Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Zistoir lo pti bout moun-morso niméro 1

samdi 22 séptanm 2018, sanm Justin


Zordi i tonm samdi é konm tout in somenn près moin la anparl la politik, zordi ni pé rakont in zistoir pou marmaye.


L’avé inn foi pou inn bone foi, mésyé lo foi la manz son foi avèk in grinn sèl.

Dann l’androi moin lé éné l’avé, dann tan mi di azot, in bonpé famiy mizèr.La sézon koup kann téi koup kann.La sézon sharbon téi fé sharbon mé souvan té difisil fé la soudir .Kosa téi rès a fèr ?Alé dan la foré pou ramass inn-dé paké d’boi pou vann épi gingn in moné pou fé in pé komisyon .Pa plis k’i an fo, zis do koi pa mor la fain.Ankor ! Pars sak mi rapèl bien sé ké in bonpé zanfan la mank pass l’ot koté la vi kan moin lété marmaye, é mèm sèrtin la passé pou vréman..

Donk mi rapèl sa konmsi lété yèr dann in pèryod vash mèg :gran matin famiy –la téi pass pou alé la foré pou trouv in moiyin pou moiyéné gingn z’ot soso.Kan mi di azot té in pèryod vash mèg sa lété vré pou vréman :gouyav mir téi rès pa dsi lo pyé, demoun téi rafal sa, mèm étan a pène jone .Sézon-la gèp l’avé poin pars té fine alé kashyète dann trou.Té pa la sézon gouyavyé non pli .Té pa la sézon frui : oki d’mang, oki d’zanana ; létchi té ankor pti gigine.

Bann marmaye lo léstoma i shant si tèlman lété vid.Tout lété a bou d’fors é té riskab kaziman tonb féblèss .Tazantan té i pass in pé dvan la kaz demoun é banna téi anvoye lo pli pti an parmi la band, in pti garson banna téi kriy ali « Pti bout moun ! »-lété lo pli malin rant tout- pou alé sèye domann siouplé in moun l’avé in pé plis lo pourkoi la famiy mi anparl azot dopi talèr-la.Li téi sava.

Kriké Mésyé ! Kraké madam ! La klé dann mon posh, la taye dann out sak.

Donk lo pti bout moun dann shomin banna téi fé li l’avé son marène é li té i mank pa pass la kaz son marène konmsa pé sfèr li téi pé gingn kékshoz pou li épi pou son falmiy .Pèrsone té i vien pa avèk li pars lo marène téi vé pa oir son momon, ni son papa, ni son kat frèr-sis sèr mèm an pintir.Promyé shoz son marène téi di : « Ousa i lé out finyann papa ?Out shamélèz de momon ?Epi out kat frèr si sèr in bann parazite dsi la tèr Bon dyé ?

Pti bout moun téi réponn :Zot lé pa la marène, zot la rèss la kaz .sé dir azot si la famiy té i pran prékosyon pou pa fé oir aèl…Lo marène téi done son fiyo in pti bout biskui épi té i di ali :

« Alé aou é kan ou i par pass koté lo poulayé donn bann poul manzé sak moin la prépar pou zot.Manzé sal ?Pa si tèlman sal pou in moun léstoma dann talon pars ladan l’avé konflor, tourto, mayi an grin,patate.Lo pti bout moun i di rovoir son marène é an passan koté park poul i done moityé manzé élo rès li té i angarote bien dann in bout fèye fig pou amenn sa pou son famiy.

Kriké Mésyé ! Kraké madam ! koton mayi i koul ! Rosh I flote ! L’avé inn foi pou inn bone foi mésyé lo foi la manz son foi avèk in grin sèl.

Morso niméro inn lé fini-dé k’i gingn nou va pran morso niméro dé.


Inn modékri, inn ti lavi, inn komantèr ?

signaler contenu


Facebook Twitter Linkedin Google plus