Témoignages

Lindi 12 mars (sinkième boute)

Axel Gauvin — 2024-09-03T02:00:00Z

Boudikonte ala nou là, dan la kour lékol. I porte Ari dann késson kamion. I alonze ali dessi in pti mattla madanm Timoun la-trouve sépa ouça. I poze la tête Ari dessi zenou Lina. Amwin san dmann pérsone rien, mi monte dann késson-là, mi assize dessi lo tas la shêne-kanne.

Kank n'i démare, madanm Timoun i débarke en vitèsse, in gro bol brède dann son min. El la-soizi in brèd eksepré plin la filasse pou anmaïy la pointe zégüi ansanm, pou protèze tant k'i gaingne lo ventr'Ari par en-ddan.
N'i 1 démare. Lina i arlève lo gro tête son frèr ke lé pou tranpire gro transpirassion martir. Malgré shomin défonsé, malgré rossor kassé, n'i éssèye fé manze Ari. Li vé pa. Lina i ansipli ali, i inplore ali. Mwin lé ziska oblizé koze for èk li.
Aforse aforse, ti-guine par ti-guine, trépé par trépé, presk fil par fil, Ari i fini, malgré,
par anvale toute lo gro gamok brède.
Ek lo lanvèr son min, Lina i éssuiye la lèvr' son frér.

Madanm Timoun navé rézon : Ari i souplingne pi ditou, lé trankil, lé repozé – lé pa ropozé koman, soman lé trankil pou toulbon.
– Va niabou sove ali, mi di dan mon tou-sél.
Ari i argarde amwin. Li argarde Lina – èl i fé ali in pti sourir, kourte, soman in vré sourir pou vréman.
– Mi yème Baya, amwin-là, ou i koné ! Ari i di Lina.
– Amwin ossi, èl i réponde, séryé.
– Mi yème ali in bonpé mèm.
Ari i férme son zié, po li arrouvèr toute-suite pou toute-suite, akoz Lina i vien d' azoute dessi :
– Amwin, ou i pé pa konète koman !

Ari i dor déza. Lina i lève son zié pou re-argarde amwin. Là, olèrk kasse son santiman konm èl lé abitié d'faire, èl i vien rouz konm piman, i margrongne prèsk :
– Konmsi k'ou i konéssé pa déja.

1 Nou (i) démare

Justin i interview Axel Gauvin

Justin — 2024-09-02T02:30:00Z

Axel wi pé anparl bann léktèr zoinal Témoignages Boi d'Nèf dann tan ou lété adoléssan,son lékol épi son kantine lo dékor oute roman ?

Mwin lé né, néna kék zané d' ça (la guèr karante té pokor fini !) dan lo pti vilaj Boi-dnèf (Sin Dni). Mwin lé né dann ce lékol mi koze dann mon roman-là, jisteman. Lékol-là mèm la sèrve amwin dékor konm ou i di. Soman kroire pa toute çak mi di la-spasse dann lékol-là !

Inpé la-spasse in ot koté La Rényon ; inpé, in bonpé, mwin la-invanté., soman dapré mwin noré té kapab spassé.Demoun Boi-dnèf, dann temps-là, té maléré, maléré mèm. Zot té i travaïy dür, dür. Té i gaingne pa gran-shoz. Té i rale la mizèr konm i di.

Wi pé anparl anou la vi dann tan-la pou bann zanfan ? pou bann zadilt épi bann problèm lété sète banna, dann tan-la ?kossa wi panss problèm la fain dann tan-la ?

In bonpé marmaïy té i manje pa zot faim. Dann d'ot kartié La Rényon, navé marmaïy té i manje la tèr, jiska ! Po Boi-dnèf Sin-Dni, mwin la-pa antandü ça. Soman in bonpé té mèg, mèg. Lo linj té déshiré. Inpé té i marshe 10, 15 kilomète po vnir lékol, pié tou-nü. Galé té i fé lo trou dan la peau épé zot pié. Inpé po vréman té i atann lékol po gaingne manjé la kantine. In bonpé navé lo vers, lavé-pa manje rien kan la-kite la kaz. Inpé té i tonbe fèb kan té i arive lékol.

Wi pé anparl anou la santé noute lang kréol dann lékol épi an déor lékol ? Kossa ki manke anou pou kol shomin lo bilinguism ?

Nout lang kréol lé bien vivan, i dévlope… Soman néna ankor bonpé travaïy po fé.Shemin lé long ankor. I fo ni travaïy ankor dessi la lang po fé in bon zouti,i marshe bien.I fo nou mèm n'i konpran bien ouça, po nout pëp, i fo ni sava a èk nout lang, kèl travaïy i fo demande nout lang.

Lindi 12 mars (katrième boute)

Axel Gauvin — 2024-08-31T02:05:00Z

Mwin l'apré koure ankor pou fé pète mon fièl : doktèr i monte arpa. Gramoun Trankil i di konmsa li vé pa son gran lauto i gaingne lo shok dann shomin défonsé, dann nid-d'poul, dann kanal la rou sharète la-fé. Touléka lo ravodri i monte arpa.
Li la-trouve in bon rézon, lo monstré :
– Puisque je vous dis que ce n'est pas possible ! J'ai une visite à faire à l'instant. Cette persone-là aussi peut mourir. Ecoutez : vous me l'amenez, il passera en premier.

Konm gramoun Trankil la-konsèye amwin, mi koure, astér, la kaz Méssié Sumard, papa Titone. Msié Sumard sar dakor pou fé pète son kamion, pou amêne Ari lopital. Msié Sumard sar dakor, soman sépa si kamion sar dakor, li ! La koupe lé fini depi 3 mois : lo tas la féraïy lé pou manze zérbe depi toute ce temps-là…
– Ékoute in coup (gramoun Sumard, en mèm temps li koze en mèm temps li ranpli son radiatèr sanm in gran rozoir dlo)… Ékoute : mwin la-toujour gaingne fé démare alu. Démareur i marche pu, mwin na pu lo bra po manivèl, mé soman na ankor in mti grin d' kouran dan la batri. Si ou i shoke lo moteur dan la pante, lu pran. E la pante lé pa çak i mank par issi-en-o. Garde ou mèm.
E li amonte amwin toute lo déboulaz la pante ziska la mér.
Papa Titone i armonte mon moral, i fé bouiye mon trépé-d' sang en mèm temps. Bouiye mon sang : na pwin pou kasse la blag, là !

Axel Gauvin

Lindi 12 mars (troizième boute)

Axel Gauvin — 2024-08-29T02:20:00Z

Ala mi trasse ziska téléfone gramoun Trankil, lo résponsab lo sël téléfone nout kartié. Plus 500 mètr' in vié shomin kasse-kassé, en bosse, en kabosse, en bafon ; lo rosh issi, galé tèrla. Pa ça pou fé mal mon pié : zot i koné lo gou d'ot somin plüs dégréné ankor.
Koça i arive amwin pou mwin mazine mon pié ! Ari ! Zégüi dan lo manzé ! Doktèr ! Téléfone doktèr ! Lina ! Gran traka Lina lé ddan ! Lo Ivone ! Ça kriminèl Ivone-là ! Ce ravodri ! Ce soumir ! Martir Ari lé ddan ! Somanké va mor ! Doktèr laba en ville anba laba ! Lina sanm son traka ! Lina dann son malèr ! Lina ! Lina ! Lina !

Gramoun Trankil i porte pa bien son nom : lé nérvé lo boug, son figuir lé plin laksan, son jèst lé sèk, son kozé i bouskile dann son gozié. Li tourne pti manivèl téléfone-là, li trape konbiné, i réponde pa. Li arpoze konbiné, li arsone, li artrape, li nérve, li arkomanse. Li fini par dire dé-sértin zafèr sirman li pense mèm pa :
– Daoir èl lé pou dormi, lo madanm Alamanda… Madanm Alamanda, lo résponsab téléfone, anba la post'. El lé zoli konm son nom d' flér, soman son boulo, èl i fé pa… Mwin va dire aèl détroi pti kozman kank mwin va désann en ville !
Li arpoze téléfone. Li arsone. Li arnérve ankor in coup. Amwin mi di pa rien, soman mwin lé plus énérvé k' li ankor.
Aforstan d' ésséyé, li fini par zoinde lo madanm Alamanda :
– Sone pou mwin doktèr X siouplé… Bien sir lé préssé !… Mi koné bien kominikassion i passe pa fassilman… Fé vite siouplé… Dégaje aou vittman siouplé ! Dégaje siouplé…

Axel Gauvin

Lindi 12 mars (dézièm boute)

Axel Gauvin — 2024-08-27T02:00:00Z

Mwin té i kroire Gro-Taba té i par vole dessi banna parèy papang dessi zoizo blan. Non
va. : èl i débouze pa. El i fini par trouve in sourir ziska – in sourir en piang 1 , mé soman in sourir.
Titone i nérve son tour, i kriye :
– Lo manjé soidizan jordu noré pu, na pu, là ! Koça i lé ça ? Ça lé pa d'manjé, ça !

Vré pou vréman, manzé néna. Manzé konm dabitide, manzé d'lindi : deri, zariko, bëf.
Pou l'hèr Ari tou-sél la-fine tire son manzé. In takon ! Piton de-riz ! Voyiaz lo grin !
Deux part au moins la viande !
La, Ivone – daoir i gaingne pi anparé – i préfère kole son shomin, alé.

Astèr-là, n'i komanse tire nout manzé pou nou manzé. Pou amwin rienk deri, lo grin…
In mansh kiyèr piman kan-mèm la-di… Tanka la viande bëf…

Toudinkou, Ari cé-d' lève deboute. Li tienbo son gozié, son léstoma. Ondiré toute i brile par anddan. Ondirré kéttshoz lé pou déshire ali par anddan. Li soufèr martir. Zégüi, rienk zégüi !
Lo manzé lé plin sanm la pointe zégüi !
Kiça apark Ivone pou fé in nafèr konm ça-là ! Ouça li lé astèr, ce malfondé k'i apèl
Ivone-là ? Mé koça va sérve anou alé rode Ivone ?

Lina i dégaz vittman pou soutient son frèr :
– Ari, mon Ari !… Koça i fo n'u fé, mon Dieu, koça i fo faire ?
Oui, koça i fo faire ? Nou la-mèm poin in granmoun pou ède anou !
“Madanm Timoun, mi mazine. Madanm Timoun lé sirman dann son kuizine. Lé oblizé na in moun la-prépare manzé-là, avan k'Ivone i mètte la mor ddan. Madanm Timoun va di anou kiça i fo alé krié ; si, pou Ari, i fo lo sho, si i fo lo fré, si i fo garote ali dann kouvértir… si i fo alé rode in kouvértir par là, si i fo mètte ali assiz, mètte ali alonzé, si i fo fé boire, si i fo pa, si i fo… Madanm Timoun va ède anou.
Mi kriye :
– Madanm Timoun ! I fo apèle madanm Timoun !
Pa-sito madanm Timoun fine arivé, toute-suite èl i anvôye amwin téléfone doktér.

Lindi 12 mars (premié boute)

Axel Gauvin — 2024-08-24T02:00:00Z

Zéléksion iér-là i mètte, zordi, defé dan la kantine. Pourtan la bande pou Maisoneuv la-pa vni : lo boug la-pérde !

Fassil zordi pou konète kiçak té i amêne pou lo parti vert : Rémon (pou cèt-là noré pi fé in paryaz san krinte), Adèl, Mité… La diréktrisse ossi nou la-pa vi depi sam'di.

In dézorde ti frèr dan la kantine – kan-mèm Ivone lé là ! Parsk Ivone la-vni, li !

Dann kantine-là, i kriye ! i shante ! i guèle ! In lorkesse zassiète en tol, foursète en férblan, i grêne la mizik. Dann tas, Mano lo promié. Mano lo sèf ! Mano gran diréktèr dézordaz ! En plus ali mèm i fé lo shantèr dan lorkesse :

Maisonneuve lé mor (bis)
La tête anba, la bouji dann ku…

Son romanse – zot i oi par zot mèm – lé plito insolan, lé pa si tan télman fité. Ièr mèm mwin noré kite ça pou la valér. Zordi, romanse-là i fé rire amwin konm in bien-éré : depi tangaz sam'di, koze pi Maisonneuve devan mwin ! Anplus, néna Lina ossi. Lina kontan ! Lina éré ! Lina pou pétiye sanm la-joie !

Mano i arkomanse son shanté, i arkomanse ankor. I arète pa instigue Ivone. Titone ossi (nou té i kroire Titone té pa pou vni zordi), Titone ossi i gougnarde Ivone en prope figuir.

El i bouze pa. I di pa rien. I fé pa rien. Andiré nout gougnardaz i koule dessi èl konm delo dessi fèy sonz. El lé kosté sanm biro la métrèss, koude apiyé dsi. Andiré aèl k'i gougnarde anou ! Ça i fé monte ankor plus lo nèr bann Mano. Toudinkou bann'a cé pa d' largue lo toute pou lo toute ! Cé pa d' mètte à shanté lo shanté lo plus insolan, lo plus dür (ke) Titone la-konpozé kank la-oblize ali alé ranpli son ventr' èk kane dann karo kane ! Lo shanté k'i atake dirèk lo gro Ivone :

Depü Sin-Dni
ziska Sin-Pièr
Na rienk
La pipe lo maire
La niabou fume
Lo taba
Tabavér !

Samdi 10 mars (Katrièm boute)

Axel Gauvin — 2024-08-22T02:00:00Z

"Lo Régiment de Sambre et Meuse" i vien apiye lo rin bann "Fiers Gaulois" té pou dékliné. Lo pov "Chant des Partisans" lé oblizé vni soutire lo vice "Lo régiment…".

N'i koné rienk détroi zikète bann shanté-là, alorse, pou pa k' néna tro lo vide dan la romanse, n'i émite la boush la diréktrisse, n'i largue lo son inpé parèy-parèy.
Pou fé zako-zakète konm mi vien d'dir-là, Ivone, la-poin plüs losh : ki-soi èl i arète la boush gran rouvèr konmsik èl té i vé anvale lo moush, ki-soi èl i yenbou répète rienk lo détroi dérnié silabe – sépa èl i sézi rienk ça mèm, sépa èl i retien pa plüs, sépa èl i gaingne pa arplasse plüs nonpli :
– Aux pieds d'une vigne, je naquis un jour…
– Quizinjour…
– D'une mè-reu digne de tous mes amours…
– Mézamour…
– Et je suis fier èr…
– èr…
– D'être bourguignon.
– Bourguiyon.

– Et maintenant vous allez tous sortir en silence ! la diréktrisse i done lorde. El i ménasse ossi : « Gare à celui qui ouvre encor son bec ! »

Ari la-pa sézi rien dann toute ça tangaz-là :
– La-poin déssèr zordi, don, Baya !
– Rèst' trankil Ari, rèst' trankil oté ! Ou i voi pa mouvman lé pa bon, zordi ! Lindi, lindi ou nora doub déssèr !

Samdi 10 mars (troizièm boute)

Axel Gauvin — 2024-08-20T02:10:00Z

Toudinkou, dann silanse l'arvni, la diréktrisse, san prévnir, san di pérsone rien, cé-d' larg in “Marseillaise” :

“Allons enfants de la patri i yeu
Le jour de gloire est arrivé…

El i arète in ti néstan rienk pou èl guèle ankor :
Tous, j'exige que vous chantiez tous !

E nou i chante, nou i chante. Lina dann tas. Komansman fèbe-fèbe, la boush demi-férmé, soman firmezir, gatir i dèfe, laryaz i délashe : èl i largue la voix. I largue lo rir ossi. I chante po kasse zorèy, i rire po kasse gozié, i chante…
Ça i défande pa aèl guète amwin ossi !… Devine azot si mwin lé kontan ! Si la joie i koule pa boranbor dann mon sang ! Mwin ossi mi chante mon Marseillaise. Mi kriye Marseillaise-là, mi guèle ça, mi largue à la tanpète in Marseillaise eureu. Mi gayardize La Marseillaise.

Lo kalote, soman, k'Adèl la-gaingné – té i arète aèl rienk deux pti boushé mème pou fini son manzé ! – lo klakman ce kalote-là déssi la zou Adèl, épila son boushé deriz, la-bav, larme mélanzé, apré koule atèr dessi la tab, ça la-fé arète anou trankil, sirtou k' Manmzèl la-monte dessi in shèz pou bien avèye nou toute.

Kank nou la-fine tire Marseillaise-là, n'i fé pète in coup d' "Fiers Gaulois". Amwin dann ron, soman, mwin lé à dmandé si l'âme mon vié zansète zindou la-pa kassiète dessou galé bordaz lo Gange, kank zot la-antandi amwin fé ésploze mon

Fiers gaulois à tête blonde,
Nous marchions tous à la ronde…

Samdi 10 mars (Dézièm boute)

Axel Gauvin — 2024-08-17T01:40:00Z

Manzé i arive. Lodër i rale anou à mor. Lo piman roz en kardinal i fé faire nout boush delo tanpirkipé. Epila komank ça i doi ète gouté lo pti morso sitron la-mètte à konfire là d'dan !
Toute lo wati-watia la diréktrisse la-fé-là, lé pa pou abate mon lapéti. Mi tape bon kèr dann manzé, sirtou k' Lina i kite pa son part, ni pou lo kosson gro Ivone, ni pou Adèl Ponpon ! Lé pa parsk nout deux èl i manze bon apéti, ça i anpèsse anou lèv la tête. 2 fois, 3 fois nout zié i kroize. Ki-soi in sourir, ki-soi in sanblan coup d' léponz dessi la lèv, Lina néna touzour in bon mouvman pou mwin.
Mon zanti Lina ! Mon plézab Lina ! Mon gadianm !

L'hèr la diréktrisse i vir son dos pou arkole shemin, in gougnardaz i pète en coup-d' sabouk dann réféktoir-là :
– Maisonneuve au trou !
Sépa kiça la-guèle ça ? Sépa dessou kèl tab, ça la-sorti ? In nafèr lé sûr : ça la rézone dan la sarpante, é ou lé tro sir dan la pov tête lo pov manmzèl. Ça la-fé kaïye aèl en léstati, soman vittman vittman, èl i ardévire dessi nou, i rédi devan nou konm in mti kok kolé déplimé :
– C'est Mano, j'en suis sûr. Où est cette petite fripouille que je lui frotte les oreilles ? Où est le Mano ?
– Mano lé pa là, Madanme.
Lo rir la-klaté là !
– Taisez-vous ! Taisez-vous ! La diréktrisse i kriye – èl i dékartiye son boush ziska pou krié.
Ivone ossi i rante dann ron, zargo armé. Soman en kontrèr d' Ponponète, Makote i préfère atake inn par inn :
– Taisez-toi, taisez-toi, èl i kriye èk in paroli èg en vinèg.

Samdi 10 mars (premié boute)

Axel Gauvin — 2024-08-15T02:00:00Z

Pokor poze lo pié dessi pa-d'porte, n'i rèst' bète : toute tab lé vide ! Tèlkilé ! Zassiète-li, verre-li, foursète-li, kouto-li, néna poin ! Inn tior. Ajüjé de-riz-kari si néna ! In zékli d'pain dan jointür la tab i trouve pi.
La diréktrisse i arive. Lé pa èl pou fé fane traka dé-sértin. Au kontrèr ! El i di :
– Mes enfants (èl i rode pou mètte in sagrin dann son parol, aléoir : rienk la mésansté i sone dann son voix), mes enfants, aujourd'hui il n'y a rien à manger !

Lo moush i antan pi volé ! Nout toute lé kikouzi : in kikouzi la faim, in kikouzi léspoir lé mor, in kikouzi la mor.
Figuir Ari cé-t'in rashe-kér. Titone lé au pleuroir ! Sépa kèl lé deux va sède en promié ? Bondié fé k' lé pa Ari : Lina nora tro onte !
La diréktrisse i kite la tansion gonflé, gonflé ziska fé pète lartér. Ari ? Titone ? Titone ? Ari ?…
Ni inn, ni l'ot : Adèl, Adèl i largue avan :
– Madanme ! Akoz madanme ? Koça nou la-fé aou, madanme ?

La lèvr' madanm i délashe, son zié i dé-séryé, i sourire, i rire presk ziska : `
– Grande bête, va ! Tu ne m'as rien fait ! Et rassure-toi ! On vous apporte immédiatement votre repas. Mais si lundi, Monsieur de Maisonneuv n'est plus maire, si "l'autre" lui vole la place qui lui revient, notre plaisanterie deviendra, hélas, réalité ; et je serais obligée de vous dire : « il n'y a plus à manger pour de vrai ! » Car, où trouverait-il l'argent, "l'autre", pour vous nourrir tous ?

Ivone i fé rire son ratlié remi. Son boush lé koupé zorèy en zorèy. El i bate la min, èl i sent pi son kor, èl i danse sanm la gayardiz :
– Nous pouvons trapper toute de suite le manger, madame ?
– Faites Yvonne, faites ! Et surtout n'oubliez pas lo bocal de piment.

Bokal piman ! Sépa si mwin la-bien antandi ? Komank i fé la diréktrisse la-sanz manièr konm ça-là ? Pa plus loin k'ièr mèm, èl lété en "sauce blanche", en “carotte râpée", en “béchamel". Alapa-k zordi, èl mème mème i fé trape piman pou nou !