Flanbo nout parti i klèr loin é i klèr zis nout shomin épi sak nout voizin !

Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, mi antan azot apré anparl la Coi (komisyon l’oséan indien) é konm i di zot i pans la-ba l’apré konm mète pyèz pou rényoné. Poitan La frans, nout patri lé roprézanté, mèm in sogrétèr d’éta la tonm prézidan so kou isi. Moin mon olitik sé fèr konfyans la mèr pati, é pa rod, midi èà katorz èr. Koué k ni fré an plis si sété nou lo prézidan ? San mantir, banna lé pli kalifyé ké nou, éi fo fèr konfyans lé zans k’i koné. Fransman parlé zot lé in pé fyèr solon moin, zot lé mèm kaziman vantar, vantar ki tou ni. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, i viendré pa ou a l’idé ké nout z’inntéré é pi sète La frans sré pa lo mèm san pour san ? I ariv pa ou d’kalkilé ké nou lé dann in réjyon tropikal konm Moris, konm Madégaskar, Komor, Sésèl é tout sak ni pé fèr banna i gingn fèr osi mèm méyèr marshé ké nou ? I viendré pa dann out l’idé in n’afèr konmsa ? Pou arzout èk sa : i pléré aou k’i koz de ou mé pa avèk ou ? Pou moin la poin pli mal élvé ké sa. Fransh vérité matant, kan La frans, konm lé z’ot, i diskite nout ka dann nout do sa in n’afèr mi èm pa !

Poitan nou la défann koz nout bann voizin é pa arienk inn foi, kont nout prop gouvèrnman an plis ! Alor sa i kont pi don ? Alor i arpèl pi don sa ? Astèr ou va dir amoin gouvèrnman la droit La Frans é mèm la gosh, la touzour apiy lo rin bann kolonyal é lé vré. Mé sé zisté rézon ké zot i oi pa bien ousa i lé nout l’intéré é ousa i lé l’intéré nout bann voizin - vi ké zot sé dé roulèr d’fos pou vréman ! Pou finir m’a di in sèl shoz : Flanbo parti kominis la klèranou é la klèr in bonpé foi, pars li klèr loin é li klèr zis Li klèr nout shomin épi sèt nout bann voizin. Tok ! Pran sa pou ou !