Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Shomin Paul Vergès : in shomin trasé pou nou alé pli d’van

vandrodi 24 novanm 2017, sanm Justin

Si in moun normal i suiv in pé l’aktyalité dann in péi lé posib olèrk oir lo péi épi son bann z’abitan alé dann sans l’inité, l’armoni, lo pozitif, alé dann la divizyon, lo dézord, épi lo négatif. Moin na dan l’idé sé sak mi romark si mi suiv in pé l’aktyalité dann mon péi La Rényon.

Boudikont sé sak mi romark, kan mi arfléshi in pé dsi lo parkour mon péi.L’inité ? i kass par bout i diré. L’armoni ? I fodré an avoir in vi fosé, pou pans sa. Lo pozitif ? Ayayay, mon dyé ségnèr, i vo myé lèss sa pou bann kabiné d’ manajman. Oplis i sava, oplis i diré nou lé plizanpli divizé. Ni viv plis dann dézord é lo négatif, i diré partou li l’apré ranport la viktoir.

Mi pans in pé i doi di : Justin, la tète l’apré bloké ! Li rézone konm in tanbour éli donn in poinnvizé fosé dsi l’aktyalité. Pétète zot na rézon : pétète in n’afèr d’az ! Pétète in n’afèr d’movèz santé ! Sansa li fini par sikonbé dovan l’anbyans pésimis i antour anou. L’anbyans pésimis ?

An touléka, sé sak mi rosan kan mi antann désèrtin apré anpar solman bann trin i ariv pa l’èr k’i fo. Fasonn parlé, pars par la gras bann sabotèr nout trin, li roul pa, é li lé pa paré pou roulé… Sa i ramène amoin lo souvnir Paul Vergès, in moun tèlman progrésis par raport sak nana bann myète lo pouvoir l’èr k’ni lé. Tèlman optimis par rapor tout sak i sakrifyé z’ot tan épi z’ot vi pou lo négativité. Tèlman klèrvoyan par rapor bann moun lo zyé boushé.

Final de kont, li la tras lo shomin, é sé shomin la i fo ni suiv pou avans pli d’van. Na poin d’ot ? Sé mon l’inprésyon.


Inn modékri, inn ti lavi, inn komantèr ?

signaler contenu


Facebook Twitter Linkedin Google plus