Témoignages

Gouvèrné sé prévoir !

Justin — 2026-09-27T20:05:00Z

Mézami dann tout zafèr ni pé dir : « Néna in zour i apèl demin ! ». In pé va dir « gouvèrné sé prévoir ». Mi rapèl kozman in vyé kamarad zordi la fine pass l'ote koté d'la vi. An parlann Paul Vergès lo ga téi di, kamarad Paul néna touzour in kou d'avanss par rapor lé z'ot é si sak li di lé vré-é mi kroi lé vré — sa i arzoinn lo kozman mwin la mark an-o la.

Boudikont, mi panss lé vré pars Paul l'avé touzour lo tan pou li rofléshir é in pé téi di nout kamarad lé vizyonèr, donk li néna in vizyon d'sak lo problèm sar domin, osinonsa apré, dann in fitir plito éloigné. In légzanp : kan li téi di san tardé nora in koma sirkilatoir issi La Rényon, mi panss li téi di sa pars li téi roflèshi bann problèm sirkilassion é avèk sa li téi pé dir, v'ariv lo zour i gingn ar pi sirkilé issi la Rényon.

Mi rapèl bann zanploiyé témoignages téi di Paul i dor pa la nuite.L'avé in rézon ; Sé ké li téi kalkil toultan problèm son péi é dann fon son kèr li téi doi dir, in zour kan bann rényoné va komandé, dann zot péi sar difissil pou règ bann problèm la rényon é an parmi bann problèm sirkilassion.

Mi panss ni pouré dress la list nout problèm, é mèm bann problèm La franss épi limanité, ni pé dir Paul té okipé avèk bann problèm demoune é li téi kalkil kossa i fodré fé dann tèl ka, épi dann tèl ote ka, sitèlman li téi dovanss bonpé résponssab dsi bann solission pou l'avnir. San konté lo fète ké bonpé zom politik lété koronpi alor zot téi sakrifyé lintéré lo péi par rapor in lintéré toutsuit pou toutsuit.

In zourbann zistorien La Rényon kan zot vamèteazot a étidyé pou vréman la vi piblik dann nout péi, mi panss zot va dir azot, Paul Vergès, inn grann shanss pou La rényon é mèm pliss, mé in gran domaz la blok ali dann son bann projé. Zot va dir, fitintan La rényon té an avanss pou bonpé mpreoblèm mé apré Paul voila ké nou la mète anou an rotar. A bon antabndèr, salu !

Justin

« Lo pli son pantalon i koup zèl moush »

Justin — 2026-09-27T20:04:00Z

Mézami si in pantalon lé bie ropassé, lo pli lé inpékab, vèye pa. Pars antansion si li lé malropassé, néna plizyèr pli i bataye ansanm é sa lé pa doss minos pou rogardé, konm pou porté.

Mète short épi mète pantalon la pa la mèm shoz : si lo short a pwin lo pli, i kass pa la tète, méin pantalonkissoi an toil, kissoi an dra, kissoi an tèrgal i doi z'ète ropassé in fasson inpékab, pars sa i atir la vu d'moune. Si tèlman wipé antann demoune dir : « bato la ropassèz la pran lo fon » é wi vé, wu vé pa, sa sé in kozman i plé poa ou.

Soman kan i di lo pantalon-i parl lo pli — i koup zèl moush, sa i fé plézir aou, é ou lé kontan la pèrssone la ropassé kissoi out momon, kissoi in nénene ropassèz, kissoi ou mèm sansa in kamarade dann l'armé.

Alé ! mi kite azot roflèshir la dsi é nii retrouv pli dvan, sipétadyé ?

Justin

Alon koz in pé d' « moring » — promyé morso

Justin — 2026-09-25T20:08:00Z

Mézami mi panss bonpé rant nou la fine antann parl moring, la plipar rant nou i koné sa sé in kalité léspor d'konba nout zansète zésklav sansa zangazé l'amenn pou nou, é la lèss sa pou nou an patrimoine. L'éspor i apèl moring, lo konbatan i apèl moringuèr, si sé in madam nou va apèl aèl la moringuèz.

Mi rapèl étan jenn in domi-granpèr mwin l'avé téi ésplik amwin lo moring : li téi di amwin kan i ariv dimansh aprémidi sansa zour d' fète bann jenn-jan téi group in landroi l'avé in ron d'moring épi sak l'avé pou règ in konte téi règ lo kont. Inn foi lo konba lé fini, sak la pèrde la pèrde, sak la gagné la gagné, bann moringuèr i rékonssilyé. Antouléka sé sak li téi di amwin é pou la boté d'lo zèss mi kroi sak li téi di.

Astèr si ni parl règloman i fo ni di l'avé in règloman kissoi pou rant dann ron, kissoi pou lakonpagnmann tanbour, kissoi ankor pou lo shanté. Ni pé dir ossi la pa toutt kou té pèrmi : dann in fime mwin la antann l'avé lo droi donn kou d'tète, épi kou d'talon, kou d'pyé bouran, san toush — kou d'poin téi done pa. Kan lo konba lété tro inégal l'avé d'moune pou séparé.

Si zot i domann azot kissa la amenn léspor-la issi la Rényon, la plipar d'tan mwin la antann dir sé bann malgash l'amenn sa shé nou pars téi pratik bann léspor d'konba laba dann nout grann voizine.I paré sa néna ossi dann Mohéli épi dann Mayotte é sré bann malgash galman noré amenn sa shé zot laba.

Mi arète la pou l'instan, mé nou va anparlé pars moring i fé partii d'nout patrimoine é d'apré mwin ni doi ransègn anou la dsi.A bon antandèr salu !

Justin

In pa an avan pou trape nout lotonomi alimantèr ?

Justin — 2026-09-24T20:08:00Z

Yèr matin mwin té apré rogarde nouvèl dsi antenne é l'avé in linvité téi parl dsi la farine maniok. Lo ga téi parl in kopérativ maniok dann sid Madégaskar banna i plant par-la troi san éktar maniok pou fé la farine.

In lavantaz farine-la : li lé san gluten é néna demoune i siport pa lo gluten donk sé in n'afèr intéréssan pou dmoune lé alèrzik… Sépa si zot i rapèml inn foi mwin la fé in modékri dsi in péi l'afrik i apèl lo burkina fasso é dann péi-la i fé d'pain avèk in mélanz farine lo blé épi la farine manioc.. ; in manyèr pou pa dézékilib la balanss komèrssyal épi inn fasson pou valoiriz in prodikssion dan lo péi.

Astèr kèl konklizyon mi tir dsa : pa sète lo télé épi lantroprénèr k'i di Madagascar sar lo gronyé pou li-mèm épi pou bannzil loséan indien. Mwin mi partiré plito dann sanss lotonomi alimantèr… Lé vré Madégaskar néna in surpluss de ri sète ané, lé vré la farine maniock sé un l'atout pou zot ;

Nout koté ni di : antanssyon ! i fo ni miz dsi lotonomi alima ntèr pars ni koné pa kèl mové kou bann gran péi i pé rézèrv anou ankor… In sipozission : ni miz dsi lo moiyin oryan pou gingn l'éssanss pou mète dann nout loto, kamion, bato mèm léstréssité é o boute shomin nou lé kite pou nout biskui.I pé ète parèy domin pou nout manzé si ni dévir lo do avèk lotonomi alimantèr

Alor i fo ni pran soin d'nou avèk lotonomi alimantèr épi lotonomi énèrzétik. Si sa lé dann program nout parti lé pa pou arien. Si Paul vèrgès l'avé mète sa dann son program lé pa pou arien ; Alor si i fabrik la farine maniok adégaskar tan myé pou banna ! si néna in sirpliss do ri tanmyé pou zot, mé nou lé blijé rogard anou in pé — nout program lé valab an toutan.

A bon antandèr salu !

Justin

« Mi yèm pa kan i zoué bobok »

Justin — 2026-09-24T20:07:00Z

Mézami mi rapèl bien foutbal lontan, téi falé oir koman bann jenn téi zoué bobok é té pa rar kan wi gingn in kou d'pyé dann bobok. In kou konmsa é ou té bon pou assir si i kass pa out tibia.

Kan mwin la grandi, mwin la fini par aprann i zoué pa brital pars wi mète out ladvèrsèr dann danzé épi ou lé reiskab gingn in sankssion : kissoi in karton zone, kissoi in karton rouz, avèk an pliss kék moi d'sispanssion.

Mé antanssion : i zoué touzour bobok mèm an parmi bann proféssyonèl, méi zoué bobok sélétif. Wi fé out britalité pou pa ankèss lo bi. Mé néna défoi mwin lé a d'mandé si in pé zouèr i mérite pa in kondanassion dovan tribinal.. ; Mé sa sé mon lopinyon.

Alé ! mi kite azot rofléshiir la dsi é ni retrouv pli dvan, sipétadyé.

Justin

« Boudin kui dann vant koshon »

Justin — 2026-09-23T20:06:00Z

Mézami, zot i koné bien dann vant koshon néna tout sort zafèr, mé assiréman na poin boudin kui. Alor pou kossa in kozman konmsa dann nout lang kréol ? Si ni rogarde in pé do pré sak Daniel honoré i ékri dann son somi-lo mo, ni konpran sé in n'afèr lé pa sir ditou. Si sé in promèss sé in promèss anlèr. Si sé in proklamassion sé in fake konm i diré koméla.

Dann diksyonèr Alain Armand i ropran lidé d'in fo, d'kékshoz lé pliss k'inprobab… Dizon in promèss pèrsone i tienbo pa.

In tan mi rapèl in shanté Ziskakan dsi bann démarshèr téi di konm parol : « oté démarshèr, oté volèr, assé rode boudin kui dann vant koshon ! », in manyèr dir arète profite dsi bann ti kolon, arète fé prann banna krédi, lé si tèlman dir pou ranbourssé.

Mi souvien shanté-la la fé in polémik dann tan pars issi La rényon l'avé bonpé démarshèr é zot téi fé zot bèr dsi la boss demoune. Koméla mi panss la fine pass in pé mé final de kont la vant dsi linternet sé koi sa si lé pa pou arnaké.

Alé ! Mi kite azot rofléshir la dsi é ni retrouv pli dvan sipétadyé.

Justin

« Zot va oir in zour baton va shanj de boute »

Justin — 2026-09-23T20:05:00Z

Konbien foi nou la di sa, otroman konbienn foi nou la antann in kozan konmsa ? Pars néna d'ot kozman i di la mèm shoz.Par égzanp kan i di : « néna in zour i apèl domin ! » sa i vé dir la mèm shoz ké « baton va shanj de bout » é sète-la i vé dir kossa oziss ?

Si ni di baton néna dë bout : ni oi bien in bout lé dan la min lo frapèr, L'ot boute sé avèk sa l'ot i ramass lo kou. Dann in bor lo frapèr, dann l'ot bor lo frapé. Nou lé dakor avèk sa mi éspèr !

Mé astèr si ni vé baton i shanj de boute, sa i vé dir ké lo frapèr i vien lo frapé é lo frapé i vien lo frapèr é konmsa ni konpran anou myé mé ni pé dir in n'ot manyèr. Ni pé dir le lopréssèr i vien le l'opréssé le lopréssé i vien le lopréssèr mé zot i oi bien avèk nout zidé sa i marsh pa pars si ni vé in bon libérassion napi d'lopréssèr é na pi d'lopréssé. Donk na pi d'baton ditou é pa solman in shanjman d'boute.

Sé konmsa ni oi la révolission, zot i panss pa ? Donk mi pé lèss azot rofléshir la dsi é ni retrouv pli dvan, sipétadyé.

Justin

An parlann téléfone mobil !

Justin — 2026-09-22T20:07:00Z

Mézami dopi la rantré, néna in loi pou défann rogarde son téléfone dann lissé. I paré sa sé l pli gran bien bann lisséin. I paré konmsa zot va travaye myé dann zot lissé.

Sa sé in n'afèr i kass amwin in pé kan mi antann dir sa. Pou kossa ? Pars mi panss téléfone mobil sé in zoutiye éstraordinèr pou angranj bann konéssanss, plito in zoutiye pou rogoumant bann konéssans plito ké pou abritir léspri bann marmaye.

A biensir, lé sir é sèrtin in pé va trouv bann bone rézon pou défann ansèrv in zoutiye konmsa mé mi oi pa déssèrtin apré amontr koman i fé pou bien ansèrv lo zoutiye, alor intèrdir lé pli fassil.

Si i réspèk la loi, zordi téléfone lé kashyété dann sak, plito ké rouvèr é pèrmète in bon izaz lo zoutiye é mi oi tré bien transform lo zoutiye an zoué plito k'dann in linstriman pédagozik.

A ! in n'ote afèr..I paré bann zélèv franssé la ankor rokilé an parmi bann zélèv l'ocde mé mi panss pa ditou lsak bannala déssidé va fé rolèv la tète lédikassion nassyonal. A bon antandèr, salu !

Justin

« I pé dir filé marmaye-la lé bien koupé ! »

Justin — 2026-09-21T20:06:00Z

I di sa d'in marmaye i koz bonpé é i koz bien an mèm tan. Pou kossa i di sa ? Par raproshman avèk zoizo martin… Zot i koné kréol i panss pou aprann in martin kozé i fo koup son filé : in sort fo-pli sou la lang si wi koup pa martin i kozra zamé.

O fète, mi koné pa si lé vré sansa si lé pa vré. Sak mi koné sé ké kréol é pa solman i kroi pou aprann in zoizo kozé(issi lo martin, an franss la pie) i fo koup lo filé osinonsa lo frin sou la lang. Anfète lo zoizo i koz pa mé li gingn imite la voi imène san konète lo sanss.

Donk pou in zanfan, si li parl bien, demoune i panss son filé lé bien koupé alé oir li lé pa koupé ditou.

Alé ! mi kite azot roflèshir la dsi é ni retrouv pli dvan, sipétadyé.

Justin

Sharbon vert pou ranplass Sharbon d'boi

Justin — 2026-09-20T20:07:00Z

Toute bann léktèr zoinal Témoignages lé sirman o kouran dsi litilité roplante bann pyé d'boi pou anpesh lo dérègloman klimatik. Sé in problèm gaz karbonik : opliss néna d'gaz karbonik opliss néna dérègloman klimatik avèk toute zinkonvényan ni koné — é si i koup bann foré pou fé sharbon d'boi, na pwin d'mirak é linkonvényan lé dovan nou.

Antouléka, sirésèrtin, zot i doi antann parl lo roboizman dann nout péi : mi rapèl kant mèm sé Paul Vergès étan mèr lo Por la fé plante sink san mil pyé d'boi, épizapré an tan k'prézidan konsèye réjyonal la fé plante ankor in miliion d'pyé dboi part-é-d'ot la rout tamarin. Zot i doizète o kouran bann roplantaz pyé d''boi par la komine sin-Dni, konsèye départmantal épi d'ote ankor.

Astèr si ni koné pou la Rényon konm i kuizine o gaz ni pé dir na pwinn gro problèm : in pyé d'boi planté, épi arozé, li pouss é lo bi lé o bou d'shomin. Mé dann d'ote péi défoi bann popilassion i rash lo pyé d'boi planté pou fé kui manzé é sa lé pou zot in késtyonn vi é d'mor.

Poitan néna in solission sé la fabrikassion sharbon vèr é néna déssèrtènn assossyasion i fabrik sharbon vèr épi i vann pti pri pou kui manzé. Koman i fé, i kolèkt déshé vèr épi par in prossédé pyrolitik — san loksizène — i fabrik sharbon vèrt — li lé pa vèr, li lé noir mèm mé i di li lé vèr pars i fé ali avèk bann déshé vèr é sa i pèrmète protèz bann foré épi konsèrv bann roboizman. Mwin la rogard dsi mon téléfone in léspèryanss fé laba dann Sénégal é mi panss lé valab.

In linkonvényan : landroi demoune lé mizèr sharbon vert i intérèss pa zot, sak zot i vé sé koup doboi — mèm pyé d'boi i sorte planté — pou kui manzé toutsuit pou toutsuit kite a rotrouv azot domin san boi pou kui manzé. Konm koi la mizèr d'moune sé in gro frin pou règ bann problèm la biodivèrssité é la mizèr d'moune sé in konsékanss lésploitassion bann pèp par bann kapitaliss dsi lo plan nassyonal konm internassional.

Mi arète la an domandan azot ranfors zot konéssanss dann bann problèm la biodivèrssité lo pliss k'i pé, pars la konéssans sé in n'afèr a ranfors plizanpliss pou toulmoune é dann lédikassion popilèr sé in bon solission. Inn'ot afèrni pé anparlé pou bann gouvèrnman i vé pa bann marmaye i ansèrv zot téléfone poitan in sakré zoutiye pou konète lé shoz mé ni ppé anparlé

A bon antandèr salu !

Justin