : « Maloya pou la Liberté » , ki rotras lo sézour Georges Marchais, dann nout péi, an Avril 79, dé mwa avan promyé zéléksyon éropéinn. Mon kamarad, sa sét'in nafèr. Frison i lév partou, d'si out kor, kan ou gét sa, kan ou akout Paul Vergès ék Georges Marchais, kan ou wa lo pép la Rényon dobout.

Sa i donn a mwin lokasyon fé in romark. Samdi dernyé, dann in modékri, mwin lavé rapél koman an 79, pou zéropéinn, Paul Vergès navé pwin drwa l'ORF . La fali ali, fé plis 10 mil kilomét, pou alé koz dé ou traw minit, dann télé an Frans, dési lo sor nout péi, la Rényon.

Karantan aprè, nou lé an kanpagn zéropéinn, é ziskalèr, Julie Pontalba, kandida nout Parti, napwin draw pass télé. Pou koué ? Akoz inpé néna pli gro tèt ? Talèr riskab konm Paul Vergès an Mé 79, i fodra, él osi, i sot la mér, pou alé koz la Rényion, nout péi, dé minit, dann télé la Frans. Konm noré di Georges Marchais : Sét'in véritab éskandal !

Pol

Lo 26 Mé, nou vot pou Ian Brossat ék Julie Pontalba. Alon di partou !

Pol — 2019-04-27T01:04:59Z

Dann in mwa, lo 26 Mé, sé zéléksyon éropéinn. Néna karantan sétané, nou la vot promyé fwa pou parlman lérop. Sété lo 10 zyin 1979. In zéleksyon, ék Paul Vergès, la mark in tournan dann Listwar la Rényon ék Lérop.
Pou byin konpran, innti rapél : nou lé donk an 79, Giscard d'Estaing lé Présidan la Répiblik, koté li, lo promyé minis, Raymond Barre. Isi, la Rényon, an parmi lé trwa dépité, nou néna Jean Fontaine ék Michel Debré, dé gran modél de démokrati ! Mé pa ryinksa, koté l'ORTF barashwa, néna osi Vincent Dolor ! Lo total ék lo kapital ! Initil dir azot koman kominis lé trété, li lé konsidéré konm lo dyab. PCR, Paul Vergès na pwin drwa koz dann radyo, ni pass dann télé Debré.

Epi, alala ! Kouran Avril ou débi Mé, lo nouvél i tonm : Paul Vergès lé kandida d'si la lis zéropéinn PCF ék Georges Marchais, an 4e plas. La drwat Debré ék l'ORTF i transpir syèr frwad, kominis ék démokrat i wa, an kontrèr, in léspwar pou lo pép Rényoné. Nou lé zédi 31 Mé 79, dann télé an Frans, difizé par obligasyon isi la Rényon, Paul Vergès i rakont koman li la fé plis 10 mil kilomét pou koz dé minit, télé laba, akoz dann son péi, la Rénion, li lé interdi ! Lo vérité, lo skandal, i pét o gran zour. Sé lo promyé fwa osi, Rényoné i wa, i antan Paul Vergès dann télé !

Lo 10 zyin, lo list PCF-PCR lé an tèt la Rényon, ansanm lo rézilta la Frans, Paul Vergès lé éli dépité éropéin. Sé lo pwin d'dépar din zistwar politik ant la Rényon é Lérop , ék rokonésans lo spésifisité nout péi, avék lo travay fé par Paul, é rokoni par toul moun, zordi ankor. Episa, ropri par Elie Hoarau, answit.
40 tan aprè zéléksyon Paul Vergès, listwar i vé k'zordi Julie Pontalba lé 6e d'si lo lis éropéinn PCF ék Ian Brossat, pou kontinyé lo konba nout kamarad é pou fé avans la Rényon. Alon ansanm donn a él in kou d'min. Alon di partou !

Pol