Lakey lo sit > Chroniques > Oté
Oté ! Koméla i bonbarde niyaz pou fé tonb la plui don ?
mardi 23 avril 2024, sanm
Mézami mwin la touzour panssé, bann péi konm Dubaï sa lété sèk an graton la plipar d’tan. Mwin téi panss mèm sa l’avé in klima dézèrtik si tèlman téi falé déssal lo d’mèr pou boir sansa pou fé la toilète… Mé wala ké néna dé troi zour, mi rogarde dann télé é sak mi oi la bien étone amwin : l’avé in tan d’siklone, épi la plui téi tonb konm vash k ’i piss. Mwin la panss lété in lérèr mé apréssa mwin la antann dann télé dë zan d’plui la tonb an 24 èr dann Dubaï laba.
Aprésa mwin la antann dir avèk lo réshofman klimatik la plui tazantan téi tonb an loraz mé kant mèm dezann d’plui an in zour sa lé in pé for-lé mèm danzéré... Aprésa demoune la tète la komanss travaye épi zot la domandé si sa lé natirèl osinonsa artifissyèl. Pars d’apré sak i prétan dann péi laba banna i yèm fé manipilasion dsi nyaz é sé pa la promyèr foi ké zot i manipil nyaz kissoi avèk produi shimik, kissoi avèk la sab, mèm défoi zot i bonbarde nyaz avèk sé pa tro koué.
Lom-la sa in drol zanimo sa. Li kontante pa li sak la natir i ofèr ali é i fo ali pliss ankor kansréti pou amontr la natir i komann pa li é si néna in pli for sé li. Mwin la fine rakonte azot in zour la séshrèss té apré fatig anou issi La rényon : nou la fé névène san okin rézilta, nou la pik kouto dan la tèr - mé sa sé plito pou arète la plui — toute noute bann méyèr dovinèr la réini zot fors, nou la fé la priyèr ossi… Nou la marsh dann shomin la bouzi alimé. Total zéro. L’èrla lo préfé dann tan-la la di, i anvoye laviyon Samat pou bonbarde bann nyaz. Lavion Samat la dékolé. Nou marmaye lékol nou la pa rante dan la klass, nou la rèss dan la kour.
Lo laviyon la vronbi, la fonss dsi niyaz, la tir de kou d’pétar dodan sa la fé pan épi ankor pan. Mé la plui la pa tonbé, ni toute suite ni in pé d’tan apré. Noute léspèryanss téi marsh opoil dsi tablo mé pa dan la réaltité. Inn dé péshèr an mèr kanote dan la mèr la di zot la gingn in grin d’plui, vayan vèye pa koman, dizon prèss galé la tonb dsi zot... Mi rapèl in dalon téi di : in shassèr épi in péshèr sé dé mantèr — li téi shass épi li téi pèsh... Mézami mi arète la, mé mi koné bien l’om konm li lé monstré li lé kapab manipil la natir. Pou noute bien sansa non.
A bon antandèr salu !
Justin
