Témoignages

Si nou téi parl in pé la guèr nikléèr

Justin — 2026-08-31T20:09:00Z

Mézami mi rapèl lo tan demoune dsu la tèr l'avé pèr la guèr nikléèr i pète avèk la déstrikssion konplète bann sivilizassion. Pars dann tan-la l'avé sak i apèl lékilib la térrèr.

Dann tan-la téi di shakinn an parmi bann grann puissans néna de koi pou détruir plizyèr foi la tèr avèk zot bonb A épi zot bonb H épi sak i fo pou transporte bann bonb-la sir plass.L'Urss lé pu la é bonpé péi téi panss lo risk in guèr total pou détrui l'imanité lé fine disparète.

Lé vré si l'Urss i égziss pi, la fédérassion d'Russie i égziss é sé in formidab puissanss nikléèr. Zétazini lé la é ankor pli danzéré dopi Trump la vni Prézidan. Néna ankor d'ote puissanss konm La Chine, la Corée di nor, L'inn, lo Pakistan, Israêl épi d'ote ankor sirman apré fabrik la bonb an dsou é banna lé ékipé avèk bann zarm déstrikssion massiv.

Anplisské sa i rossanb zordi néna plizyèr dirijan fou — sèrtin i lir mèm pa parétil mé zot i diminyé lo risk pou zot. Kan Trump i di asoir néna in sivilizassion plizyèr foi milénèr i sava disparète, lo mond i pran sa in pé a la lézèr é i fini par kroir in nouvèl guèr lé possib san détruir limanité. Pars détruir in gran péi épi in grann sivilizassion sé rien pou zot é sirtou pou bann zoinalist a la solde bann kapitaliss la akapar bann moiyin d'informassion. Mèm lo mond i mank moune saz.

Ano mèm issi la rényon kan la guèr i pète dann l'irak sansa dann l'Iran sèl zafèr ni krin sé pou nout pla d'ri poitan l'Iran lé tèrà dann loséan indien é sé laba ké la guèr avèk bann moiyin zamé konu i pète é dopi sis moi.

Prézidan La franss i menass la Russie san bien oir lo danzé i pé ariv dsi l'outre-mèr san prévnir ; Li lé fokalizé avèlk l'idé k'in sèl bonb russ i pe détruir La Franss é pou anpar bonb-la i dépanss san konté. In tan l'avé konm in réakssion bann pèp, zordi bann média la nyabou andor bann opinion piblik é final de kont bonpé d'opinyon piblik i panss zordi, la guèr i pé ariv rant bann grann puissanss mé lo risk lé minime pou bann pèp… Mézami mi panss lo mond néna intéré révéyé. Lo dézarmman sé kant mèm inn néssésité é néna pli irzan ké fabrik bann bonb épi bann fizé.

A bon antandèr salu !

Justin

« Pou trouv ali, dor tar, lèv bonèr »

Justin — 2026-08-31T20:08:00Z

Zot i koné dann nout péi, dann tan lontan, si la plipar d' tan demoune i pèye zot dète, i ariv kant mèm déssèrtin k'i éskiv zot résponsabilité.

Mi rapèl in zour, lakaz in granpèr, in moune té apré koz an parabol avèk li — zafèr gramoune i koz pa dovan marmaye !- li téi di : « kossa inn shoz méssyé ? Robis pik o zèrb ! ». In pé d'tan apré mwin la konprann lo Robis té in vandèr d'lé, li l'avé anprète larzan avèk lo gran-pèr é pou évite bann réklamassion li l'avé shanj shomin é li téi fé in gran kass kontour pou évite la kaz gran.

Si tèlman défoi lété difissil trouv la pèrssone i doi aou an tète-à-tète. défoi li téi pass koté out kaz o fénoir kissoi gran matin avan solèy i lèv ; Sé dir si ou l'avé d'shanss trouv ali dan la zourné.

An fète téi lèss pa ou lo tan trouv ali é si ou sava son kaz, ayayaye, ou na pon inn grann shanss pou trouv ali.

Alé ! Mi kite azot rofléshir la dsi é ni retrouv pli dvan sipétadyé.

Justin

Assé gaskone nout patrimoine manzé siouplé

Justin — 2026-08-30T20:07:00Z

Mézami, sé pa si zot lé konm mwin, mémwin néna linpréssion toulmoune i anparl manzé plizanpliss. Mi koné pa égzalktoman pou kossa, mé néna kékshoz i di amwin demoune i koz pliz aanpliss manzé é mi domann amwin pou kossa. Mi domann amwin pou kèl rézon dann zoinal, dann la piblissité, dann bann zémission radio osinonsa télé demoune i parl plizan pliss manzé.

Dopi lontan mwin l'avé romark in n'afèr, kissoi dann la zone demoune i marsh a pyé, kissoi dann la gar lo kar, épi dann tout zandroi lo moune lé anparmi, ni romark in pé partou néna pou manzé kissoi sikré kissoi salé partou néna pou manzé é pou sa i sifir ou néna dé katsou dann out posh. Lété konmsa demoune l'avé pèr mor d'fain. Anfin avè dé katsou wi pé kontante out lanvi kissoi pou ranpli out bouzaron, kissoi mèm pou anbète la boush.

Sa sé in konstatassion, mé sak i plé pa mwin sé kanin pé i panss zot i pé aprann anou ékonomizé. In tan mi rapèl bann fanm déor téi ramss la ké karote pou ékonomizé, donk pou pa gaspiyé. Mi roprosh pa zot sa, mé kan zot i komanss par trafik nout rossète manzé la moin lé kapab pète in kab. Mi koné pa kissa la di azot a qo moune déor i fo shanj nout rossète.

Mi rapèl in zour in madam réstoratriss demoune la parl aèl ké déssèrtin téi vé shanj nout rossète rougaye sossiss.lo mafdam té an kolèr é élla di : « Plito k'fé sa, akoz i sava pa rode in kamarad pou zot ? ». Mé dopi tan-la i kontinyé gaskone nourt bannrossète, fèr lé shoz in pé konm zot i v é. Astèr la mi di antanssion, sé nout patrimoine manzé k'i mète an danzé si tèlman ké kan wima nz dann in réstoran finalman wi koné pi koué wi manz. É l'èr-la lé possib kassiin kab kan wi rann aou kont toussala.

A bon antandèr salu !

Justin

« Assé pou anbète la boush »

Justin — 2026-08-30T20:06:00Z

Mézami na pwin lontan mwin té apré lir dann in liv Axel Gauvin lo pti boute zot i pé lir : « Mi rant la kaz, mi dékouvèr marmite pou trouv ziss pou anbète la boush dedan.

Mi panss zot i konpran kossa lo marmaye i vé dir : néna de koi pou anbète la boush dann marmite mé na poin do koi bien kal léstoma, bien satisfèr la fain.

Alor mi fé lo raproshman avèk lo kozman franssé kan i parl « bann amiz guèl » épi mi panss lé possib lé dé néna in mèm rassine mé mwin lé pa sir. Si « anbète la boush » i tonb famiye avèk « tronp la fain », amiz guèl sré kékshoz plito ppou rouv l'apéti.

Dann dikssyonèr i fé lo raproshman avèk « akokine la boush », biensir sa i fé in pé parti lo mèm vokabilèr la manjaye, mé mi panss plito sa i vé dir fé saliv demoune, aranj in pé la boush demoune.

Mi koné pa kossa zot i anpanss mé moin sar kontan si sa i fé travaye zot koko… Alé ! Ni rotrouv pli dvan sipétadyé.

Justin

« Laryaz : Sèr l'aryaz.. »

Justin — 2026-08-28T20:09:00Z

Kossa i lé sa d'apré zot ? Bann zansien i koné sirman mé bann rényoné koméla, mwin lé pa sir sa i di azot in n'afèr. Dayèr mwin néna in késtyon pou poz azot la dsi pars mwin mèm mwin lé pa sir d'mwin.

Pou komanssé « L'aryaz », kossa i lé ? Mi panss sa sé lo frin dann in sharète bèf é lé inpé drol pars mo-la irossanmlo mo « aryèr » mé li néna pwin arien a oir avèk in marsh aryèr poitan li sé lo frin : pou lashé i tourn in koté plizyèr tour, pou séré i tourn dann l'ot sanss plizyèr tour ankor.

Soman fé pa konm Ti-kok ! son papa i di ali sèr laryaz é oila k é li sava kashyète la : anivèle lo l'aryaz dann in touf vétyvèr si tèlman lo sharète la kapoté.. ; Si mi di in moune : arète fé laryaz dabnn mon biznèss, sa i vé dir frène pa mwin, lèss mon biz nèss marshé.

Si mi di in moune sé in l'aryaz, sa i vé dir, li lé touzour la pou anpèsh mé zafèr avanssé.

Astèr mi ôz azot inkéstyon : kossa i lé in larkiloir ? Sé in pyèss pou manèv an fézan l'aryèr ? mi panss pa. Pétète sé in n'ot non pou l'aryaz mèm ? Antouléka mi koné pa lo sanss mé si zot i koné di amwin. ; mwin sarrokonéssan.

Alé ! ni artrouv pli dvan, sipétadyé.

Justin

Viktime de guèr an réédikassion !

Justin — 2026-08-27T20:10:00Z

Mézami néna inn-dé zour dsa mwin la rogarde in kou zoinal parlé é mwin la vi in sékanss mwin la trouv intéréssan.Téi anparl bann solda bléssé é la bézoin d'in réédikassion é sa lé pri an sharj par in lassossyasion fé éksopré pou sa.Pars bann solda bléssé la bézoin d'in réédikassion kissoi fizik pou sak la konète bann sékèl fizik, kissoi mantal osinonsa moral pou sak la konète in déga dsi so poinnvizé-la.

D'apré sak mwin la vi demoune lassossyasion néna lo moiyin ède bann bléssé rotrouv in pé zot lidantité fizik, moral, sansa mantal.Dann lo lassossyasion néna doktèr, néna psikolog, néna in pé toute sak i fo pou vnir an soutien pars d'apré sak i di lé pa fassil romonte la pante kan lariv aou in séryé déga dann tan la guèr.

Biensir sa sé in n'afèr toulmoune i pé konprann pars dann la vi tou kour i ariv demoune bonpé tablatir é pou romont la pante lé dur, défoi ou lé pa marké mé ou lé ataké k'i oi osinonsa k'i oi pa, mé la bézoin lo soin pou romonte lo kouran épi rotrouv lo kour out vi.Mi arète la, mé mi panss demoune i doi tonb dakor avèk mwin fassilman dsi in sizé konmsa é promi ziré la pa la dsi la sékirité sossyal i doi fé son zékonomi .

Si ni rovien l'assossyasiasion i anparl dann télé, mwin la vi bann bléssé apré akonpagn bann zanimo konm par égzanp shoval, sansa moush a myèl pou bann zanimo sèrv azot médssin san formassion, mé arienk an étan natirèlman konm zot i lé.Mwin la rogarde dsi linternèt é mwin la vi lo rol bann zanimo konm lo shien, lo shate épi mouton i pé zoué dann la réédikassion lo moune bléssé.

Astèr in késtyon kant mèm ! Dann roportaz mwin l'aprann pliss san sinkante pèrsone i suiv la réédikassion avèk banna.150 ok ! Mé lé zot, sak i rofiz bann réédikassion-la, konbien zot i lé.antouléka sa i vé dir la guèr La franss i fé an déor dson téritoir ébin sa i lèss déga imin é pou défann inn bone koz sansa pa inn bonne koz ? ni pé poz anou késtyon.Pou in pti péi knm nou mi panss sa i roprézante pa mal demoune kant mèm viktime dirèkt sansa indirèkt épi bann famiye, épi bann paran, épi bann zanfan. Astèr obliye pa toute bann viktime dann tout La franss...sa i doi fé dé mil é dé san.

Sa i fé dir amwi nin gouvèrnman sansa prézidan i pé anvoye bann sitoiyin fé la guèr mé i fo porte atanssion : pa déklansh bann zopérassion lé pa itil, pa déklansh bann zopérassion pou grossi lo pla ban n zésploitèr pars bann viktime-la, zot lé toussèl, zot lé jenn, zot lé frazil é i fo porte atanssion banna -sirtou pa konsidèr azot konm viktime kolatéral inévitab..

A bon antandèr salu !

Justin

« I roul konm la boul karé »

Justin — 2026-08-27T20:09:00Z

Mézami in boul dabitid lé ron, tazantan li pé z'ète oval mé zamé o gran zamé li lé karé é ankor pliss dsi la sab mouyé, osinonsa dsi la tab plate ;Mi di pa in boul karé i pé pa roulé, mi di li pé roul-roul in pé an massikrok.

Kan in moune i di aou sa, i fo pran konm in plézantri, pars li l'apré li plézanté pou vréman. Lé vré dé foi nou la zoué la boul avèk in boul papyé bien anroulé dann gatire é nou la kass lo kan, é nou la marke lo bi . Dé foi sé la panss koshon la ansèrv anou pou fèr in balon é nou la amiz nout tan avèk sa.
Toute fasson, nou la zoué, nou la amizé, é si nou la pa gingn fé in boul ron konm la boul karé dsi la tab plate, nou la kontante anou avèk sak nou l'avé é niou la zoué bon kèr konm zot i pé douté.
Alé ! mi kite azot rofléshir la dsi é ni retrouv pli dvan, sipétadyé.

Justin

O sèrviss La franss ? A ouè !

Justin — 2026-08-26T20:09:00Z

Ni koné Edouard Philippe, in l'ansien promyé miniss i sorte fé in sézour éléktoral shé nou. Pars konm li di, li lé kandida konm prézidan pou la franss l'ané 2027.

Néna in tripoté d'moune i sa sèye gingn prézidan mé lo ka nout vizitèr sé in ka bien singuilyé. Pandan troi zané édmi li lété promyé miniss é li la aplik la politiik lo prézidan Macron. Antouléka li la zamé di li téi aplike pa politik-la.

Astèr sèryèzman kan li di li sava défann zintéré la Franss mi doute é mèm mi diré konm Macron li vé kontinyé défann bann zintéré la klass possédante, sète larzan la fé in bonpé pti dopi Macron l'ariv Prézidan.. Lé vré li lé pa toussèl é lé zot la fé konm li mé li té pa konte.

Mé dela anparl la défanss La franss mi panss néna in pyèz ladan, pa pou bann rish mé pou bann franssé la normalité. Bann patron i ékoute ali é zot i poz azot késtyon dsi son kapassité gonf zot pla pars sé sa k'i konte an promyéé an définitiv.

Si sé pa li k'i konvien zot va dir ali bar ; Si sé li zot va aprouv ali é li va gingn lo zapui k'i fo pou amenn lo bato.

Astèr li vien shé nou pou rakonte èk nou son bobar mé final de konte lo morso lo pli inportan son program si i rotien ali sar lo programm lo patrona ni pliss ni moinss.

A suiv ! Mé i tard ar pa oir zorèye lo lou dsou la po d'mouton.A bon antandèr salu !

Justin

« La shanss ti-poul lépa la shanss ti-kanar ! »

Justin — 2026-08-26T20:08:00Z

Mézami kozman-la ni antann souvan pars konm i di dann in zé, shakinn son shanss é la pa pars ou i panss lo sor va tourn out koté ké li tourn réèlman. Si ni pran lo zé kart-noir kart-rouz finalman lo kliyan i kroi li lé gagnan mé li lé pèrdan pars lo zé lé tayé pou ké li pèrde.

Mé la mi parl in zé triké mé nadéfoi lo zé lé pa triké é mèm sa néna in gagnan pars zour-la lété pa pou ou… Mi rapèl in foi la roulète dan la kour lékol. Zour-la l'avé volaye, kanar, lapin, mèm in morso salé. In moune déza rézona b l'ashète lo total-kapital biyé si tèlman li téi vé morsso salé — la. Mé in kouzin a nou la pass koté li avan tiraz, konm li l'avé poin arien pou doné li la done in tiké an parmi toute sak li l'avé ashté. La tourn la roulète épi son niméro la sorti — lo famé niméro doné. Addyé morsso salé !.

Mon kouzin la pran in pti lapin pars lété sa li téi vé : Moralité shakinn son shanss é la shanss ti-poul lé pa la shanss ti-kanar.

Mi kite azot e rofléshir la dsi épi ni rotrouv pli loin, é nou ni rovoi sipétadyé.

Justin

Gaël Rivière la mète la Rényon anlèr

Justin — 2026-08-25T20:10:00Z

In pti nouvèl an passan dsi in moune la mète la Rényon anlèr. Moune-la, mwin la vi ali apré fèr in komantèr dsi in gran konkour zé koléktif li la ranporte avèk son bann dalon.

Spor-la i apèl cécifoot, in zanr foutbal pou bann demoune lé mal voiyan i vienn ranport in gran tournoi. Son lékip té an final kont langlétèr dann loshanpiona d'érop é zot la fé goute bann zanglé.

Kréol l'avé déza antann parl de li l'ané 2024 kan son lékip la gingn lo tournoi olynpik laba dann Paris… So kou issi li amontr si zot la gingn la kourone té pa in kou d'azar : la prèv, so kou issi kont langlétèr.

Sa sé in marmaye sin-Bénoi donk iin rényoné pur ju, k'i kontante anou dann nout kèr par rapor li la ranporte in grann viktoir.

I fo ni anparl pars nou lé pti lé vré mé nou néna ossi nout kapassité,… nout gou d'sèl si zot i vé ;

A bon antandèr salu !

Justin