In mansonz sé in mansonz, in manipilasyon sé in manipilasyon mèm si li lé marké dann liv an lète an or

Matant Zélida la ékrir Justin :
Mon shèr nové, mon spès salté, rouj-de-fon dovan l’étèrnité, mi sort lir kékpar néna in moun bien kalifyé la ékri La Rényon la zamé été in koloni é sé bann kominis l’avé di fab-la. Mi douté déza dopi in sèrtin tan mé zordi moin lé pli sir ankor pars in moun la ékri sa dann in liv. Koman li apèl ? Mi koné pa son nom mé mi donn ali rézon san pour san. Tout fason moin lé dakor avèk li pars d’apré sak i di li kraz bann piman rouj-la bien konm k’i fo. Tok ! Pran sa pou toué !

Justin la fé pou répons :
Mon vyé matant k’i koz la boush rouvèr, sak ou i ékri-la la pa ditou pou étone amoin. Matant si mi tronp pa ou i kriy bravo pou kékshoz i apèl lo révizyonism -In révizyonist pou listoir La Rényn, lé sinp pou rokonète : sé kélk’in k’i done in lintèrprétasyon déformé par rapor nout listoir. Si in moun i di-mèm si li ékri-La Rényon la zamé été in koloni d’La frans ébin so moun-la i déform nout listoir é li sé in révizyonis… Matant nout listoir lé abityé ète rovizité konmsa par tout sort kalité d’moun i prétan zot lé istorien alé oir an vérité zot sé dé manipilatèr. Mé pa zordi, pa domin, la vérité i fini par trionfé. Tok ! Pran sa ou !

NB-Matant kosa k’ i diré d’in moun si li di sansa li ékri in ta d’balivèrn dsi nou Rényoné , nout listoir é sak la spass vréman isi La Rényon. Si ou lé sinploman in pé onète dsi lo poinnvizé intéléktyèl, ou i nomré in balivèrn balivèrn mèm, in mansonz mansonz mèm, in manipilasyon manipiasyon-mèm é sé sa mèm si sa lé ékri dann in bèl liv avèk bann lète an or.