Minisipal 2020 o por, mon langazman dann in lékip otour inn kandidat

Stéphane Marcy — 2020-03-07T05:01:14Z

Stéphane Marcy

Koman rényoné la viv léléksyon obama ?
An 2008, la plipar lavé vibré dovan joli zafèr la, in lémansipasyon pou la roprézantasyon tout bann konpozant dann in sosyété : in promyé prézidan amérikin nwar.
Koman nou fé pou akord anou lo drwa viv lo mèm lémosyon mé antank aktèr lémansipasyon ?

Dann lèr 2020 la, i pé konté lo nonm bann fanm la fini rant mèr in komine La Rényon. Antouka, na pwin okin fanm la été mèr o Por, in komine i sava dési son 125 an.
Touzour an 2020, i fé plid 350 an rényoné i ékzis, nou la zamé akord nout konfyans in fanm nwar pou rant mèr in komine.
2 posibilité : swa té krwa oubyin té vé fé krwar lo bann kandidat lété pa konpétant, swa la sosyété lété pa paré.
I tonm byin, sét ané nana inn kandidat plis ké konpétant kiswa an lintélizans émosyonèl, kiswa an konpétans politik : Firose Gador, portwaz i abit dann Por (!), i sort dann in milyé sosyal i di lé « défavorizé », travayèz sosyal, fidèl dann son bann valèr politik, a 42 zan, 6 zané antank konséyèr minisipal, 6 zané antank 2e adjwint minisipal, 6 zané dann lopozisyon.

Nou lé an fas in fé istorik pou lémansipasyon. Sat i koné « la convergence des luttes » va war in krwazé somin ousa i trouv lavansé la plas bann fanm, lo drwa ét roprézanté pou domoun i sort dann bann milyé « défavorizé », lo drwa ét roprézanté pou tout kélkéswa son koulèr. Souvandéfwa, sé nout vot i pé fé ariv bann drwa la. Lariv lèr pou nout sosyété fé war li lé paré pou amén in not létap pou lémansipasyon an zénéral, pou done marmay bann modèl idantifikatwar, pou arét krwar sa lé rézèrvé pou lé zot, pou ét aktèr nout lémosyon.

É kom, byinsir, in moun i sifi pa, mwin la rankont dann lékip la, dot portwa i sort dann tout klas sosyal, in bann portwa i rokonét azot dan zot parkour la vi antank bénéfisyèr in politik portwaz édikativ, kiltirèl, émansipatris.
So bann portwa la koni kosa i lé rosovwar, i koné i fo rann pou la zénés, pou toulpé : Patrice Casimir, Afyfah Mlk, Miguel Santoulangue, Isabelle Erudel, David Titus, Marie Melchior, Willy Hagen, Sabrina Louise, Ricardo Jams, Yvan Dassy, Aureta Dobaria, Gregory René, Aliette Bernardin,…

Mèrsi Jean-Yves Langenier pou lénèrji li mét touléjour pou soutyin anou, pou akonpayn anou. In gran pérsonaj par son léfikasité dann lumilité.

* Mèrsi mon fra Teddy Aky, Lofrer Doloress, lotèr « La Richesse d'être pauvre » pou lélan li la doné lèrk li la dévlop lo konsép Lintélizans Émosyonèl, in zoutiy la éd amwin bonpé pou analiz nout sosyété, in zoutiy pou émansipé : http://lofrer.smg.re/

Stéphane Marcy

Stéphane Marcy est un jeune enseignant du Port. Il possède l'habilitation qui lui permet d'enseigner “la langue et la culture régionale”. Sportif de compétition, il est aussi un inlassable militant de la reconnaissance de l'identité réunionnaise. Il a écrit de nombreux textes en créole. En 2019, il est remarqué et surtout soutenu par l'opinion publique pour avoir été interpellé par un inspecteur sur le simple fait de s'être exprimé en créole dans une réunion.
C'est tout naturellement, qu'il a rejoint Firose Gador, tête de liste PCR, aux municipales de 2020 au Port.

Témoignages

Minisipal 2020 o por, mon langazman dann in lékip otour inn kandidat