La kiltir popilèr konm in propriyété mondyal

24 avril 2018

Na dé troi zour moin la parti pou ékout in konférans plizyèr voi, demoun té i sort in pépartou é mi pé dir azot moin l’aprann dé shoz. Inportan ? Mi pans oui, par sa i apartien l kiltir popilèr. Mi rapèl, dann tan lékol, moin l’avé in kamarad téi apèl Zozèf Souinguy. Nou lété toultan ansanm pars son momon téi travaye avèk nou.

Donk marmaye-la, l’avé in bonpé rishès la kiltir popilèr – an touléka pliské moin, sa lé sir. Moin té i koné bien lir, bien ékrir, fé in problèm partaz égal sansa inégal. Mon momon lété métrès d’ékol é mon papa kiltivatèr é konm mi di souvan om dé limyèr. Zozèf li té pa tro for pou lir, pou ékrir : parl pa li règ do troi, problèm konpliké. Mé kan li té i di : tik-tik dann koin, in pti zanfan i amontr lo poin son momon, mi anvoye anlèr blan é i tonm atèr jone, marmaye téi antour ali pou amizé, pou profité. Donk pou la kiltir la kour li lété mil foi pli bandé ké moin. Si tèlman, moin téi pans li té i koné dé shoz san konsékans.

Inn foi, moin la di mon santiman avèk mon momon é mi pansé èl téi sava tonm dakor sanm moin mé mon momon la pa réponn amoin la dsi . El la di amoin sinploman : « sa i fé parti La Rényon sa ! » mé èl la pa parti pli loin é moin la rès la mon léspri déglinké, konm si moin l’avé pèrd l’ékilib - i diré zordi, pèrd son sèrtitid.

Lo tan la pasé, moin osi moin la aprésyé la kiltir popilèr... ziska zordi. Mi koné in bonpé d’moun i aprésyé galman nout kiltir popilèr é boudikont sa lé bon konmsa... Donk pou artourn i pé dsi lo sobatkoz moin lété an parmi, moin la antann rényoné, gwadloup, komor, séséloi, d’ot moun d’ot nasyon ankor mèm in madam té i sort La Vendée-mé m’a rovni a dsi san tardé. Mi pans, moin la konprann myé in n’afèr.M’a dir azot épi si posib zot va donn amoin z’ot l’opinyon ; ala mon réfléksyon :
Lé vré la kiltir popilèr i pé z’ète sète in l’étni, i pé z’ète lé lokal, réjyonal, i pé z’ète lo bien in nasyon mé mi trouv li doi z’ète konsidéré konm in propriyété mondial. Sa lé a diskité !

Nb mi sava pa dir azot bann moun léspas néna galman z’ot kote par la dsi, pars mi koné pa si lé vré. Mé a bien kalkilé !!!

Dans la même rubrique

Nout parti la pa mor : an kontrèr li rofé !
23 mé 2018

« Botan i vien apré la plui »
23 mé 2018

Dopi soisant z’ané nou na rézon ! Dopi soisant z’ané nout parti néna rézon !
22 mé 2018

Apré la fète, antansyon traka
22 mé 2018

Zistoir Laramé-névyèm morso : Laramé kondané a mor
19 mé 2018

La Une

Forte mobilisation pour le service public
23 mai 2018

Toute La Réunion relève d’un « plan banlieues »
23 mai 2018

Une délégation chagossienne bientôt à La Réunion
23 mai 2018

Rencontres entre Chagossiens et Réunionnais : le programme
23 mai 2018

Manifestation du 22 mai à La Réunion : photos du défilé à Saint-Denis
23 mai 2018

2018 Témoignages
Contact | RSS 2.0