Oté

Assé annuir aèl don,
Pis k’i di azot, èl la fé l’éstop dann l’aviyon !

Justin / 4 févrié 2011

Mi koné in kamarad nana, konm diré l’ot, lo sans bann formil... sansa bann patoi si zot i vé bien. Li la ansèrv de sa kan li lété dann la vi piblik rényonèz. L’avé in patoi li té ansèrv souvan-défoi, pars, i fo rokonète, sa té i aplik bien la sosyété bann moun dsi la otèr. Patoi-la i di : « Poisson i pouri par la tète ! ». Dann in sosyété, sa i vé dir, la koripsyon i atak bann gro vaza pou komansé.
Kossa sa i fé pans amoin ? Dabor inn, sa i fé pans amoin lo trikmardaz l’ansien minis Travay. Mé li lé pi minis, donk lèss son bann z’afèr suiv zot kour. Zordi, sa i fé pans amoin MAM, minis z’Afèr zétranzèr. Dépi in koup de tan, bann zournalist l’apré okip ali.
Kan demoun la bouzé dann la Tinizi, li la pa ankouraz lo Ben Ali pou mète in pé plis la démokrasi dann son péi, mé li la di, li lé paré pou amontr banna koman in bon polis i fé son boulo. Aprésa, li la di, demoun la pa bien konprann ali. La pa sak li la di ké li té vé di ! Donkalor, son foush la langué.
Astèr-la, i aprann li la parti pass vakans Noèl dann la Tinizi. Solman li la pa parti oir lo Ben Ali, d’apré sak li di. Alé kalkil pou kossa li la rant dan l’aviyon privé in kapitalis la Tinizi ! Pars sé in z’ami, épi lété pli préférab bate in pti karé an l’aviyon k’in gran karé an loto. Épi, lo kapitalis té pa in vré dalon avèk la famiy Ben ali. Myé k’sa, la famiy Ben Ali la konm k’i diré pènn ali, é pran larzan dann son posh.
Na in patoi i di konmsa : di amoin kisa ou i frékant, m’a dir aou kik vi lé. Mé dann son ka, èl i prétan sa la pa vré pou èl, pars èl i domann k’i arète annuir aèl, pou in pti karé l’éstop an l’aviyon.

NB : MAM lé minis, son bout lo zo lé minis ossi. Si i gingn in zanfan, lé riskab ète ségrétèr-d’Éta.

Justin


Kanalreunion.com