Témoignages

Tikok i sa bal

Christian Fontaine — 2025-10-28T20:04:00Z

Tikok i vien n' gingn katorz an, é li komans avaz ti fi, alé bal… tousa-la. Soman, promié kou li la parti bal, li té pa loin gingn in zo ! Oila koué la fé :
Tikarl i ariv, i di Tikok :
« Anon bal !
– Moin na poin linz, Koulou !
– I fé arien, vien aou, m'a prèt aou in kilot sanm in somiz ! »
Tikok i sava la kaz Tikarl, i désanz, i mèt lo kilot-grann-mans son kamarad, sanm in somiz blan. In gayar kilot gabardine blé, i moul bien Tikok : li lé fringan an-ndan-la, foutor, i fo oir !…
Ala lé dé i sava !… Ariv dann salon bal, la mizik i donn kalou : sé in lorkès promié kri i zoué ! Tikok, promié débi, i vèy lorkès. Mé son pti zié i mank pa vir koté zerk, rok, slo… Korpion bann fi i roul, baya ! Lé riskab donn mové lidé Tikok ; soman, marmay-la lé pa visié ! Sak li rod, sé zis in nti moun i fé in kont sanm li ; in moun ek ki li pé rakont tousa ki fé mal son kèr : son mizèr, son soufrans, son tousèl !…

E oila k', zistoman, li apersoi dann in koin, asiz bien trankil koté son monmon, in nti fi i konm-sa. Li lé anmerdé : koman fé po apros koté mamzel-la ? Tikarl, laba, i donn lo grin minm po dansé ! Pa kestion n' déranz lo boug po sékour ali !… Moman-doné lorkès i fé pèt in séga andiablé ! Tikok i an-pé pi, li sava, li invit lo pti fi ! Par kou-d'sans, lo pti fi i di « oui », tandik son monmon la poin lo tan di « non » ! Anfin, tou lé dé i « tienbo l' rin séré » ! Tikok i ramas pa tro mantèr sanm li ; Maryane i fé parey sanm Tikok ! Tou lé dé i akord bien.
Soman, kan l'apo bien dansé konmsa, zot i oi in pongné marmay i ogard azot, i ri, Tikok lé zéné, li rod po koué ! Marmay i ri minm. An-minm-tan i amont lo doi direksion son… kilot ! Tikok i fé sanblan pa fé in kont, li kontinié roulé ! Soman, i amiz pa, li apersoi in nti van fré i rant par an-nsou ! Li ogard : li oi son kilot lé… désiré, la fann par anba ! « Ayayayay ! Tikok i di dann son kèr. La pa la sias sa ? » Li ésey dégaz ali, rod somin po kouri ! Mé Maryane i tienbo ali ! Li débat ankor in kou ; Maryane i tienbo minm ! An minm tan, el i di : « Kas pa la tèt, Tikok ! Kontinié dansé ! Malgré sa, mi inm aou ! ».
Soir-la, Tikok la « vèy poto » tout la nuit, son deryèr kosté kont lo mir lo salon. Soman, parol Maryane té la po étinn lo fé dann son kèr…

Christian Fontaine

Maï nouvo ek kari ponm-tèr

Christian Fontaine — 2025-10-24T20:05:00Z

Vakans Pak té tro kourt, i fék Tikok la pa i lo tan moizi la kaz kouzin Zervil, laba la Tèr-Sint. Soman, li la pa perd son tan, ann éfè-d' lamizman : dé-troi tourné an kanot, ramas « tibèf » ansanm koki si l'bor la mer, bingné la plaz Sin-Pir, zoué « dam » osinon darion ansanm Mariz. (Po sad-la, li té inm pa tro, mézanfin té falé pa lès son pti sèr tousèl la kaz, vik kouzine Matid té sa travay konm bonn la mézon in gro vaza !)… Tikok la gingn lokazion d' oir osi la mizèr bann pésèr ek bann somèr la Tèr-Sint ! Lo Samdi-Sin, par ekzamp, Tikok i obli arpa sa zamé ! So zour-la, lo momon d' kouzin Zervil (parlfèt i artonm lo gro matant Tikok) i invit son garson ek son bel-fi vyin manz, lo soir, son kaz par koté Tananbo. i di azot aminn lé troi marmay ansanm, bien sir ! Tikok lavé zamé parti Tananbo. Osi, kan li la vi lo pov bann ti kaz kartron fane-fané dann trou d' ros volkan si l'bor ? la mer, son kèr la séré, li la mazine an li minm :
« Zézi, Marie, Zozèf ! Dan lé o, nou lé maléré. Soman, isi la, la bat la sians, isi la ! »… Anfin, kan la fine koup dann santié la bou, sot ros pardsi ros, travers zeskine ansanm galabèr, tout la bann i ariv la kaz gro matant. Anfin, dizon in boukan ! La, tout la bann i anbras, i dmann lé nouvel linn lot : Matant Zaza, po sa par, i soplingn son romatis ; kouzine Matid i di son patron i vé pa pey ael minm ; kouzin Zervil, son koté, i répèt soman sépa lo rol lé sèr, sépa bann zakaparèr i anbèt tro… anfin, Tikok i konpran pa tro gransoz dan so konversasion d' gramoun !... Apréla, toutfason, Matant Zaza i di :
« Bon, marmay, rant azot touzour !... Aou, Zervil, ou i koné ousa i lé lo miské d' ronm, pran lapéritif zot dé Matid, é serv lé zanfan in pé d' limonad : lé vèr lé a koté dann bifé… Moin, m'a alé okip touzour mon manzé dan la kizine », lo vant Tikok i komans i kri ! Mazine azot konm li la fin osi : la vey, lo Vandrodi-Sin, manzé té sék ! Apark in pti morso d' poison, mé lété san grès !... Sé po sa, alors, Tikok i vir la tèt, i vey matant Zaza rant dan la kizine. Dék el i dékouv lo promié marmit si lo fé, li ogard, li fé : « Onm ! Lé dos ! Na dori, asoir ! ». Dék Matant Zaza i dékouv lot marmit, li rofé pli zoli ankor : « Onm ! Lé gayar ! Na la viann koson ! ». I fék, Tikok, dék li la fine boir son limonad, li prépar son bous po bien manzé, asoir ! E son bous i fé déza dlo, mi asir azot !... Elas popilas ! Kan i ariv po pas a tab (dizon : kan i ariv lèr po manzé sakinn si son tabouré), Matant Zaza i komans serv marmay. E kosa Tikok i oi dan son zasièt ?... In takon d' maï nouvo ek détroi morso kari ponm-tèr ! Tikok i kroi li rèv ! Osi, li ogard lé zot zasièt, mé sad tout la bann lé parey ! Alors, li konpran ke sé tantola li la révé : li la révé do ri ek la viann !... « I fo in zour mi sobat po k mon bann frèr la Rénion i viv pi mizèr konm dann bidonvil Tananbo ! »… Oui, Tikok, mounoir ! Travay bien, é grandi vit : out péï la bézoin d' ou !

Christian Fontaine

Papang rapas

Christian Fontaine — 2025-10-22T20:06:00Z

Dan la klas, po léson-d'soz, mét-d'ékol i esplik :
« L'Aigle est un RAPACE, lo Vautour est un RAPACE, lo Papango est un RAPACE ». Mé lo mét i domann banna, i di : Pourquoi appelle-t-on RAPACE, lo papango ? »
Tikok i lèv son doi, i di :
« Mi koné, Mésié, akoz kan li sa béz volay domoun, li pas, li arpas, li pas, li arpas, li pas, li ARPAS ! »
Tikok i fé lo zés ék son min : li fé papang apo volé anlér park poul. Papang-la i désann, i mont, i glis a droit, i glis a gos. Lo tan li po fé sa la, tout marmay i tienbo zot vant po ri. Sa i ansèv fé an-salèr lo mét plis ankor. Mandoné, lo mét i kri in kou apré Tikok, i di :
« Tikok, au piquet derrière lo tableau ! »
Tikok i konpran pa inn-tiork lo zafér, lo mét i koz kréol éstèr :
« Si ou i konpran pa pokoi i mét aou o piké, na in fouét dési biro lérk li va pas, li va arpas si out déyér, somanké oi konprann ! »
Tout kamarad Tikok pli an-dyab po ri éstér. Ariv son kaz, Tikok i sa désou pié mang, koté park volay, li kalkil. Mandoné, li lév son tét anlér, li oi in papang i ariv, i pas, i arpas, i pas, i arpas anlèr park-la…Tikok i véy ali minm. Son ti tét i balans, anlér, anba, par isi, par la, a droit, a gos, paréy in zanfan tann dann bra son monmon i sant :
Fé dodo la minét-té zanfan dé Zanét té !
Si la minét i dodo pa !
Shat marron oi souk ali !
Aforstan brann branné, Tikok i gingn soméy, i dor.
« Koukoukou kou !
– Kat kadét ! Kat kadét ! »
Tikok i lév an béf : li apersoi in dézord dann park. Li lèv la tèt, li oi papang i vol, i vol, i vol, i vol minm droit dovan li, na in bel kok dan la bék. Tikok bandé, li dobout in kou, li kri :
« Papang, mon modi zoizo. Toué nora afér amoin toué. Nespés vilin RAPAS, va ! »
Lo mo RAPAS la sap konmsa minm, pa fé espré. Pi zour-la, Tikok la konpri RAPAS i vé di aou bézér-d'paké, volér (si Tikok té i ogard in boug konm Dobré, Ropiké, épi Rémon Bar, ZanPol ek GroLwi, sinonsa in n'ot boug la Droit li té konpran pli vitman, mi kroi).

Christian Fontaine

Ti loto d' la fraternité

Christian Fontaine — 2025-10-17T20:06:00Z

Dék Gramoune Biganbé la fine fé son konparézon rant ARTIRANKOR é lo gouvernman kapitalis, li ogard son garson bien an fas, li di :
« Tikok, mon zanfan ! Akout bien sak papa i sa di aou, zordi ! Out papa, a-lèr-k'i-lé, i komans pran la sélil kominis, isi ! Alors, travay bien lékol, mon zanfan ! Travay bien la kaz ! Travay bien dann bitasion*1… partou ! In kominis i doi donn lekzanp si tou-lé-poin !… Somanké, a s'moman-la, ou'a gingn aminn lo sanzman ansanm tout nout kamarad : lo vié, lo zinn, lo marmay, lo zonm, lo fanm… tout la bann ! Pars, anou maléré, sé otroman k' la Droit, ke ni vé fé déroul la vi. Nou, n'i vé — pa rienk ÉKRI, mé — VIV LA LIBERTÉ, l'ÉGALITÉ, LA FRATERNITÉ ».
Tikok la sort déor san di arien. Li té an réfléksion : li té mazine son kouzin Artir. Épi, toudinkou, sépa kosa i espas dan son pti koko, li lèv la min konm po fé in promès, é li di :
« Konm soley Bondié i éklèr amoin ! Zamé mi apel arpi kouzin Artir : ARTIRANKOR ! É m'a sobat po défann lézot moukat ali konmsa ! M'a sobat sirtou po k' tout maléré i (ar) trouv zot vré non : in non d' zistis ! In non d'moun ! In non ek in nti d' zanfan Bondié ! »
Mariz osi, son koté, i fé parey : li ienpi abou kozé telman son pti kèr lé séré, si telman son pti moral i travay !… Moman-doné, soman, lo pov pti fi i an pé pi ; alors, li kri Tikok :
« Tikok, mon dada ! Aminn amoin promné dan out ti loto, in kou, don ! » (Tikok ansanm Zan-Lik lavé fagot in lespès ti sarèt kat-rou po saroy do-lo dési, é osi po zoué. Zot té apèl sa : « ti loto ! »). É oila, alors, Tikok — Mariz déryèr ! — lansé an bolid si lo pti loto ! Zot i roul, zot i fons an « frèr é sèr », lib konm lo van, si lo somin galizé « d' la Liberté, l'Égalité, la Fraternité » !

Christian Fontaine

Lo vant ek lo zié

Christian Fontaine — 2025-10-14T20:05:00Z

Alors, lèrk Tikok lé fine di koman kouzin ARTIR par son gourmandiz, i fé mazine ali « lo gouvernman DEGOL-DEBRE », son papa Biganbé i réponn ali konmsa :
« Lé vré, Tikok !… Soman, na in gran diférans rant kouzin ARTIR ek lo gouvernman kapitalis : Kouzin ARTIR st'in pti krèv-la-fin konm nou minm. Alors, tel li oi in zasièt manzé osinon-sa in marmit maï, patat, maniok… tousa-la, alors li vé anval tout ! Si li anval pa tout po vréman, konm tanto po la vann kanbar ! Kouzin ARTIR lé konm in papang osinon-sa in martin : li manz in voyaz ; son vant i ranflou in nestan, apréla i dégonf, firmzir konm in rou loto ! »
A s'moman-la, Mariz, ke lé la osi po ékouté, i rod ri ; mé son moyin gran frèr Tikok i gèt ali gro zié, i fé arèt ali an plas !… Alors, gramoun Biganbé i kontinié, i di :
« Lestoma kouzin ARTIR lé gran mé, an n'atandan son kor an n'antié i rèt mèg ! Anon komans par son zié : alors, dizon k' son vant lé pli gran k' son zié ! E po kosa son zié lé pti ? Sé akoz li la zamé vi arien ! Li oi arienk la mizèr !… Astèr, son kor, é dan son kor, son vant. Po kosa son kor lé mèg é son vant lé gran ? Sé parské li viv dan la malpropté ! Et lé p'ali lotèr ! Lotèr, sé so salté d' gouvernman la Droit k'i aranz anou ansanm son… salté ! Kan kouzin Artir la fin, li lé oblizé d' manz son gro gazon d' maï kas-an-dé ansanm piman krazé ! Kan li la soif, li boir do-lo sal ousan-sa bouyon brèd, é sa, dann fé-so konm dann fé-fré ! Eksa, na lo rofroidisman, lo romatis, lo vèr… é touskisansui ! Tousala i fé k lo vant ansanm lo kor tout-antié d' kouzin Artir i artonm tout déformé, tout malinn, tout an dégrinn ! »
Larm dé-zié i rod koul dann zié Mariz ! Par rapor, dopi Tikok la fé bous la bous son pti sèr é la donn ali son res-trankil, Mariz i akout son papa, tèt anlèr, bra croisé, é lo kozman i tous son pti kèr « tronplamor » !…
Mé, Gramoun Biganbé i ansèv1 son konversasion :
« Lo gouvernman bann gro, li, o kontrèr, li lé pa dan lo bézoin : li lé dan labondans ! Mésoman, li vé toultan an-n'avoir plis ! St'in labitid ek li : labitid vol lo pti plantèr, esplot lo travayèr, fé lesklavaz ansanm domoun ! Po zot, lo règleman sé sa : « Anon bour tout po nou tousèl ! Lézot, débrouy zot kari, krèv !
« Dizon k lo gouvernman kapitalis, li, sé son zié lé pli gran k' son vant ! »

Christian Fontaine

Artirankor dan la marmit kanbar

Christian Fontaine — 2025-10-10T20:05:00Z

Gramoun Biganbé navé inn ti kouzin té port Artir PAYET, mésoman domoun té kri ali « ARTIRANKOR », par rapor li té manz in gro paké é ke li té di toultan son Madanm kan té ariv lèr po dézéné : « Artir ankor in gazon mon fanm : zasièt lé pa asé bité ! »
Konm, po asévé, li té rèt mèg konm in zaran, na désertin té tir foutan é té moukat ali in voyaz ; zot té di konmsa :
« Oté, Artirankor ! Ousa ou i mèt manzé, don ? Adémié aminn aou magazin zarab po asté linz po ou, olerk alé la boutik sinoi po asté dori ansanm kari ! »
Na dot té koz dan son do, té di konmsa :
« Boug-la na vèr solitèr, sa sa ! Dizon : in trou san fon ! »…

Na in tour, konmsa, Artirankor i débark la kaz Tikok, é zot dé son papa i komans diskité si kestion d' randman d' kann épi si lo pri létablisman i pèy… Pandanstanla, Madanm Biganbé lapo fé kui in gran marmit kanbar : lerk té fine fouyé, lo kanbar té pèz aprosan dé kilo é navé po kontant omoin kat a sink gro manzèr moyin !... Kanbar lé fine koui, Madanm Biganbé i koup in fey-fig, i mèt dan in vann, i vers tout lo morso kanbar pardsi, i dépoz la vann si la tab po kit lo kanbar rofroidi. Soman, konm san fé eksopré el i dépoz la vann dovan Artirankor, sépa kosa i ariv sad-là : oila pak li avans son sèz bien koté la tab, li instal ali ; é la, li souk la vann kanbar dan son dé min, li souf dési po asèv fé frédi, épi li di :
« Zot la mèt tro po moin ! Zamé mi fini arpa tousa ! Soman, kaminm lapéti la pa tro for, m'a fé plézir azot, m'a ésèy fé mon posib ! »
Lo papa ek lomonmon Tikok i arvien pa ! Zot i agard azot linn lot an misouk, é zot i trouv pi arien po di ! Sirtouk, si la fin, na pi inn ti gine kanbar dan la vann ! Artirankor la manz tout san kri… tir !

Christian Fontaine

PS : Somanké na in pé va maziné : « Artirankor-la lé gourman, sovaz, san-né, malapri, malélvé… tousala ! » Soman, tansion ! Zistoir té pokor fini ! Prosin kou, na di azot si té vré osinonsa lé pa vré !

Livré-d'fami

Christian Fontaine — 2025-10-07T20:06:00Z

Madanm Biganbé té i agèt dann kel dégré son livré té fine arivé, li té i pran pitié. Na-d'dégré li té i sanz son palto, té i frot son do sanm la kol la rourout, té i mèt koplas dési son bann boubou… kosa li té i pé fé ? Bord ali in koté ? Anvoy ali lospis parèy son vié kamarad ? Pa moyin ! Livré-la – nou fine di azot tro-zour – i rann ali si-tan servis.
« Epi tout manir ! Madanm Biganbé i di dann son kèr (la li koz ek son livré li la, in !), tout manir, ou i port rienk lo non zanfan, mésoman zot poi minm, ou i koné pa sa ou ! Fanfan, Térèz, Maryot, Arsinn, Odil, Férié, Zilienn, Zan-Lik, Tikok, Mariz, Zandark, Zoni… Ou i rann aou kont ? I fé douz ! Douz zanfan – dé lé mor – moin lé obout ansanm dopi laz vint-é-innan1 ; talèr 17 an, moin lé o-four o-moulin. Anfin ! Mi ropros pa. Bondyé la doné ! »

Tikok té i antan son monmon apo di sa sak foi in zanfan té i éné. Saminm lavé asé po kontant Tikok. Li té i mazine li té i sort dirèk dan la min Bondyé, té fine mark son non dann in gran liv anlèr, épi la komine, parèy po Zan-Lik –Mariz èk Zoni – la arkopié son non dann livré-d'fami. 2

Soman na in nafèr té i trakas Tikok, po-fèr Bondyé pli souvandéfoi i donn bon-pé zanfan sak nana ti larzan, épi in ti-pé zanfan sak nana gro-gro larzan. In zour po fini, Tikok sé domann in kou son monmon. Si-l'kou Madanm Biganbé té i atann pa, té sézi, aprésa la arpran favèr la réponn, la di :
« Alé domann sa Dobré ! Daoir li koné bien sa, li. Li di aou, isi Larényon, i fo tienbo in kou, (pars lé oblizé dévid in pé dann lémigrasion) inn soz laba an Frans li di aou : alé pik dopin marmay, la Frans i mank la min.
Madanm Biganbé té i koz an parabol, séfé Tikok té in pé mayé dann la kol soman li té i komans konprann koman in-pé domoun i pé fé pas azot po komandèr Bondyé !

Christian Fontaine

Lo défilé

Christian Fontaine — 2025-10-03T20:10:00Z

« Augmentez les salaires ! Augmentez les salaires ! Augmentez les salaires ! » Lo kortez i déboul dan la ri légliz, an vités. Bann marmay dovan i donn la rou, i kri pli for. Bann bononm i mars droit, réd konm kan lo préfé i pas an rovi bann solda la kazern. Bann Madanm i profit po fé zot radyo perkal an pasan ek tout zot konésans antasé si bor somin. I arsanm in maryaz, soman-la na poin nouvel maryé an voil blan : la koulér i tir plito si lo rouz. I fé mazine in prosésion-dé-ramo, somanla, bann drapo i ranplas bann brans ramo, bann « tablo ékri dsi » i ranplas bann kér palmis.

Po Tikok, antouka, sé la fét ! Zot dé Tipièr i vien n' batay ansanm dé zot déyér, zot la nyabou souk po zot la pankart lé marké dsi : « ASSEZ DE MISERE ». Sa, Tikok i konpran ankor ! Pars la mizèr, la pa bézoin li sa lékol po aprann kosa i lé ! Lé parey po lo pankart bann Gistin i aport, lé ékri dsi :
« Nous, planteurs, nous l'a faim ! »
Soman, sé lo : « Augmentez les salaires-la » Tikok i konpran pa !
Si-telman li domann Tipièr :
« Kosa « augmentez les salaires-la » ? Banna i trouv i fé pa asé so konmsa ? »

Na in boug déyér la antandi, li ogard son kamarad, li rir. Son kamarad osi i rir in nti gazon, mé-soman i azout apré-sa :
« Marmay koméla lé konmsa minm zot ! Zot i inm plézanté si zafér seryé. La, nout défilé rovandikasion, in zé po zot, la ! Soman, véy va oir kan va ariv zot tour po trim konm nou, dopi granmatin ziska gro-fénoir dann lizine, zot va oir si i fo aminn tou sa an zé ! »
Tikok té plézant pa, poitan ! Li té koné pa minm kosa té i vé dir in « salaire », li té mazine sa té in fé-so. Rozman bann gramoun déyér, la kontinyé esplik zot ka ! Té di konmsa :
« Lo patron i abiz tro, i péy pa konm ki fo… tousa-la. ”
Alors, Tikok la konpri bann travayér la té sobat po sanz zot kondision travay. Zot té réklam zot di. Tikok ek Tipièr la lév zot pankart pli o, la kri pli for ek lezot : « As-sez de misère ! Nous planteurs, nous l'a faim ! Augmentez les salaires ! »

Christian Fontaine

La politik

Christian Fontaine — 2025-09-30T20:05:00Z

Bann gramoun la fine repozé. Anfin, fason n' parlé ! Pars i ropoz pa po vréman dan in péi fatigé ! Tikok, son koté, la bien révé, mé i fo oir, estèr son rèv koman i lé !…
Granmèr Tisia la rodrès dan son pliyan. El i bès son vié rin po trap son tant koutir, dépozé si in tabouré, par dvan el. Soman, daoir son dogré lé pa bon ! Pars tout suit, el i komans dispité :
« Mon n'ami, mésié, kisa la pri mé linèt ankor ? »
Madanm Biganbé, asiz par laba si son sèz-dé-gol – el osi l'apo koud – i rogard son vié monmon ek in lèr pran-pitié. El i di :
« Mé, monmon ! Oui oi pa ot linèt lé si ot… zié ? »
Granmèr Tisia, malgré son kami, i ramas lo zo, mé i fé konm-si rien n'été ! El i di pa arien, i trap son zéguy, i anmans son fil ! I fo konprann osi, lo pov vié granmèr ! Dopi so matin, el l'apo rapiès in maléré piès-linz : lo kilot Tikok ! I fini pi ! An-minm-tan, el i sant, é ankor la, i rokomans : « Vic-toi-re ! Tu rè-gne-ras ! O croix, tu nous sau-ve-ras !… ».
An n'atandan, po Madanm Biganbé, el, la pokor la viktoir ! Asiz dan son koin, sou lo pié-d'kèr-d'bèf, son zié souvan an réfleksion, el i rosanm plito « quand Jésus mourait au calvaire », lo kantik granmèr i sant osi kek-foi !…

Par laba, dan la kizine an pay vétivèr, gramoun Biganbé i kas la politik ek bann kamarad Polo, Fransiné, Léopol Ramiské… Na d'ot ankor i doi vnir, i prétan ! Zordi, zot i travay pa : la mèt atèr si tout santié ! E zot i vien bonèr – pa konm dabitid, po rénion sélil – parapor, talèr, n'in gran défilé travayèr, an vil… Tikok la sof kafé po zot, é alèr-k'i-lé, li serv azot in rins-tas. An-minm-tan, li ésey akout zot konversasion, mé, malérèzman po li, li konpran pa gran soz ! Lé kestion in bann "rokin " i soubat kont in bann "brokar", bien sir ! Mé dmann Tikok kosa i lé in "rokin", kosa i lé in "brokar", li koné pa ! Tousak li konpran, sék in désertin "Raymond VERGES", in désertin "Lépervanche"… sa sé "d' kamarad" bann son papa i inm ! I vanz po lé travayèr, zot i di. I vanz po lé plantèr, i défann lé maléré !… E pi, n'in désertin "Ti-Pol", banna i di k' li promé osi ! « Li va suiv son papa », lo kamarad Fransiné i azout … Dék Tikok i konpran tousa-la, li la anvi d' konèt sé boug-la ! Alors, li osi, li désid : li va alé défilé an vil !…

Christian Fontaine

Vin désanm bann marmay

Christian Fontaine — 2025-09-26T20:04:00Z

« Ou i sa kabaré a-soir, ou, Tikok ? »
Tikok i rèt konm li lé : asiz katpat, son min apo ramas kanèt dann trou-bité ; soman, son zié i vir an poin d'intérogasion si Maksimin, dobout laba koté l'ot ré-bité. Li konpran pa !
« Mi dmann aou, si ou i sa kabaré asoir ! »
– Kosa i lé, sa ? » Tikok i dmann anfin.
– Tolèr ! Kabaré minm oui koné pa kosa i lé ? I oi ou st'in maoul ! »

Alors, Maksimin i esplik :
« Zordi, Vin désanm, sé la Fèt Kaf ! E, toultan, kan i ariv Vin Désanm, Gramoune Yalo i fé kabaré son kaz, é toulmoun ozalantour i antour po santé, krazé, tout la nuit ! »
– I dans pa maloya osi, la ? Tikok i dmann.
– Bin sa-minm ! Maximin i arvir kabaré ek maloya lé parey sa !
– Abin, mi koné, alors ! L'ot kou, papa la minn nout-dé Zan-Lik manz kabri masalé la kaz Gramoune Mardé. Lété po zot servis. Ebin, la, lo soir, banna la dans maloya. Té di konmsa, la, promié débi : « Sa servis kisa sa ? Sa servis malbar sa ! Kisasa la donn manzé sa ? Papa Mardé la donn manzé sa !… Apréla, n'in boug la mont si in lespès tanbour, la bat kaziman konm in séga. Na in n'ot la pran in lespès ti késon flèr-kann, la sékouyé. In n'ot ankor té fé sonn in pti fer-blan ansanm dé boi gouyav… Sak foi té komans, lo boug si l' tanbour té anvoy in morso té rosanm ziska in pléré ! Son santé té fé pèr amoin, pars té fé pans amoin sat lo prèt légliz ; Soman té a-dmi kréol, a-dmi langaz ! Kan lo gramoune té fine sant son morso, na inn dan la bann té kri : kasaz ! Alors, la, té falé oir ! Lo tanbour, lo karé flèr kann, lo bagèt zaz, lo triang… tout té donn lo grin ! Tout la bann té sant é té dans ansanm ; ziska moin la rant dann ron a la fin ! Nout té sant konmsa :
In kok in poul moin nana.
San golèt la tèr moin la poin !…
Ki la kri ali si ?
Destin Bondié la kri ali si !… »

Maksimin té lès Tikok rakont tout, san di arien. Soman, son dé zié té i briy konm la brèz-dofé ! Ek-sa, firmzir Tikok té koz, li té fé lo zès po Tikok : li té bouz lo rin, té roul zépol, té balans lo bra dovan-déryèr, té glis lo pié partou atèr !… Ziska tan k' la pran ali in fougad, konm in boug lo kor lavé gaté, konm in boug lespri lavé mont dési : li la pran in lélan, la mèt ali a santé, a dansé, a krié :
« Vin désanm sé la liberté !
Vin désanm sé la liberté !…
Kaf kafrine i vé pa dansé ?
M'a trap mon roulèr m'a fé dans azot !… »
Tikok, si l' kou, la rèt la konm in kouyon ! Li té koné pi kosa té falé fé : rogardé ? kouri ? apel o-sékour po di Maksimin la tonm kriz ? … Mé oila-pa k', si lé zantrofèt, in ponyé marmay i ariv, i rant si la pis po dansé ! Alors, Tikok i rant dan l' ta, é li mèt ali a santé ek tout la bann konm in perdi :
« Isi, dann péi Bourbon
Nana lo blan, lo noir po touloubon…
Soman kan lo san i koul,
Lo san lé rouz, lé rouz,
Lé rouz po touloumoun ! »…
Tikok lé kontan : kan-minm a-soir li gingn arpa alé kabaré Gramoune Yalo : li  vien d' fèt son promié Vin Désanm marmay !…

Christian Fontaine