Lakey lo sit > Chroniques > Oté
« La ou la bate la syanss la ! »
In kozman pou la route
zedi 11 avril 2024, sanm
Médam, zé méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.
Mézami kozman mwin la marke an-o la mwin téi antann ali souvan défoi kan mwin lété marmaye. Mèm in foi mon proféssèr latin la di amwin kan li la lir mon tradikssyon — sa téi apèl in vèrssion : « La ou la bèz la syanss la garsson Gauvin ! ». Mi rokoné mon tradikssyon lété pa tro roshèrché mé d’la sorte amwin in n’afèr konmsa dovan toute in klass ébin mi pé dir azot mwin la vni rouz dopi la tète ziska lo pyé.
Sa i vé dir kan wi di in moune li la bate, sansa li la bèz la syanss, sa i vé dir li la fé in bèl kouyonade. Astèr mi kass pi la tète pou sak li la di, mé kan li di aou sa, li mète aou in zéro bien ron épi li di aou alé fé sign oute karné par oute famiye, mi pé dir azot néna do koi gingn in bon mal dann vante an pliss bann kou d’fouète i atann aou — roulo i sar monte dsi oute zanb.
Alé ! Mi arèst la, é mi domann azot bien rofléshi ladsu ; aprésa ni rotrouv pli d’van, sipétadyé.
Justin
