Lakey lo sit > Chroniques > Oté
Lo sistèm rotrète méssyé Macron i rante an aplikassion, avèk lo traka bann salaryé… mé san soussi pou méssyé Macron
lindi 4 séptanm 2023, sanm
Mézami mi sorte antann dann radio lo réform rotrète i sorte rante an aplikassion. Zot i koné sé so sistème i fé pass laz la rotrète soisante katran olèrk soisante dé ziska zordi. Pa d’in kou, mé ofiramézir va azoute in trimèst épi dé, épi troi pou fini par ariv soisante kate.
Zot i koné sa sé in réform — plito in kontro-réform, lé pa popilèr ditou. An pliské sa la roprézantassion nassyonal la pa gingn la possiblité transhé vréman, vik la aplike in lartik la konstitissyon lé fé zistoman pou anpèsh la roprézantassion nassyonal ésprime ali.
An pliské sa zot i koné bann travayèr parrtou la manifèsté é pou konplète lo tablo lo kontro-réform l’avé pou bi l’ékilib kontab lo réjime rotrète é lo kontab nassyonal i sorte romarke lo réjime sar dézékilibré é pa pli tar ké l’ané 2024. In bon rézilta, zot i panss pa ?
Astèr la radyo épi la télé i done inn-dé zégzanpe. An parmi néna in madame téi doi pran son rotrète moi d’novanm sète ané, mé avèk lo nouvo kalkil èl sar blizé travaye ziska fin d’moi d’févriyé… Sa i poz in problème : troi moi lé kourte é lé long an mèm tan pars sak lé fine mète dann son tète li par moi d’novanm, mé lo troi moi k’i rèst sar long konm troizan.
Mi di azot sa pars mwin téi doi pran mon rotrète lo 3 mars inn ané. Ziska moi d’déssanm mwin té pa fatigué. Kan la pass l’ané nouvèl sé l’èr lo tan la ralonzé, ralonzé, ralonzé konm in lastik. Lo tan téi i fini pi d’ralonzé.
Sé pou sa ké zordi mi panss toute mon bann kamarade i sa pran troi moi, sis moi, nèf moi é mi koné zot i sava soufèr… Mé méssyé Macron i soufèr pa li, pars i paré li la pran pou sinkan é zordi li rèv évéyé rallonz ankor la sos pou sinkan an pliss. Sé dir azot kan ou lé kontrofé, ou lé kontrofé,
A bon antandèr salu !
Justin
