… San konté bann sizé d’mékontantman !

Astèr la franss néna bonpé pliss ké vin million d’sizé, mé mwin lé sirésèrtin bann sizé d’mékontantman la bien goumanté dopi so tan-la é si ni parl la franss l’outre-mèr, mon tète a koupé, mwin lé sir lo bann sizé d’mékontantman lé ankor bonpé pli nonbré ankor.

Normalman promyé mé sé lo zour pou bien ésplike toute sak i va pa é toute sak i fo fé pou shanjé dann la sossyété… Fitintankan téi manifèst pou lo promyé mé l’avé in bonpé banderol é dsi shak banderol l’avé in mo d’orde bann sindika kissoi dsi la réform bann rotrète zot lé konte, kissoi dsi bann zalokassion shomaz gouvèrnman i vé rogn ankor in pé, kissoi dsi bann salèr lé souvan défoi bien insifizan,

Kissoi dsi lo arssèlman dann travaye,.. Ni pé ankor azoutte bann lojman insifizan, lo manke plass travaye. Mi arète tèr-la pou l’instan mé nou lé sir lo bann sizé d’mékontantman i arète pa tèr-la… Poitan lé domaz mé dann in défilé promyé mé issi La Rényoni oi moinss an moinss bann rovandikassion noute pèp rényoné épi toute son bann sizé d’mékontantman.

Sa la pa in kritik mé sirman lo roflé in shanjman dann la mantalité d’moune issi La rényon é pétète dann bonpé landroi. La plass i manke amwoin pou anparl sa zordi, mé mi yèmré noute toute ansanm i kalkil in pé toute sak i va pa i i fodré shanjé avan k’i kapote lo total épi lo kapital.

O fète mwin la pa vu dann bann manifèstassion anparl Air Autral é poitan sa sé in drame pou noute péi épi pou toute bann travayèr. Mi diré ni san konm k’i diré lo monopol Air-France ariv ankor gro konm in gran mézon.. Poitan la pa anparl sa dann manifèstassion.. In sizé d’mékontantman a razoute dsi la list lé bien long a l’èr ki lé.

A bon antandeur salu !

Justin