Matante Zélida la ékrir Justin :
Mon shèr nové, mon spès salté,
Kossa mi sort aprann ? Zot té i ve juska alé fouy dann rin volkan pou fé léstrésité ? Mé zot la, zot bann rouj-de-fon, zot la pa pèr lo dyab don zot ? Zot i konpran pa kan volkan l’apré grogné, nana d’zafèr k’i dépass anou l’apré spass la-dan ? Zot i ve mète lo moun an danjé ! Rozman, rozman Didier la mète in poin final avèk sa, rozman li la déside arète in projé danjere konm sa pou La Rényon. Touléka, li lé byin méritan a koté d’zot, li lé byin rézonab, é zot plis ké rézodyab. Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr,
Sorte in pé dann fénoir ! Rogarde in pé dan la limyèr ! Kossa, la jéotèrmi i fé pèr aou ? Ou ignor, in pé partou déssi la tèr, demoun i mète sa an valèr. Mèm dann la Guadeloupe, la-ba dann in komine i apèl Bouillante, banna la fé in lizine éléctrik jéotermik, sa i marsh byin, é sa i anpèsh pa landroi ète byin vizité par bann tourist k’i sorte in pé dan toute péi... La-ba i gingn mète an valèr so rishèss-la ! Issi, i vé solman fèr in reshèrch pou oir si lo péi lé an kapasité ésploite in lizine zéotermik. Sa ossi ni pé pa fèr ? Dan kèl fénoir in pé i vé ni rèss don ? Somanké in pé nana la krintiv de sa. Ou i diré pa, k’in pé i di ankor, dousman pou pa k’lo dyab i antann azot : « volkan i bril boi vèr, i bril pa boi sèk ! »*.

* Dann tan d’manj patate avèk la po, sa té in kroiyans, nout vyé zansète l’avé zamé vi volkan. Alors té i di sa, té i arpète sa, san alé vérifyé sir plass.

Justin