Témoignages

L'IA sa lé danzéré sa ! Lé riskab prann anou an otaz !

Justin — 2026-06-08T20:05:00Z

Mézami mi rapèl lo tan nou téi koné fé gran-gran lopérassion : kissoi bann miltiplikassion plizyèr shif, kissoi bann divizion, kissoi mèm lo kalkil la rassine karé d'in nonb. Nou l'avé aprann lo téknik é avèk nout kapassité pèrsonnèl nou téi fé bann zopérassion bandé.

In zour l'ariv bann mashine pou kalkilé, mèm bann mashine minyatirizé. Zour-la nou la konprann té pa itil ranpli nout tète avèk bann tab miltiplikassion, kissoi divizyon, osinonsa kalkil bann rassine karé mèm kibik. La mashine a kalkil téi done anou lo rézilta an in rien d'tan, é san in érèr possib ;

In bon afèr ? Sirtou pou bann patro pars lété pi nésséssèr mète in kantoité d'moune pou fèr in n'afèr lété fini kourt pou fèr é sirtou té pa nésséssèr fé travaye demoune, pèye demoune pou fèr sa alé oir in pti mashine i pé ranplass plizyèr pèrssone.

Aprésa alon sote inpé lo bann zétap épi alon parl l'IA, lo famé intélizanss artifissyél. Li lé vaté so léspèss zafèr éli toussèl li i gingn fèr in ta d'zafèr an vitèss : talèr li va fèr in lartik pou mète dann zournal, talèr li va fé in kour filozofi, talèr sar pi nésséssèr kass son tète pou fé bann tavaye intéléktyèl ni fé dopi in b on koup de tan.

Bon sansa mové ? Dopi dé-troi z'an kan la sékssion kominiss sin-dni i réini l'avé touzour in sobatkoz dsi lo famé l'ia ziska ké li mète a égzisté pou vréman é li démontr toute son kapassité.. zordi nou lé dann in tranzission l'Ia i dovien plizanpli intélizan-ziska rézoude bann problèm pozé néna pliss in syèk é i trouv pa la solission… mé lo kpontrokou sé ké lo moune i vien mwinzanmwin intélizan.

Zordi in pé i rofléshi pou anpèsh l'IA fèr déssèrtènn shoz é lèss sa pou lo moune mé ni koné pa si in konvanssion konmsa i pé marshé… Néna i di mèm talèr nou sarpri an otaz par lintélizanss artyifissyèl é pa pli loin k'dann trépé d'tan… Mi di azot sa konmsa é mi obliz pa pèrsone kroir mé lé pou sa k'ni véra pa so tan-la.

A bon antandèr salu !

Justin

« Li la tonm dann in sak lo puss »

Justin — 2026-06-08T20:04:00Z

Mézami, mi panss zot la fine antann parl sak lo puss. Koméla sa lé rar mé lé pa di k'i rovien pa ; Antouléka dann in tan lé pa si loin ksa kan l'avé in kouran d'puss ébin mi pe dir azot sa lété kékshoz ébien dir pou débarass lo mond de sa.

Mi ve parl puss véra é sa lété in vré katastrof : sa téi ran t dann pyé, dsou la po, si tèlman ké momandoné marshé té in problèm… Si mi rapèl dann tan-la souvan défoi lo pyé té si tèlman déformé avèk plin plin ni d'puss ke marshé té dir. Alé la boutik in problèm.I paré ziska demoune lé mor avèk sa.

La ni parl puss an vré mé kom nou lé dann in kozman i fo ni pran lé shoz o figuiré é sa i vé dir in ta lannuiman konm lé pa possib i pé ziska ral aou dann in malizé é gate out vi karéman. E si wi rode in linséktisside pou sa, inpossib pou trouvé, ou lé mayé a-mor ;

Alé ! Mi kite azot rofléshir la dsi é ni retrouv pli dvan, sipétadyé.

Justin

Pou lédikassion in marmaye i fo tout in vilaz

Justin — 2026-06-07T20:08:00Z

Mézami mi koné pa si étan pti marmaye zot l'avé la shanss an avoir dann zot lanvironeman in vyé méssyé otroman in vyé madam téi gate azot dizon konm in gaté-pouri. Fouye in pé dann zot mémoir pou oir si zot l'avé pwin in vyé matant, in vyé tonton, sansa in vyé moune tou kour téi majine azot toultan épi l'avé touzour in ptite gatri pou zot lo pti gaté.

Mwin pèrsonèlman mwin l'avé so shanss-la é si tèlman la shanss mwin téi romarke mèm pa sak in pé la fé romark amwin pli tar dan ma vi bann vyé moune-la l'avé préféranss pou mwin. Lé drol mé kan lé konmsa ou sé lo dèrnyé pou romark sa. Pars l'amityé in vyé moune na pwin arien k'i bate sa an final de kont.

Sa lé pa in lamityé fé d'or é d'arjan mé in l'amityé pou bann kékshoz sinp : in poigné sriz kotlé, pou in pti patate griyé, pou in bout kann ou pou d'ot zafèr konmsa. Plizyèr foi dann mon vi mwin l'avé la shanss in vyéy pèrsone l'avé pran amwin an amityé é sa lété konm kékshoz étan marmaye mwin téi pé pa s'an passé.

A ! biensir mwin lété pa toussèl é pli tar mwin la gingn lokazyon diskskite avèk demoune mon vilaz é zot ossi zot la konète bann zavantir imène konmsa é kan mi trouv inn ou l'ote ni mank pa rapèl bann souvnir d'in rolassyon téi rann anou tann, téi rann anou bon, rann anou émab é sa sé bien kékshoz konm in jarlor an matyèr préssyèz.

Biensir toulmoune téi yèm pa mwin é téi trouv touzour lokazion fèr amwin la maliss mé zot i koné, mèm étan pti, sansa étan jenn la maliss i apèl rotour é mwin ossi konm tout mon bann kamarade nou téi trouv lokazyon pou nou rann la maliss par la maliss é pou nou sa lété in n'afèr natirèl — in manyèr aprann la rézilyanss konm i di zordi.

Néna in kozman marmaye l'afrik i di konmsa pou fé lédikassion in marmaye i fo tout in vilaz é kan mi ropanss ma vi dann mon vilaz mwin ossi mi rann amwin kont koman mwin lété antouré défoi bien, défoi mal, mé antouléka si mwin la vni sak mwin la vni sé par in tissi rolassion imène konmsa é mi panss sa va akonpagn amwin pou lo dé-troi grin d'vi i rèss amwin pou viv.

A bon antandèr salu !

Justin

« Ou la tyé koshon ? »

Justin — 2026-06-07T20:07:00Z

Mézami zot i koné koméla, pou in oui, pou in nom, demoune i ashté linj nèv. Toute zokazyon lé bon : kissoi in lévènman dan la famiye, kissoi in somenn komèrssyal, kissoi in solde dann in vil.

Sé pa ké lo moune i yèm gaspiyé mé zot i koné koméla linj lé mwin solid ké lontan é si néna lokazyon ronouvèl in pé lo garde-rob demoune i mank pa.. Mèm lokazyon i marsh koméla pars linj lé mwin solid é si sé marmaye wi pé konte dsi zot pou grandi pli vite k'i fo.

Zadis té pa konmsa. L'avé dé z'okazyon pou ashté linj sansa pou fé fèr linz par in koutyryèz.. Bann plantèr kann té i profite lo règloman lizine pou ashté linj sansa in pyèss tissi assé pou fèr linz pou la famiye.

Astèr kan i parl tyé koshon, kossa sa i vé dir ? Sa i vé dir koshon té in pé lo tirolir bann famiye, konm la koup kann pou in pé, konm la kuite jarniom. Tout sak téi pèrmète amélyor in pé la vi téi pass dann kassaz lé kui la famiye, lo bann dalon, sansa bann kaùarad.

Toussa pou dir azot la vi lontan té pa kom la vi zordi. Biensir la vi ma shanjé, mé lo bann kozman i rèss in pé parèye.

Alé ! mi invit azot pou rofléshir la dsi é ni retrouv pli dvan sipétadyé.

Justin

Kansa la fain sar aboli La Rényon ?

Justin — 2026-06-05T20:06:00Z

Mézami pou sak la viv lontan dann nout péi La Rényon-dizon pou sak la konète la loi disnèf mars 1946 kan l'arivé, zot téi panss sirman la fain avèk la mizèr téi sava disparète par lo mazigador la loi d'départmantalizassion. Antouléka pou mwin k'la vi bann pti kamarad lékol sansa katéshis soufèr la fain dsi lo ban koté mwin, mwin téi panss, avèk la loi d'départman franssé, lété in n'afèr téi sar fini vitman.

Mi rapèl lékol boi d'nèf-Sin-dni té pa rar déssèrtin marmaye — pliss bann fiye ké bann garsson — momandoné dan la matiné téi sava oir la métrèss épi téi domann pou sortir.L'ariv amwin pli d'in foi d'akonpagn in pti kamarad ziska la kuizine. La l'avé Madame Baba la kantinyèz, bondyé marmaye, é èl téi done in pé lo d'sèl épi in boushé manzé pars mon momon la diréktriss l'avé di i fo fèr konmsa.

Dsi lo ban katéshiss té pa rar zédi sansa dimansh matin oir in marmaye tonb an féblès pars dopi la vèye osoir l'avé pa gingn in ropa pou soutien lo kor. Bann dam katéshiss téi pass in sèrvyète mouyé dsi la figuir épi téi fé boir in pé d'lo. Lo prète lété pa ékipé pou vanj kont la fain.

Biensir mi parl azot sa néna lontan lontan mèm é konm mi di mwin téi kroi bann sène konmsa mwin nora pi vi kan lo départman nora té fine dékolé… Mé wala, mèm zordi, mèm katrovin z'an apré la fain i fé ankor déga issi dann nout péi. Déga shé bann zanfan, déga shé bann jenn, déga shé bann sdf, déga shé d'moune maladé. Donk ni pé dir wala in problèm — problèm la fain — la pankor disparète.

A ! biensir done in boushé manjé demoune la fain lé pa kékshoz i parl la télé sof pou anonss bann ropa la sharité, mé konm pou dir, sa sé in problèm a la marj pars dann la réalité na pi la fain konm dann tan lontan. Mé kansa nou va rann anou kont sa sé in problèm vréman, i mérite i pran ali o séryé épi i konbate ali vréman… Mwin la pa antann in nouvo mèr mèm in l'ansien apré dir wala in problèm i fo rézoude. Wala inmal i fo traké épi fèr an sort so problèm de fain i disparé par rapor nout péizaz imin.

La pa domin la vèye ? aou départman wi gingn ar pa zamé dévlope anou mé in problèm konmsa, wi gingn pa fé in zèss ? Wi gingn pa aboli sa ?

A bon antandèr salu !

Justin

« I fé pa pouss flèr kou d'baton »

Justin — 2026-06-04T20:05:00Z

Mézami an parmi bannzardinyé mi koné mi trouv néna dé kalité lékol : promyé kalité i yèm bonbardé, dézyèm kalité i yèm karéssé… Shoizi zot kan mé siporte mon kritik.

An parmi lo dé kalité mi préfèr kalité i karèss plito ké kalité i done kou d'baton. Pou mwin in plnate lé vivan é si wi vé li kontant aou i fo wi kontante ali. Kontanté, Sé done lo k'i fo, avèk lo fimyé k'i konvie, épi done ali in bon lantouraz, in landroi li néna plézir. Pou mwin sé sa lo kréssé é lo kontrèr sé la britalité.

Astèr nou lé dann in kozman é kozman-la i vé dir lé konm in moral dann fab La fontaine, lo lion épi lo ra, sak i di konmsa : « assyanss avèk longuèr d'tan, i vo myé ké fors épi raz. ». Mi diré sa lé konm pou lédikassion modèrn, sète lé konséyé pou ann zanfan.

Alé ! Mi kite azot kass in pé zot koko la dsi é ni retrouv pli dvan sipétadyé.

Justin

« Si wi frékant lo shien, ou va gingn lo piss »

Justin — 2026-06-03T20:06:00Z

Mézami an parlan lo piss mi rapèl bien néna lontan La Rényon té infèsté avèk lo piss véra é sa lété in malèr pou la popilassion an zénéral. Mé an parlan lo shien ni koné piss lo shien é sa lété pa in bon n'afèr pou nou avan k'i trouv in linsèktissid pou détrui bann bébét-la mé détruir lé pa lo fin mo pars ziska zordi li sava, li vien, é touzour li amenn anou la vi dir.

Solman nout kozman sé in provèrb é si li parl piss sé arienk pou in konparézon pars fransh vérité li parl frékantassion. Si ou néna bon frékantassion ou va tir bann bon bénéfiss. Si ou néna mové frékantassion ou nora mové bénéfiss.

Zot i koné si ou néna zanfan i fé dé shoz i fo pa, toutsuit ou va akiz lo mové frékantassion mèm si lé vré a-domi. Pars lé touzour konmsa, ou na tandanss protèz out zanfan — lo zo i soutien la shèr !- é akiz sète lé zot mèm si lé zot paran i fé la mèm shoz ke ou dann l'ote sanss.

Alé ! mi kite azot rofléshirla dsi é ni retrouv pli dvan, sipétadyé.

Justin

Mi panssé manz fig gabou, alé oir ou !

Justin — 2026-06-01T20:06:00Z

Mézami la modèrnizassion si mi tronp pa sé inn fasson d'ranplass plizyèr kalité d'kékshoz an in sèl kalité sansa trépé. Issi mèm la Rényon kan nou l'avé in gran varyété d'in n'afèr, léta franssé épi son bann sèrviss la ranplass sa par trépé… éspri kolonyaliss ? Pa touzour vi ké laba dan La franss l'ariv souvan la mèm shoz par léta sansa par lérop — in famé tablatir sète-la !

Mé la pa toussa, zordi mi vé anparl banane-mwin la konète sa sou l'nom fig é nou téi di fig gabou, fig sin zozèf, fig blan, fig brézil mé nou téi di banane karé.astèr a propo d' fig sansa banane gabou. L'avé in foi in ga téi apèl Gabou laba dann Salazie l'avé plante banane é si lo rézime té gro lo pyé té pti é konm Gabou li mèm téin pti kourto assé kosto demoune l'apèl lo banane, banane Gabou.

Mi koné pa si lé vré pars mi sorte oir dann googèl banane gabou i sorte la Chine sansa vietnam épi i plante sa sou lo nom banane Gabou.. Banane Sin Zozèf i done gran-gran réjime, lo pyé lé gran é lo banane bien kosto… Mé la pa toussa, kan lakaz banna i ashté banane-domaz i di pi fig — mwin téi kroi sa lété banane gabou mé wala mwin té dan l'érèr.

Pou kossa ? Pars i paré dopi kék zané sak i vann marshé forin sé banane cavendish in varyété la fine fane dann lo mond antyé pars li lé atif épi li gingn pa tro la maladi donk badnn tète piosh ladministrassion la kaziman obliz anou plante so kalité banane ou téi koné mèm pa…pou toute son kalité.

Kalité oui ! mé mi sort oir sète ané in maladi la kol dsi li é l'apré fann dann mond antyé-mé mi vann sa konm mwin l'ashté-an éspéran lé pa vré. Antouléka wala ankor in gran réissite bann tèt d'èf l'administrassion.

A bon antandèr salu !

Justin

Skiz amwin si mi anparrl ankor bann spéssyalité !

Justin — 2026-05-31T20:06:00Z

Mézami somenn passé nou la antrokoz bann spéssyalité. Mi rapèl kossa k'sé sa ! Sa sé in bann matyèr bann marmaye i pran sa pou suiv in lamontraz ranforsé po prépar zot zétid sipèryèr. Kan ou lé an sogonde wi shoizi troi spéssyalité, pou ou suiv an promyèr. Kan wi ariv an promyèr wi shoizi dë pou ou pass bak.

Sa i pèrmète lo miniss lédikassion nassyonal pou dir kan bann jenn va pass bak l'ané 2028, si zot i ve, zot i pé shoizir bann matyèr zot i suiv dann la lang réjyonal pou zot prézant kan zot va pass bak. Donk in quazi-obligassion, kan ou lé an promyèr épi an tyerminal wi étidyé lo spéssyalité dann la lang réjyonal.

Pou zot bien koprann amwin m'a prann lo ka néna in amontraz dann la lang kréol kissoi dann matématik, kissoi dann listoir, kissoi ankor dann la filozofi sansa l syanss politik. Si in armaye lissé i pran la filozofi konm s péssyalité é si dann lissé li sava i amontr la filozofi dann kréol rényoné, si li suiv sa pandan dézan li va gingn pass spéssyalité-la kan li va pass lo bak l'ané 2028.

Si sé sa, li néna lintéré trouv in bon proféssèr filozofi é anpliss in moune kalifyé dann la lang kréol konmsa si li travaye bien li sar kalifyé pou mark son pwin dann matyèr-la. Pars la pa pars li yèm kréol ké li va pass son spéssyalité konm in lète a la post san tro travaye pars lo bi sé pa sa : lo bi sé d'mète an valèr son konéssanss dann la filozofi é son bone pratik dann la lang kréol.

Alor mézami zot i konpran lékol lé pa fé pou bann zouar d'kart, ramassèr d'mou, li lé fé pou bann marmaye i travaye bien é néna dan l'idé d.suiv in zour in bon formassion.A bon antandèr salu !

Inn ti méshansté pou finir :

Mazine in kou k'in spéssyalité i tonb dann l'èr katrèr édmi-sinkèr édmi lo vandredi é ké zistoman spéssyalité-la i amontr an kréol. Bann marmaye k'i suiv sa mazine in kou zot lé lissé dopi dimansh o soir. Zot i panss lo marmaye sar mobilizé san pour san tout l'ané pou suiv lo lansègnman. Zot i panss pa lanvi rotourn in kou son kaz i ropran pa li kissoi pou oir si son pti shien lé bien, kissoi pou alé oir in pé son momon avèk son papa, osinonsa pou fé kékshoz li la anvi. Alor i vodré myé avoir in bon lanploi di tan… mé konm mi di sa sé inn maliss mi fé la.

Justin

L'abolission lo kode noir par bann député

Justin — 2026-05-29T20:07:00Z

Mwin la fine anparl azot l'abolission-la in bon koup de tan apré labolission lésklavaz — 1848 ziska 2026 — sa i fé par-la 178 zané apré lo 27 avril 1848 date la dézyèm répiblik la aboli lésklavaz dann bann koloni La franss… Astèr i rèss arienk pou pass dovan lo sénat pou konfirmé sansa oir kossa i fé avèk..

Kossa i lé lo kode noir ? Promyé tèks sé Colbert la ékri sa é lo Roi Louis katorz la proklamé. An fète d'apré sak mwin la antann dir néna 2 kode noir : inn l'ané 1685 lo promyé, l'ot l'ané 1724 lo dézyèm… Mi rapèl in tan mwin la anparl sa dann témoignages mé mi gingnré pa dir azot kossa néna dodan dann lo détaye sof si mi sava rodé, mé tout fasson sé in tèks pou abèss bann zésklav épi done favèr bann mète.. Soidizan pou imaniz in pé la sityassion bann zésklav mé alon pa kroir père noël.

Astèr in késtyon ni pé poz anou dsi so l'abolission-la. Té in bon n'afèr abolir sa, sansa in mové zafèr. Ni pé diskité pars néna plizyèr poinn-vizé la dsi : bann député i panss sé in bon afèr pars la tir in tèks mové épi kriyèl ; méshan épi diskriminatoir dann la loi franssèz. Mé in pé té i vé alé pli loin : fèr konmsi lo tèks lété anilé, konmsi li l'avé zamé égzisté.

Pars si lo tèks la égzisté i pé pa roprosh bann zésklavaziss pou avoir aplik tèks-la demoune zot l'avé mète an lésklavaz donk arien pou roproshé mé lésklavaz d'apré la loi Taubira sé in krime kont l'imanité é in tèks pou aplik in krime kont limanité wala in drol zafèr.

Arzout èk sa i parl réparassion. Alor réparassion pars l'aplik in loi bien légal dann innn sityassion d'krime oussa ni sava. La pa ditou lo mèm ka si i konsidèr lo kode noir konm nul épi konm kékshoz la pa égzisté.

Mi arète tèrla mé sé pou dir azot lo droi sé pa in n'afèr sinp… sé mèm in n'afèr konpliké ankor pli konpliké pou apliké dann in sityassion barbare konm la trète épi lésklavasz. Nou va rotrouvé.

A bon antandèr salu !

Justin