Solèye t’a noute toute, Solèye pou noute toute (2) Dézyèm morso

Astèr ni koné la téknik lénèrji solèr la fine shanj in bonpé é ni antrovoi, dovan nou, a noute porté, la kapassité pou bann sak néna larzan konm pou sak na poin an avoir kouran prèss gratuiteman — antouléka par in pti dépanss avèk solèye épi son shalèr pou gingn toute lo konfor kouran i pé done noute toute kisoi d’moune anlèr, kissoi demoune atèr.

Avansa m’a dir azot in n’afèr ; siklone billal la done paké néna in pé pliss in moi é bonpé d’moune la rotrouv azot san limyèr, san lav-linj, san frizidèr, san lo konfor nou lé abityé é ni vé pa s’anpassé. Mé rante toute bann kaz dann fénoir néna sak l’avé la limyèr mèm dann tangaz épi apré par raporte zot la fé lotokonsomassio par in mini-stassio éléktrik solèr zot la fé instal zot kaz.

Astèr ni di, si lé possib fé sa pou bann moune néna larzan akoz i fé pa pou sak na poin, sansa néna trépé. L’èr-la nou lé dovan lo mèm défi Paul Vergès la poz anou pou lo sho é l’èrla ni pé réponn in défi konmsa sinploman si ni kroi solèye t’a nou, é solèye sé pou nou.

Astèr i fo mi défoul in pé : mézami nou néna arien a fèr avèk bann sossyété i ramass par milyar toulézan é bien sir milyar i sorte dann la posh travayèr. Sa la pa noute problèm mé ni panss sèryèzman toute demoune pov konm rish néna lo droi profite la natir é dann ka k’i konssèrn anou dann sak solèye i kado anou pou arien.

Ala pou kossa noute bann kamarade lo parti, an fézan konm Paul Vegès, la panss lé possib fèr 280000 [1] mini santral solèr individyèl pou done kouran épi lo konfor léstréssité 280000 famiye konm Paul la fé pou shof-o solèr é konmsa rakroshanou avèk lo wagon la lite konte lo réshofman klimatik.

A bon antandèr salu !

Justin