Témoignages

Douzyèm morso : Poisson, lo sor la monte déssi !

2009-11-21T00:00:00Z

L'avé inn foi, pou innn bone foi, dan la vil de foi, méssyé lo foi la manz son foi èk in grinn sèl ! 

Dë mo d'rézimé :
L'androi la mèl la tonbé, in pyé sitrouy la mète a poussé. Li la donn son frui épi son frui la mète a grossi vitman. Baba, parl pa ! Tizan la kass inn, mé ti pé l'anboulkidi li la gingné ! In pé plis té i kraz ali, té i roul déssi li, té i dispèrs ali an morso, pétète an piré ! Li la nyabou éskivé, li la fointé, é lo sitrouy la pète an flèr dann bassinn'lo. Li lé sové ! Mé ala k'dann lo, in kantité pti poisson rouz i mète a nazé. Sa té zoli, falé oir ! L'anvi kol inn avèk son golète banbou épi lo zin blé i pran ali. Dann fonn syèl, son zansète la bo mète ali an gard, li antan pa aryin, si tèlmann l'anvi lé for. 

Dalone, dalon ! Inkroiyab mé vré ! Tizan i anvoy son lign dann bassinn'lo, toute suite li trap in poisson rouz. Konm moin la fine dir azot, la pa in gro poisson, mé in pti, par-la la grossèr lo doi... Son z'ansète, dann syèl, i mète ali an gard, i di ali armète poisson-la dann lo... mé lo marmay i ékoute pi pèrsone : li la anvi lo poisson, in poin sé tou. Li dégraf son priz avèk lo zin épi li bour sa dann son bèrtèl. Aprésa, li kol shomin, li sava, kontan d'li mèm, kèr klèr, mé in pé vantar kant mèm. Li kalkil kan li v'ariv la kaz son momon, li va mète lo poisson dann in pti bassin, konmsa li n'ora in pti kamarade pou pass in pé lo tan ansanm. Li kalkil galman la tète son bann pti dalon. Koman banna sar zalou oir lo zoli z'afèr li nana.

Kriké ! Kraké ! Ay ! ay ! ay ! kossa l'ariv ankor ?

Ala pa k'li antan konm in pti dézord déyèr son do ! Ala pa k'li san lo poisson l'apré grossi ! Ala pa k'li antan konm in voi k'i di konmsa : « La, la trap amoin ! La i sa porte amoin ! ». Tizan i trap poisson-la, i poz a tèr, épi li sèy shapé. Oplis li kour, oplis poisson i kour déyèr li. Oplis li kour, oplis poisson i grossi... la près fine ariv la grossèr in pti ton. Tizan i komans afolé ! Dann son kèr, li pans lo poisson lé riskab anval ali… si i kontinyé grossi. Transpirasyon froide i koul déssi son figuir. Li oi in shoval apré manz zèrb, li sa oir lo shoval, li di : « Port amoin déssi out do pars poisson i sa manz amoin ! ». Shoval i konpran pa tro, mé li donn son akor. Li di lo marmay monte déssi son do. Shoval i trote, poisson i suiv dousman... shoval i galope, poisson i déboul déyèr li. Kan shoval i ralanti, poisson i ralanti. Kan shoval i rédi l'alir, poisson i rédi l'alir. Shoval i pran la pèr, i di lo marmay désann ali. 

 Kriké ! Kraké ! Tizan i kri l'éléfan o sokour !

Tizan i sa oir l'éléfan pou sokour ali. L'èr-la, poisson la fine ariv grossèr in shoval. L'éléfan i fé monte lo marmay déssi son do, mé poisson i larg pa zot. L'éléfan i sava dousman, poisson i sava dousman. L'éléfan i kour vite, poisson i déboul déyèr. L'éléfan i di Tizan désann ali a-tèr. Lo marmay i dsann, mé poisson i fish déyèr li mèm. Talèr i sava anval ali pou vréman. Poisson i di : « Toué la trap amoin, toué va port amoin ! Toué la pèsh amoin, toué va porte amoin ! ». Tizan i kriy sokour son bann z'ansète dann syèl... Li di banna i fo ède ali, sansa li trap ar mèm pa son konésans, dizon laz dé rézon. Banna, bon kèr, i déside ède ali... I donn ali in tik-tak pou li gingn sové.

Kriké ! Kraké ! koton mayi i koul, rosh i flote ! Tizan i gingn sové !

Li kour son kaz. Li mète in gro marmite o-fé, do luil, é tou anndan. Li kashyète déyèr lo marmite. Poisson i fons pou trap ali, Tchwaaa ! Lo bébète i tonm dann marmite… frité k'i di. Kan demoun la koni kossa k'la éspassé, la vni… shakinnn la manz in boute.

Moin, pou mon par, moin la pa gagné, moin la vni tèr-la pou rakonte azot zistoir-la an éspéran zot ossi zot i sava partou pou rakonte sa pou k'i pèrde pa zamé, pou k'la shène nout mémoir i kass pa. 

  In zistoir gramoun lontan la rakonté é G. Gauvin la armassé.

Zistoir la fini, pars nana déza douz morso, épi trèz, sé in shif a s'ki prétan i porte la movèz shans.

Onzyèm morso : sitrouy, lo sor lé dsi

2009-11-14T00:45:00Z

Dë mo d'rézimé : Nou la fine oir dis morso, zordi onzyèm i atann anou. Donkalor, Tizan la fé son panyé mazik. In panyé nana in fors inkroiyab, té kapab ral anlèr dann syèl in moun, pétète dé... Touléka, Tizan avèk in mèl an pyèr, sa oui ! Kan lo marmay l'ariv an-o la-ba mèm, li la palank lo mèl, la tonm an ba la-ba déssi la tète Grandyab. La fé paf épi la fons Grandyab dan la tèr. Aprésa, Tizan la désann, li la poz kosté la mèl, pou li oir si lo dyab lété mor pou vréman.

Kan lo marmay la pozé, li la romark in drol n'afèr. L'androi la mèl la tonbé, in pyé sitrouy la poussé, mé la pouss si tèlman vite, la donn si tèlman vite son bann frui. Son bann frui la grossi si tèlman an vitèss... Tizan la déside kass inn pou amène pou son momon fé kari. Avèk son pti kouto, li la koup lo gon inn, épi li la mète sitrouy-la dann bèrtèl li la trouv pa tro loin l'androi li lété. Pétète lété bèrtèl Grandyab, mé moin, pèrsonèl, mi koné pa. Son z'ansète dann syèl, k'i avèy déssi li, i donn ali a konprann i fo pa kass sitrouy-la, mé Tizan lé fronté... li tyinbo pa konte, li anvoy baladé. Ala lo marmay parti... mé tou d'in kou, li antann konm in kozé dann bèrtèl, épi li santi konm k'i diré lo sitrouy l'apré grossi. Oté ! kossa l'ariv ankor ? Bon dyé ségnèr, kré mizèr d'in sor ! kossa l'ariv ankor ? 

  Kriké ! Kraké ! Tizan i poz lo sitrouy a-tèr, mé sitrouy i pèz déyèr li !

 Tizan i poz lo sitrouy a-tèr, an réspé, épi li pran son distans, mé sitrouy i suiv ali. Kan li marsh, i roul dousman ! Kan li kour, i déboul déyèr li… épi i di : « toué la kass a moin, toué va porte amoin. Toué la kass amoin, toué va porte amoin ». Lo marmay, shové i drèss déssi la tète ! Sitrouy i grossi mèm, la fine ariv par-la dis kilo, é i suiv ali mèm, é i suiv ali ankor é touzour. Tizan i trouv shoval, li souplègn avèk shoval : « Mète amoin déssi oute do, sitrouy-la l'apré tash moiyin pou kraz amoin ! ». Shoval i lèss ali monte déssi son do. Shoval i marsh, sitrouy i roul déyèr li. Shoval i galope, sitrouy i déboul ankor pli vite, épi li di : « La kass amoin, va porte amoin ! La kass amoin, va porte amoin ! ». Shoval i galope, mé i vyin pa bou distans lo z'afèr. Li fini par di èk Tizan désann a-tèr pars nana konm in mazigator, li konpran pa kossa i lé, dann sète afèr la... Tizan i dsann… sitrouy la fine ariv la grossèr in bèf. 

  Kriké ! Kraké ! Tizan i monte déssi l'do léléfan !

Tizan i trouv in léléfan, li di ansanm léléfan : « Porte amoin déssi oute do ! sitrouy-la i rode kraz amoin ! ». Léléfan i pran ali an pityé, i lèss ali monté. Solman lo bèl monstr i larg pa zot, li kour déyèr zot, li di mèm : « La trap amoin, va porte amoin ! La trap amoin, va porte amoin ! ». Oté, kabass, sitrouy la fine près ariv la grossèr léléfan. Kan sète-la i marsh, sitrouy i roul déyèr li dousman-dousman. Kan léléfan i kour, sitrouy i pèz la plate déyèr li... Momandoné, léléfan i di Tizan désann pars sitrouy-la, sa i doi z'ète in mazigador sa ! Tizan i dsann, mé la, li lé an danzé... Son z'ansète dann syèl i fé konprann ali « afol pa ! ». I donn ali la marsh a suiv. Li avans mèm, épi li atan signal. Signal l'arivé : nana in pti pon, in bassinn lo dann fon. Lo marmay la konprann toutsuite kossa i fo fé. 

  Kriké ! kraké ! sitrouy i pète an flèr dann bassinn lo !

Tizan i kashyète déyèr in pil lo pon, sitrouy i fons déssi li... Li éskiv ! Lo z'afèr i pète an-ba dann bassinn lo. Li pète an mil morso. Tizan lé soulazé, li na palpitassyon, mé li lé sové... Li rogarde dann fon, é li oi in bann ti poisson rouz, pti konm lo doi. Sa lé zoli vèy pa ! Lo marmay i amiz son tan pou li rogarde bann poisson.

Koton mayi i koul ! Rosh i flote ! Onzyèm morso la fini, proshène foi, douzyèm morso.

In zistoir gramoun lontan la rakonté é G. Gauvin la armassé.

'Bla BLA BLA' installation Hélène Coré-Sophy Rotbard

2009-11-06T22:15:00Z

Les " blabla" des dirigeants de ce monde ne changent rien ; la planète est en danger. Il faut changer nos habitudes, le pourrons-nous ? Les Blabla incarnés dans les glaçons bleus ont fondu sur le voile blanc cachant le corps de l'artiste à 42° dans la " Shapel boutey". La progression de la fonte a été filmée en 1h48 mn dans une chaleur intense pour l'une et dans le froid pour l'autre... Ce laps de temps a semblé très long alors qu'à l'échelle du monde, c'est très court. Le visiteur est invité à découvrir le montage réalisé à partir du film de la performance. Cette vidéo s'installe dans une mise en scène composée des élèments utilisés : moules des lettres, traces de la fonte sur le voile, photographies des phases expérimentales. La scénographie réalisée par Sophy Rotbard a été pensée volontairement avec un médium issu de l'industrie agro-alimentaire sublimé par le matériel de scène du Théâtre Koméla offert par Baguet il y a 10 ans. Remerciements à la Région Réunion, au Conseil général, à la DRAC, la Mairie de Saint-Leu à l'association "Vien a zot" et à Monsieur le Proviseur du LP Victor Schoelcher. Remerciements spéciaux à Lantouraz pintat Guy, Muriel, Kristelle, Bruno, Nicolas, Franswase, Sylvie, Maxwell, Isabelle, Maniel Robiné et Babou B'Jalah.

http://artsenik.artblog.fr

L'avé inn foi, dan la vil de foi, méssyé le foi, la manz son foi, èk in grinn sèl !

2009-11-06T22:10:00Z

 Dë mo d' rézimé : nou la fine oir nèf morso, zordi dizyèm. Momon Tizan, mi pans zot i ansouvyin, la fé in trikmardaz avèk Grandyab. El na lo droi pran sak èl i vé dann zardin lo bébète mé an éshanz èl i donn son pti garson lo dyab pou manzé. L'èr l'arivé pou Grandyab manz Tizan, mé sète-la i lèss pa li fèr, li invante in tik-tak... plito son bann z'ansète i, donn ali in tik-tak pou li nyabou shapé. Sé lo zistoir d'panyé mazik nou l'apré rakonté... Fini lo panyé, i fo fé l'éséyaz. Tizan i sèy, lo panyé i nyabou mont dan lé z'èr. Grandyab i sèy son tour, lo z'afèr i marsh korèk. So kou issi Tizan i fé in drol démonstrasyon : li ral in mèl moulin mayi èk li dann panyé soi-dizan pou amontr koman son panyé lé kosto... Ronflé k'i di !

 Zot i koné kossa i lé in mèl ? Sé in ron la pyèr tayé. Kan i frote dé ron, inn-déssi l'ote, sa i pèrmète moud mayi... I mète mayi an grin dann in trou ron fé éksepré pou sa, tayé dann la pyèr par an-o. Avèk in mansh i fé tourn la pyèr par dsi, sète déssou i bouz pa. Aprésa, mayi mouli, i sorte déssi le bann koté, épi i tonm déssi in gouni... Zot i koné sirandane-la ? Dovinète bann marmay ? Sak i di : "kossa in shoz ? Mi manz par la tète, mi kaka par lo rin ?". Alors kèl répons zot i donn amoin-la ? Zot i koné pa ? Oté, bann koulou, sa moulin mayi, konm mi sorte dir azot na in pti néstan... Par l'fète, pyèr-la lé lour é i fo ou na la pongn pou fé roul ali... I fo ou lé for pou mète ali dann panyé mazik... Moin lé près sir, si bann z'ansète l'avé pa donn in kou d'min Tizan, zamé li nora gingn sharj pyèr-la dann panyé, pars i fo pa bliyé, Tizan sé in pti maramy é la pyèr sa lé byin lour. Lo pti marmay la forsé, lé vré pou vréman, mé son z'ansète la byin ède ali.

Kriké ! Kraké ! Ti panyé monté ! 

Tizan i shante, déssi in l'èr d'la mori griyé : "Ti panyé, ti panyé monté, ou va minn amoin an-o la-ba. Ti panyé, ti panyé monté ! Awaya… Ou va mène amoin an-o la-ba"... I nkroiyab ! Ti panyé i monte, i monte, i monte. In néstan li la fine désote pyé koko, in néstan li la fine trap niyaz, bann sak lé pli ba. Kèl pyèz tizan i sava drèss kabaré pou Grandyab ? Li sava sové, sansa fé in n'ote trik ? Tir son vanzans ? "Landroi li lé, Grandyab lé konm in pti tonm-pous, dizon in poupète… lé pti, lé pti, lé pti, oui mon fra... Lo pti marmay lé rante dé kèr : inn i di ali « sov atoué, ti kouyon ! ». L'ote i di ali : « Sa té i vé manz aou sa ! I fo tir vanzans ! ». Pran pa pityé pou kanar boitante ! Tizan i koné pa kossa i fo fé. Toudinkou, in l'idé i pass dann son tète : li garde mèl-la, li gard dann fon, li garde mèl-la, li garde dann fon. Mon dyé ségnèr kossa li sava fé ?

Kriké ! Kraké ! Vanzans ! 

Tizan i arlèv lo mèl. Li mète sa déssi l'bor panyé... Li gard dann fon : grandyab lé dann fon la-ba, in pti aryin ditou... In pti poupète. Tizan i palank lo mèl dann fon. Ou-ou-ou-ou. Mèl-la i tourn dan lé z'èr, i sava in koté, i sava l'ot koté. Sé konm k'i diré nana in n'afèr i pilote ali : mazik ! Mazigador ! Mazik ! Mazigador ! Grandyab i oi lo z'afèr i fons déssi li, li sèy fé dé fyink pou évité. A droite, a-gosh, a-droite, a-gosh. Tro tar !

Koton mayi i koul !

Rosh i flote ! Paf déssi la tète grandyab. I fons ali dan la tèr. Pi d'Grandyab ! Grandyab lé mor. Tizan i fé dsann son mashine. "Ti panyé désann ! Ti panyé désann ! Ti panyé désann !"... Ti panyé i poz dousman déssi la tèr, kosté landroi la mèl i lé.

Dizyèm morso la fini, somène proshène, nou va oir lo onzyèm... In zistoir gramoun lontan la rakonté é G. Gauvin la armassé.

L'avé inn foi, pou inn bone foi, dan la vil dé foi, méssyé lo foi, la manz son foi, èk in grinn-sèl Dë mo pou rézimé :

2009-10-30T23:06:00Z

 Grandyab èk momon Tizan la sign in spès kontra la mok. Lo madam i pran toute sak èl i vé dann zardin lo dyab é kan son marmay lé éné, lo monstr i pran pou li manzé. Tizan la v'nyabou shape avèk son déstin ziska in zour lo dyab la karsèr ali, la mète ali dann in kaj... Lo zour l'arivé pou manz ali... Mé, oila, bann vyé z'ansète lo pti marmay la donn ali in tik-tak pou li shapé. Zistoir panyé mazik i komans konm sa.

Névyèm morso : Ti panyé monté ! 

 Donkalor, Tizan la guide Grandyab pou fé lo panyé, avèk in bon paké lyane shèvré fèy : ou i komans par tranp lo paké lyane dann lo bouyant, ou i tir la po déssi, aprésa i fo trèssé... In romark pou fé : si zot i vé sa i marsh, i fo zot i shante : "tréssé mon panyé, tréssé ! Tréssé mon panyé mazik ! La-o dann syèl ou va monté ! Mi koné ou va amène amoin la-o. Tréssé mon panyé, tréssé !".
Hin ! Déssi kèl l'èr i shant sa ? L'èr k'zot i vé, mèm l'èr la mori griyé, ou sinonsa l'èr in vyé mizik séga, ou byin maloya. Bou di kont, in l'èr i sort dann tréfon z'ot tète... Lo dyab la zamé trèss in panyé, mé manyèr Tizan la guide ali, li la vnyabou fé. Ala lo panyé lé fine fé : in zoli panyé pou vréman. Kossa i fé éstèr, Grandyab i pans li sava sote déssi Tizan épi an dé tan-troi mouvman, li va dévor lo marmay... mé, Tizan i di ali "éstop ! I fo séyé pou oir si i marsh ! Pou sa, i fo ou i larg amoin pou moin pilote lo mashine !".

Kriké ! Kraké ! Tizan i ésèy lo mashine ! 

 Tizan i done parol Grandyab, li sov ar pa. L'èr-la, lo bébète i larg in kou lo marmay... Tizan i rante dann panyé épi li shante : "Ti panyé monté ! Ti panyé monté !". Oté ! Inkroiyab mé vré ! Lo panyé i mète a monté. Ala, li monte par-la in mète, ala li ariv la otèr bann ti pyé d'boi, li monte, li monte ankor... Li désote bann toi. Grandyab i pans Tizan i sar shap avèk li...
Dépi an-ba, li kriy :"Ou la done parol, ou i sov pa ! Ardésann aou ! Ay-ay-ay, alé fé konfyans demoun ou !". Momandoné Tizan i déside ardésann. Li shante :"Ti panyé désann ! Ti panyé désann ! Ti panyé désann !"... Inkroiyab, panyé-la i ékoute épi i désann, i désann, i désann épi i poz a tèr koté Grandyab. Ou i parl si lo l'ogr lé kontan : son kari lé la ! Mé Tizan la pankor fini avèk li. Li di, lo dyab, éstèr i fo li monte son tour dann panyé. Lo dyab i vé pa, mé lo pti marmay i fé konprann ali sa in n'afèr obligatoir... Donkalor, Grandyab i monte dann panyé. Dépi a-tèr, tizan i komann lo mashine.

Kriké ! Kraké ! Grandyab i séy son tour !

Grandyab, mi pé dir azot, lé pa fiyèr. Kaziman, li moul poiv pars li la pèr tonbé. Sirtou ké panyé-la i pran la otèr... Mazine in pé Tizan, i fé monte ali an-o, an-o, pli o k'an-o. Talèr solèy lé riskab bril ali. Talèr, Bondyé i souk ali dann syèl. Koman li va fé, si in n'afèr komansa i ariv... ala ké li kriy, ala ké li irl, alal ké li grongn, mé i fé l'èr pèrsonn i antann pa li. Solman, momandoné, Tizan i arfé dsann ali. Lo bébète i ariv a-tèr. Son kèr i bate dann son do... In pé plis li touf an plas, mé kan Tizan i di ali :"Gramoun, paryé panyé-la, i ral aou, amoin épi la mèl moulin mayi anlèr dann syèl. Ou i koné in mèle la pyèr sa lé lour, mé sa i fé pa pèr mon panyé mazik " Grandyab i fé non ! Konte pa dsi li ! Tizan n'a ka alé tousèl, li épi son l'èspès mèl an pyèr... Donkalor, Tizan i rante dann panyé, li mète lo mèle koté li épi monté k'i di.

Koton mayi i koul, rosh i flote ! Zistoir la pankor fini, in zistoir demoun lontan la rakonté é G.Gauvin la armassé. La proshène foi, dizyèm morso : Paf déssi la tète Grandyab !

Uityèm morso : lo sogré d'Tizan, lo panyé mazik !

2009-10-23T23:15:00Z

L'avé in foi, pou inn bone foi, dan la vil de foi, méssyé lo foi la manz son foi èk in grinn sèl !

Dé mo pou rézimé : Tizan lé dann malizé. Grandyab la karsèr ali, la mète ali dann in gran kaj épi la byin fé konprann ali kossa i sar ariv ali. Solman, konm lo pti marmay lé pa tro gra, lo bébète la déside donn ali gro manzé, pou fé pous in bonpé la shèr déssi son bann zoss. Pars sa mèm lo gou lo dyab. Tizan lé malis, li la déside manz zis sak i fo pou pa mor, mé galman pou pa nir gra... Grandyab i anpé pi avèk la kolèr, é in soir, li la di lo marmay, karéman : « Domin, mi manz aou ! Kisoi gra, kisoi mèg, mi gingn pi atann ! Prépar aou pou alé dann mon marmite !... ». Malèr ! Malèr ! Krémizèr d'in sor ! Koman i fé la ?

 Tizan, dann son kaj, i domann son bann z'ansète pou ède ali... pou donn ali in l'idé pou shap avèk sak i rosanm byin son déstiné... Dépi avan son nésans, son l'avnir i rosanm la fine marké, é kan oute déstin la fine marké, lé dir oui pou shape ansanm. In gran nuite pou kalkilé, in gran nuite pou atann in tik-tak i sorte loin épi i ariv. I ariv, i ariv pa ? Sa sé sak ou i koné pa, pars l'éspri bann gramoun fini mor i koz pa klèrman. I di mèm zot i parl an barok, alor, alé oir sa an klèr, si ou i nyabou. La nuite i pass. Tizan i fé mové rèv : li oi li, in koté son kor ziska kolé, épi son tète détashé tèr la-ba dann karo zèrb. Li révèy d'in kou, li tate pou oir si son tète lé touzour déssi son zépol : tan myé, lé la ! Mèrsi mon dyé, ma bone vyèrz. Mèrsi mon bann vyé zansète ! Mèrsi pa abandone amoin, pars mon déstiné lé pa zist pou vréman. Mèrsi, donn amoin in solisyon... Aprésa, Tizan i ral in karang. Sa i vé dir li fé in somèy. Pa in gran somèy, mé kant mèm, i ropoz in pé léspri. 

  Kriké ! kraké ! Grandyab l'arivé !

Tizan i antann, loin la-ba, la klosh légliz apré sonn katrèr d'matin : kass-marmite ! Kass-marmite ! kass-marmite ! Diguiding-ding, diguiding-ding ! Kass marmite, kass marmite, kass marmite !... Toudinkou, konm in gran souf la briz, Grandyab i rante dan la grote. Lo kite ta bouète, i vé pou vréman, fé sak li la di. Li alime dofé, li mète dolo dann la marmite konm demoun kan i sava plime poul sansa grate la po koshon. Pisyak ! Pisyak ! Pisyak ! Li frote son gran kouto déssi la rosh blé, konmsa i koupe myé... Aprésa, li vyin dovan Tizan, épi li di : « Alor, l'èr l'arivé la ! Si mi konpran byin, ou la pa nyabou sové ». Mètr an mètr nana son mètr ! Tizan i di pa aryin, pars i ansèrv de riyin koz avèk in moun nana mové l'intansyon konm sa. Mé konm di lo patoi : « Tan k'nana la vi, nana léspoir ! Alor vi k'nana ankor la vi, nana ankor léspoir ! ».  Lo pti marmay i kalkil, i kalkil, i kalkil mèm. Kossa li sava trouv pou anbrouy so vilin bébète-la ? Plito, kossa son bann vyé zansète i sava di ali fé pou anbrouye vilin bébète-la ? Lé pa sinp : kan dolo la rivyèr i sava dan la mèr, koman ou i sava fé pou fé romonte ali ziska la montagne. Koman ou i sava fé pou shanj oute déstiné ? 

  Kriké ! Kraké ! lo sogré d'Tizan !

Grandyab lé okipé, plis k'okipé, li lé aféré pars la pa tou lé zour ou nana in bon kari konmsa — in bon kari pou in dyab ! Pa pou in moun normal ! Donkalor, li l'apré fé toute son mazigador. L'èr-la, Tizan i apèl ali, li vyin. Lo pti marmay i di ali : « Na in n'afèr ou la pa prévi. Ou i koné, déssi la tèr, shakinn nana in sogré é li pé pa alé san donn sa dèrnyèr pèrsone la vi ali an vi. Donk, vi k'sé ou ké va oir amoin an dèrnyé, sé a ou ké mi doi donn mon sogré ! ». Grandyab, dann son kèr, i domann kèl pyèz ankor lo marmay la mate pou li. Li fé pou répons : « Kossa ankor so zistoir d'sogré ? Ou i pans moin lé né yèr, kan la pli la fé pous shanpignon ? Ou i pran amoin pou la moityé d'in kouyon ?... Solon moin, ou l'apré mate in plan ou-la ? ». Tizan i fé pou répons : « Non ! Na poin lo plan pou maté-la ? Sa lé konmsa, é si ou i réspèk pa so tradisyon… tansyon pangar ! Ti pé traka i vyin pou ou la ! Ou i sava plèr larm dé san ! ». Grandyab la gingn la krintiv. Li la domann kossa i lé lo sogré. Tizan la fé pou répons : sé in késtyonn panyé mazik ! Astèr, lo pti marmay la fine di tro ou pa assé, é lo dyab la fine antann tro ou pa assé. Astèr, i fo di la suite... absoliman ! I fo ékoute la suite… absoliman ! Lo dyab i san li lé mayé, é Tizan lé mayé ossi, pars li la zamé antann parl panyé mazik, li la zamé brikol in panyé mazik, mé li konpran sa in pyèz pou lo dyab son vyé famiy la maté ! 

  Kriké ! kraké ! Koton mayi i koul ! Rosh i flote ! 

La fini drèss kabaré ! Lo pyèz lé dréssé !
Proshène foi, nou va oir kossa i lé so zistoir d'panyé mazik. Névyèm morso : Lo panyé mazik : Ti panyé, monté !

In zistoir demoun lontan la rakonté é G. Gauvin la armassé.

Sétyèm morso : lé gra, lé fine gra, la pankor gra !

Georges Gauvin — 2009-10-16T22:35:00Z

Dé mo d'rézimé pou komansé :
Mi koné pa si zot la fine antann kozman-la, sak i di : 'Tro konfyans i tyé prékossyon !'. Sa lé byin vré ! Pars, toultan k'Tizan té i méfyé, Grandyab la pa gingn souk ali. Kan li la vni tro fyèr, kan li la prann konfyans dan li, li la fé karsèr ali. Donk lé ga, porte antansyon, pangar malèr lé riskab ariv pli vite ké zot i kroi… I di pa : 'lo bonèr i avans an sharète, é lo malèr i pran l'oto !'. Ala Tizan lé pri dan la kol jak, ala li lé fèrmé dann in kaj konm in pé i fèrm zoizo d'dan, sansa koshon d'Inn, sansa d'ote kalité béstyol ankor. Kossa i sava ariv ali ankor ! Kèl traka li sar gingn ankor ?

Ala grandyab i sava, avèk son kaj dann son min. Ala k'li monte dan lé-o. Ala k'li ral Tizan dann spès grote li abite. Kan la fine ariv dann grote-la, li akrosh lo kaz avèk in zargano, i sorte an-o, épi i désann ziska in otèr d'moun apopré ! Lo soir la fine arivé. Solèy la fine lav son pyé. Grandyab, i alime dofé, épi li fé kui manzé : manzé byin gra, manzé byin rish, manzé byin sossé !Aprésa, li mète manzé dann in gamèl, in kiyèr do boi dann gamèl, li done sa Tizan épi li di : « Manz sa, konmsa ou va vni graé-graé ! ». Tizan la fain, li manz, mé kan li kalkil pou kossa li l'apré manzé, pou li an avoir in bon vyann é lo dyab manz ali... touzis si li trang pa. Mé kan ou la fain, ou la fain ! Sa lé konmsa é pa otroman. Dé tou tan, lé konmsa ! Sé la natir k'i vé sa ! I di pa, la natir nana orèr di vide, donkalor si lo vant lé vide, lo lésytomak lé vide, l'èr-la manzé i rante an vitèss, pou ranpli la plas lé vide, ziska lo vante la fine pléné.

Kriké ! Kraké ! Ladomin Grandyab i komans pétri ali, pou oir si li la grassi !

La nuite Tizan i dor dann kaj-la. La zourné , li lé dann kaj-la mèm. Pou manzé, li lé la ! Pou boir li lé la ! Pou fé toute komodité la vi, li lé la-dan mèm... Sétèr d'matin par-la, Grandyab i ariv. La li pran pi prékossyon, pars lo marmay lé fèrmé dann son kaj. Zis in n'afèr, lo dyab i amène in shate, konmsa si tizan nana la movèz idé shanj an ra, li koné kossa v'ariv ali. Mi préfèr dir azot, kan Tizan i oi lo bèl shat, l'anvi shanj an ra i pran pa li.
Lo dyab, i bour son vilin min plin la plime, èk son gran zong, dizon son bann grif, dann lo kaj. Li rode in boute nana normalman byin la shèr épi li di, an tatan lo pov marmay : « Lé gra ! La fine gra ! La pankor gra ! »... Aprésa, li shante, sansa li margongn, sansa li shante an margognan : « A grassi aou vitman ! grassi aou vitman ! Konmsa moin va manz aou ! ». Tizan la fré ziska dann zo, pa si tan tèlman par la tanpératir, mé pars li koné kossa i atann ali, épi lo kontak avèk in bébète la pa lo pli méyèr k'i pé égzisté. Koman i fé la ? Si li manz byin, li va grassi épi lo dyab i tard ar pa pou fé kui ali… arzoute èk sa lo bébète i amontr ali byin lo marmite pandiyé dsi l'fé. Mon dyé ségnèr, mari-zozèf shyin mèg ! Si li manz pa konm k'i fo, lo dyab lé riskab bour lo boute in l'antonoir dann son gozyé pou bour ali konm kanar. Kèl traka ! kèl tablatir !kèl annuiman !

Kriké ! Kraké ! lo marmay i diminyé manzé !

Tizan, zot i koné, sa in marmay malis sa ! Alors, li di dann son tète : I fo mi manz zis konm k'i fo san égzazéré, konmsa grandyab va pans mon vyann lé pa ankor byin bon... Li va gingn in zour, dé zour, pétète plis, lo tan trouv in tik-tak pou shap avèk lo dyab... donkalor, li manz moins é pou k'lo dyab i romark pa, li donn in pé lo vilin shate. Sète-la, i manz an konfyans, i manz an goulipya : kap ! kap ! kap ! vi k'sé pa li k'sar manzé... Grandyab i vyin, i tate ali mèm : « Lé gra ! Lé fine gra ! Lé pankor gra ! ». Plis lo tan i pass, oplis lo dyab i komans pran la kolèr. Li rode ousa Tizan i zète son manzé, li trouv pa. Li rogarde byin lo shate, mé lo shate i s'anfoutsa. Son konsyans lé trankil ! Grandyab i kalkil mèm, kalkil mèm, kalkil mèm ! Li shante, li grongn, li grongn, li shante : « A ! grassi aou vitman ! grassi aou vitman ! konmsa moin va manz aou ! ». Tizan i fé l'inossan, i fé konmsi li la pa konète aryin. Spandan, li romark na konm in flanm dé fé dann zyé lo bébète. Li komans trakassé, pars li konpran byin l'ote i tarde pa pou pèrde pasyans.

Kriké ! Kraké ! La klé dann mon posh, la taye dann oute sak !

In zour, lo dab i ariv pou prépar manzé Tizan. Lo tan, lo manzé lé o fé, li tate, li tate, lo pov marmay. Li di : « lé gra ! Lé fine gra ! la pankor gra ! ». Lo bébète lé an kolèr-la. Li di : « Kossa ? Tousa manzé ou i manz épi ou lé ankor mèg konmsa ? ». « Domin, gra, pa gra, mi tyé aou, é mi fé kui aou. Tanpi si i fé mal ! ». Tizan lé trakassé. Li di dann son kèr : « zène koman moin, la pa l'èr pou mor ! Mon bann z'ansète donn amoin in tik-tak, in éstratézi pou shap avèk so l'og la ! ». Aprésa, li dor in pti pé, konm di lo kont, li ral in pti karang...

Zistoir la pankor fini, in zisrtoir bann z'ansyin la rakont é G. Gauvin la armassé.

Somenn proshène, uityèm morso : lo panyé mazik !

Sinkyèm morso : Tizan langouti rouz

2009-10-02T23:45:00Z

Lavé inn foi, dan la vil de foi, méssyé lo foi la manz son foi èk in grinn sè l !

Zot i ansouvyin, dann katriyèm morso, Grandyab la vni souk Tizan pou li manzé, mé lo pti marmay la vni a bou shapé. Koman li la fé ? Li la transform an ra épi li la vni manzé. Kan Grandyab avèk momon Tizan té i atann oir in pti garson arivé, zot la vi in ra... Grandyab lété bandé an trann-sis, li la dmann momon Tizan si i pran ali pou in manzèr d'ra épi li la foute lo kan... Mé li la promète li va artourné. Lo tan la passé épi in zour li la rovni pou kol Tizan. Ni sava oir son rotour dann in sinkyèm morso k'i nonm "Tizan langouti rouz".

Kan l'ariv zistoir lo ra, Grandyab lété rousté vèy pa ! Alor, konmsa, so madanm-la la pa gingn in zanfan, mé in ra. Lé pa possib in n'afèr konmsa ! Moin lé sir zot l'amène amoin ankor an bato ! Moin lé sir lo ra té pa zanfan madanm-la. La, l'amène amoin ankor an sharète shaviré ! Sa i marsh arpa konmsa, i fo mi mète sa o-klèr. Donk in zour, lo bébète i ardsann la kaz Tizan. Li koz èk momon Tizan. Li di konmsa : « Alor konmsa ou la pa gingn in zanfan, ou la gingn in ra ? ». Momon Tizan lé riskab mor avèk la onte, èl i di : « Non ! Moin la gingn in bon zanfan pou d'bon, pa in zanfan sèk, pa in monstré, pa in zanfan kontrofé, pa in ra, byin antandi ! ». Poitan, Grandyab la byin antandi kriy « la poin pèrsone ? » épi li la vi in ra manz lo manzé konm in goulipia… alor momon Tizan i di avèk lo bébète — konm di lo patoi : bèf i trap avèk la korde, demoun i trap avèk la lang ! — èl i di : « Alé dovan son lékol domin, ou va oir si sak mi di sé la plézantri. Ou va arkonète ali, vi k'li va mète son pti langouti rouz. Ou na ka domann tizan langouti rouz ! ».

Kriké ! Kraké ! Tizan i sava koz in pé èk son z'ansète

Momon Tizan i koz, Grandyab i koz, mé Tizan l'apré ékoute azot. Lo zanfan la fine pran l'abitide artourn son kaz san fé dézord, pars li koné in gran dézagréman i pé tonm déssi li. Dépi k'li koné komèrs son momon la fé avèk lo dyab, li sé pi lo mèm marmay : li dor pi déssi son dé zorèy, la nuite li ékoute pou oir si lo dyab i arvyin pa, li santi l'odèr lé shoz pars in dyab, sa i doi an avoir in l'odèr éspésyal, sirtou pa l'odèr la roz-édouard, konm mon défin gro momon té i di. Li rouv son zorèy, li kart son né, épi li rogard byin pou oir si na poin in n'afèr la bouz initil... Sé konm sa k'li la antann lo kozman rant lo monstré épi son momon... Li ro-sava déssou pyé d'boi pou koz in pé avèk son bann l'ansète. Pou ède ali trouv in solissyon.
Kan mi di li koz, la pa in vré kozé. Plito, li oi son z'ansète dann in somèy épi banna i konsèy ali. Konmsa mèm li la fé in rèv, épi dann son rèv, son vyé zansète la di ali konm de koi i fo li ékoute, li santi é li rogard byin toute z'afèr, pangar lo dyab lé dann z'anviron... Fini ral son karang, li rotourn son kaz, li oi kosté son li, déssi son pti tab, son momon la fine mète son pti kabaye rouz. Li pans : « Ala lo pyèz ! ».

Kriké ! kraké ! Nout toute Tizan langouti rouz !

Apré manzé lo soir, Tizan i pass par la fénète épi i sava oir son bann ti kamarade inn apré l'ote. Li di in n'afèr. Konm banna lé byin kamarade sanm li, i ékoute ali byin. Sé pou sa landomin, toute marmay la mète z'ot ti kabaye rouz. La métrèss i trouv in pé drol toute marmay lé abiyé parèy, mé kan èl i domann, pèrsone na poin aryin pou dir. Zil, pou kossa ou la mète oute ti shomiz rouj ? Zil i fé pou répons : « Bin, konm sa mèm métrèss ! ». Zérar, pou kossa ou l'abiy konmsa ? Zérar i réponn li koné pa si lété défandi. Mèm répons avèk Rolan-ron-ron, kolyé l'aye, ou sinonsa Tonm-kriz ou byin Parlpa. La mètrèss, ké lé pa pli kouyon ké zot, la konprann l'avé in n'afèr, mé konm i di pa èl, èl i fé konmsi, o final, sa i intérèss pa èl.
L'èr midi la fine arivé, Grandyab i ariv dovan la kour lékol. In bann marmay l'apré zoué : lou kouri li ! koud pyé bourante li ! La marèl li ! Grandyab i an apèrsoi toute bann ti garson nana z'ot shomiz rouz. Koman i fé pou konète kissa i lé Tizan an parmi ? Grandyab na konm in l'idé. Li kri lo bann marmay : toute sak lé an rouz i vyin. Li domann : « Kissa rantre zot i apèl Tizan langouti rouz ? ». Bann marmay i réponn : « Nout toute Tizan langouti rouz ! » épi zot i pète a rir.

Koton mayi i koul, rosh i flote ! Grandyab i manz son raz ankor in kou !

Grandyab lé an kolèr, li grongn konm lav dann rin volkan, son zyé i krash lo san, son dan i grins konm roulman bann mashine ! Mé bann marmay la fine ariv loin...

Sinkyème morso la fini, somènn proshène nou va oir lo sizyème : "Koman Grandyab la vni a bou karsèr Tizan !", in zistoir gramoun lontan la rakonté épi G. Gauvin la armassé.

L'avé inn foi, dan la vil de foi, méssyé lo foi, la manz son foi èk in grinn-sèl

2009-09-25T22:59:00Z

Zot i souvyin, momon Tizan, kan èl l'été an voi d'famiy, la parti rode de myèl épi frui dann in zardn éstraordinèr. Par l'fète, zardin-la lété zardin Grandyab. Donkalor, èl té konm oblizé aksèpt in drol propozisyon : manz toute bann frui èl té i vé, boir toute lo myèl ziska an avoir son kontantman, mé done son zanfan kan li va énète. Byinsir, momon Tizan la pa réspèk son promès-forsé, mé in zour lo dyab la pèrde pasyans, li la parti rode momon tizan pou réklame son kado. L'èr-la lo marmaye la fine ariv in bon grandèr vi k'li sava l'ékol é zour-la konm fé-t'éksepré li lété lékol, alor lo léspès l'ogre la déside atann lo zanfan pou kap ali kan li v'arivé. Ay-ay-ay ! Kèl doulèr mon dyé ségnèr !

Katriyèm morso : koman tizan la transform an ra pou roul Grandyab.

Ala lo pti marmay i rotourn l'ékol. Li lé pa tro prèssé, so vante lé pa vide : li la fine manz in rafal gouyav, zanbrosade, sriz é d'ot shoz ankor, li la trouv dann bordaz shomin, sansa li la parti rodé dann propriyété d'moun. Li ariv son kaz : li lé kontan vi k'li sa oir son momon, mé na in n'afèr, konm in voi, i prévnir ali i di ali : « Tansyon ! Alé pa ! ». Lo marmay i avans dousman-dousman épi li antann in gro voi, konm si son momon l'apré koz avèk domoun. Li ékout mèm ! A, la voi lé an kolèr. A ! I parl dé li, i di konmsa : « Moin la vni shèrsh out ti garson pou moin manzé. Si li vyin pa moin sar blizé manz aou son plas. Mon kor la bézoin la shèr himène ! ». Li akoute ankor épi li antann son momon apré plégné. Èl i di : « La pa mon fote, si marmay-la i tarde pou rante la kaz… doioir li la parti tréné avèk son bann ti-kamarad ! Inkyète pa, i fo li rotourn la kaz… Kansréti pou manzé ! ».

Kriké ! kraké !Tizan i artourn dann shomin pou li arfléshi !

Lo marmaye i konpran pa kossa i ariv. Sèl z'afèr, li koné, sé k'in spès dyab i atann ali son kaz pou manz ali é d'apré sak li la antandi son momon lé pa kont k'i manz ali. Li sava desou in gro pyé mang pou li kalkilé, kalkilé, kalkilé. Li kalkil koman li sava shapé, pars sak li lé sir sé k'banna i sar mète pyèz pou li, é d'apré sak li la antandi z'afèr lé séryé. Tizan i priyèr son z'ansète pou trouv in tik-tak. Sov la kaz ? La pa bon, li lé tro pti ! Ousa li v'alé ? Kissa va armass ali ? Kissa va fé son soin ? Lé vré li lé malis, li lé fourné, li lé pa malade, mé kissa i sava pran son résponsabilité ? Non, li pé pa viv san famiy. Sa lé pa fézab... Li priyèr son bann vyé z'ansète, li domann ède ali trouv in manyèr pou shape avèk lo pyèz. Demoun étranz la di ali, li l'avé in aryèr-aryèr gro papa té i fé la mazigador. Banna té i di mèm, lo boug té i transform an zanimo. Té i kroi li la pèrd… lo tan té i pass épi, in nuite li té i artourn konm si dé riyin-n'été. I paré demoun la véyé, véyé, par dsi véyé, avèk la krintiv dann kèr épi la konm vi, in ra pran la form lo l'aryèr-l'aryèr-l'aryèr gro papa. Éstèr, sa lé vré, sa lé pa vré ! Mi koné pa. Gramoun lontan té in bon pé mantèr ! Alors, kossa i fo fèr ? Tizan lé dann l'indivi.

Kriké ! Kraké ! Tizan i transform an ra !

Moin la touzour antann dir, nout vyé z'ansète, mèm si zot lé mor, zot i kontinyé avèy déssi nou. La prèv ? Tizan i gingn in pti somèy, li ral in pti karang déssou pyé d'boi. Dann son somèy son aryèr aryèr gro papa i vyin rann ali vizite épi i fé konprann ali la pa bézoin li inkyète, li rant son kaz konm aryin, léspri bann z'ansète va avèy déssi li.
Tizan i lèv épi li pran la diréksyon son kaz. Dopi baro li kriy, son momon li l'arivé. Son momon i mète son pla manzé déssi son pti ban épi Grandyab i kashyète dann koin é son momon, dann in n'ot koin, i ral lo kèr. Tizan i rante dan la kaz. Mé la pi in zanfan, sé in ra k'i rante dan la kaz... Li fofil, li oi lo manzé... li kap in boute, li sar kashyète,.. apré li rovyin, li arkap in boute, ziskatan na pi aryin dann z'asyète. Ziskatan li la fine balèy toute lo pla manzé. Grandyab i di lo madam : « Sé sa oute zanfan ? Sa in ra sa ! Ou i kroi mi manz lo ra ? » ..An kolèr li pran son shomin li sava, mé li kriy for : « nou va artrouvé ! Éspès de l'éspès, l'éspès ! ».

Kriké ! Kraké ! Koton mayi i koul, rosh i flote !

Grandyab lé bandé an brinn zing .Do fé i sorte dann son trou d'né, lo san, konm dé brèz rouz, i sorte dann son dé zyé. Li sava mé avèk li, lé zamé fini. Nou va oir la somènn proshène la suite lo zistoir gramoun lontan la rakonté é G. Gauvin la armassé. Somènn proshène : sinkyèm morso, Tizan langoutiy rouz .

Lavé inn foi, dan la vil dé foi, méssyé lo foi la manz son foi èk in grinn sèl

2009-09-18T23:00:00Z

Zot i ansouvyin koman Grandyab la bosh momon Tizan dann son zardin éstraordinèr kant èl la parti rode son famé lo la poin lo gou gronouy é profite l'okazyon pou trap inn-dé frui éstraordinèr. Zot i ansouvyin galman kèl kontra Grandyab la obliz lo madam pou aksépté : lo myèl son rivyèr avèk lo bann frui an éshanz lo zanfan va énète, pou Grandyab manzé.

Kriké ! Kraké ! Momon Tizan i kontinyé frékante zardin Grandyab !

Mi koné pa kossa zot nora fé la plas momon Tizan kant Grandyab la fé aèl son propozisyon. Mi koné pa si zot noré pa sinploman shape avèk la mass, rode in mok lo bénite pou protèz azot, sansa alé oir in dovinèr pou gingn in garanti d'protéksyon. Shakinn son kroiyans, shakinn son l'opignon. Momon Tizan, pou son par, la kontinyé alé dann zardin éstraordinèr shak foi k'èl l'avé bézoin, kisoi do myèl, kisoi lo frui... Mèm son mari té i fé aèl armontrans, èl té kontinyé alé : papa Tizan té trakassé, mé èl lété pa la èk sa. Sak i doi arivé i doi arivé : in zour, lo madam la komans an avoir doulèr pars té l'èr pou èl gingn son pti baba. Papa Tizan la parti shèrch in matrone byin koni dann l'androi, é lo madam la byin akoushé… in zoli pti garson pa kontrofé ditou, byin kosto, byin korporé épi déza léspri vif, té falé oir... A konté di zour lo zanfan lé éné, lo madam la okip son baba byin konm k'i fo.

Kriké ! kraké ! Grandyab i déside alé rode son kado

Lo tan i pass épi Grandyab i oi pi momon Tizan. Li di dann son kèr : « Lé pa possib madam-la l'apré sèy fyone amoin ! Èl i koné pa moin lé mové don ? É konm mi koné amoin, moin lé riskab manz toute la famiy : lo zanfan li, lo madam li, lo papa galman ! ». Lo dyab i san toute sa movèzté l'apré monte déssi li... Son bann dan i grins, lo san i kimile dann son zyé, son grif i sorte tou-sèl épi dann son vante i sorte in grongnman konm dann trou volkan.
Son kolèr la fine passé, li déside alé shass son byin : donkalor, alé rode son kado. Promès sé dète, mèm si lo promès té in pé forsé. La pa dir : li v'alé lo pli prosh landroi nana d'moun, li va rodé. Si li trouv pa tousèl, li va domandé. La pa possib li mète pa la min déssi madam-la é déssi son zanfan. Donk, in zour, lo dyab i déside alé fé son léspédisyon : mèm lé loin, sa lé pa pou fé pèr ali. Pou ariv l'androi, li va arivé ! Pou trouvé, li va trouvé ! La poin pou shapé.

Kriké ! Kraké ! Sé konm sa k'in zour, Grandyab i ariv la kaz momon Tizan

Afors marshé, afors rodé, lo dyab i fini par ariv dovan la kaz momon Tizan : i fo dir li la aranz ali in pé, i fo dir li la bingn ali in pé, i fo dir galman li la mète in linz konvnab déssi li, i fo dir ossi li la pa di kissa li lé, é kossa li vyin fé. Donk demoun la done ali toute ransègnman li té i domann é li la fini par ariv dovan la kaz lo madam.
« Na poin pèrsone ? Na poin pèrsone ? Na d'moun ? » Grandyab i kri mèm. Momon Tizan i sort dan la kaz, i avans dann l'alé. Èl i an apèrsoi lo dyab, mé sète-la galman i oi aèl. Tro tar pou shapé. Son kèr i bate for, mé dann èl mèm, èl i pèz son kèr épi èl i di k'i fo zoué séré. Èl i fé rant lo dyab dann son kaz, èl i domann si li la fé bon voiyaz, kossa li rode, étsétéri, étsétéra, la ké lo ra... Lo dyab la pa anvi plézanté, i akab aèl avèk roprosh : li di konmsa èl la fé in promès, mé èl la trahi so promès-la, èl i méritré li manz toute la famiy ! Momon Tizan, lo san i frédi : èl i rode in manyèr pou défilé, èl i trouv pa. Èl i rode in tik-tak pou aranz son ka, na poin aryin pou fèr. Mèm, momandoné, èl i san lo dyab lé an kolèr : son dan i grins, lo san i rouzi son zyé, son fourir i soulèv konm si na l'van, é in drol brui i sorte son vante konm dann lo rin volkan. Mamère, foutor d'in sor ! La, èl la pèr la !

Kriké ! Kraké ! Grandyab i domann Tizan pou li manzé

Grandyab i an apèrsoi lo madam na la krintiv dé li. Li di avèk momon Tizan li la poin lo tan pou pèrde, i fo done ali lo zanfan pars li la pi pou diskité ! Mé lo tan la fine passé dépi, momon Tizan la akoushé. Lo marmay lé gran, pa tro gran koman, mé in pti grandèr kom pou alé lékol. Lo madam i di èk lo bébète son zanfan lé lékol, i fo li atann lo marmay. Grandyab lé pa kontan, mé li lé forsé pran passyans : kalkil in pé li sava koté lékol, domoun i arkonète ali, li lé riskab armas in kou d'fizi. Li déside atann Tizan tèr-la mèm, la kaz lo fanm. Sa sé lo méyèr plas d'apré li. Plito k'alé fé oir ali in pé partou.

Koton mayi i koul ! Rosh i flote !

Zistoir la pankor fini : in zistoir demoun lontan la rakonté é G. Gauvin la armassé.
Somènn proshène : katryèm morso : ‘Koman Tizan la fé pou roul Grandyab".