Lakey lo sit > Chroniques > Oté
Dékalaz nout listoir : mi arète la pou zordi mé nou va arvi
lindi 14 octob 2019, sanm
Vantredi pasé moin la anparl bann dékalaz dann nout listoir, dann la vi nout péi si zot i vé . Sanm pou moin néna in dékalaz dann sak i doi fé épi sak i fé réèlman, mèm si i koné sak i fo fé. Moin la parl légalité sosyal : in n’afèr désidé l’ané 1946 é la mète sinkantan avan fé… Mi pans listoir nout péi i ésplik in pé sa.
Mé zot va dir amoin listoir i ésplik pa tout zafèr, si li pé ésplik sak la spassé, lo prézan zordi, li sava pa asplik anou sak i doi éspass domin dann lo fitir.. Zistoman mi poz amoin késtyon la dsi. Moin lé a d’mandé si sak la spassé dann pasé lé pa riskab ariv ankor dann fitir.
In légzanp : Paul Vergès avèk son lékip téi vé fé lo tram-train an mèm tan k’in nouvèl rout litoral. Dé zafèr inportan an mèm tan é sa noré bien aranz anou. Mé mi koné pa pou kosa, mé moin l’avé konm in dout téi ariv pa o bout pa par mank kapasité sak lété o komand, pa par mank larzan, mé an rogardan sak la spassé dann nout listoir moin téi di sré bèl mé sépa si v’ariv o bout.
Zot va dir almoin lé fasil koz apré, akoz la pa koz avan ? Bon dakor, mé ni pé oir la suite.L’ariv in lékip gabyé kosto, la di i sava fé in bèl rout an mèr-konm i fé partou par l’fète-la ronégosyé bann zakor, téi sava tyé douz blèss katorz. Zordi ni oi dann kèl traka nou l’arivé é moin lé sir shové in p lé riskab blanshi avan lo tan.
Kréol va di : sa la pa Listoir, sa sé lo déstin, sa sé konm la mélédiksyon lo sèrpan a plime. I pé di osi : kan ou i rode lo kou i fo ou i gagn é si l’avé pa fé in projé mal azansé noré pa ariv sak l’arivé.. Alé ! Mi arète la pou zordi, mé nou va artourn la dsi. Nou va arvi.